பஞ்சாப் மாநிலத்தில், மாற்று சமூகத்தைச் சேர்ந்த பெண்ணைக் காதலித்துத் திருமணம் செய்துகொண்ட இளைஞர் ஒருவர், தனது மனைவியின் சகோதரர்களால் ஆணவக்கொலை செய்யப்பட்ட சம்பவம் பெரும் அதிர்ச்சியை ஏற்படுத்தியுள்ளது. இந்த கொடூர சம்பவம் தர்ன் தாரன் மாவட்டத்தில் உள்ள ஒரு பேருந்து நிலையத்தில் ஞாயிற்றுக்கிழமை அன்று அரங்கேறியுள்ளது.
உயிரிழந்த இளைஞர் ஜக்ஜித் சிங் (20 வயது) என்றும், அவர் தனது மனைவியின் சகோதரர்களால் கொடூரமாகக் கொல்லப்பட்டதாகவும் அடையாளம் காணப்பட்டுள்ளது. ஜக்ஜித் சிங், தனது மனைவியின் சகோதரர்களின் எதிர்ப்பையும் மீறி, ஒரு மாதத்திற்கு முன்பு காதலித்து திருமணம் செய்துகொண்டார். இந்தத் திருமணமே இந்த ஆணவக்கொலைக்குக் காரணம் எனத் தெரிவிக்கப்பட்டுள்ளது.
சம்பவத்தன்று, ஜக்ஜித் சிங்கை அவரது மாமியார் தர்ன் தாரன் பேருந்து நிலையத்திற்கு அழைத்துள்ளார். அவரைச் சந்திப்பதற்காக அங்கு சென்ற ஜக்ஜித் சிங், தனது மாமியாருடன் வீட்டிற்குச் செல்ல விரும்புவதாகக் கூறியுள்ளார். ஆனால், வீட்டில் தனக்காக என்ன காத்திருக்கிறது என்பதை அறியாத அவர், சந்தையில் குளிர்பானம் மற்றும் தின்பண்டங்களுடன் பேருந்து நிலையத்திற்குச் சென்றுள்ளார்.
அங்கு சென்றவுடன், ஜக்ஜித் சிங்கைச் சூழ்ந்துகொண்ட அவரது மனைவியின் சகோதரர்கள், தங்கள் எதிர்ப்பையும் மீறித் திருமணம் செய்துகொண்டது ஏன் என்று கோபத்துடன் கேட்டுள்ளனர். பின்னர், ஆத்திரத்தில் ஜக்ஜித் சிங்கைத் தாக்கியுள்ளனர். வெறும் 37 விநாடிகளில் 83 முறை கத்தியால் குத்திக் கொலை செய்துள்ளனர். இந்தத் தாக்குதலில் ஜக்ஜித் சிங் உடலில் 60-க்கும் மேற்பட்ட காயங்கள் ஏற்பட்டதாகக் கூறப்படுகிறது.
ஜக்ஜித் சிங் சரிந்து விழுந்து உயிரிழந்த பிறகும், தாக்குதல் நடத்தியவர்கள் அவரது தலையிலும் கழுத்திலும் தொடர்ந்து கத்தியால் குத்தியதாக சம்பவத்தை நேரில் பார்த்தவர்கள் தெரிவித்துள்ளனர். இந்த கொடூர சம்பவம் அப்பகுதியில் பெரும் பரபரப்பை ஏற்படுத்தியுள்ளது.
உயிரிழந்த ஜக்ஜித் சிங்கின் தந்தை தர்செம் சிங் கூறுகையில், தனது மகனும் ஜஷன் கவுரும் திருமணத்திற்கு முன்பு காதலித்து வந்ததாகவும், திருமணம் குறித்துப் பேசுவதற்காகத் தங்கள் குடும்பத்தினர் ஜஷனின் உறவினர்களை அணுகியதாகவும், ஆனால் அவர்கள் சம்மதிக்க மறுத்துவிட்டதாகவும் தெரிவித்துள்ளார். அதன் பின்னரே அந்தத் தம்பதியினர் வீட்டை விட்டு வெளியேறி, சுமார் ஒரு மாதத்திற்கு முன்பு திருமணம் செய்துகொண்டதாக அவர் குறிப்பிட்டுள்ளார்.
இந்த ஆணவக்கொலை சம்பவம் குறித்து காவல்துறையினர் விசாரணை மேற்கொண்டு வருகின்றனர். காதல் திருமணங்களுக்கு எதிராக நடக்கும் இதுபோன்ற வன்முறைச் சம்பவங்கள் சமூக ஆர்வலர்களிடையே பெரும் கவலையை ஏற்படுத்தியுள்ளது.
