புதுக்கோட்டை மாவட்டம் தன்னாங்குடியில் பெரும் பரபரப்பு ஏற்பட்டுள்ளது. அப்பகுதியைச் சேர்ந்த முன்னாள் ஊராட்சி மன்றத் தலைவரான நாகராஜ், இன்று காலை தனது மனைவியை அரசு பள்ளிக்கு அழைத்துச் சென்றுவிட்டு வீடு திரும்பிக் கொண்டிருந்தார். பாக்குடி பெரிய குடும்பம்பட்டி சாலை வழியாக அவர் சென்று கொண்டிருந்தபோது, மர்ம நபர்கள் அவரை வழிமறித்தனர். கண் இமைக்கும் நேரத்தில், அவர்கள் நாகராஜின் தலையைத் துண்டித்து கொடூரமாக கொலை செய்துவிட்டு மின்னல் வேகத்தில் தப்பிச் சென்றனர்.
பாக்குடி கவரச்சி குளக்கரை தார் சாலை நடுவே, வெட்டுக்காயங்களுடன் நாகராஜின் சடலம் கிடந்துள்ளது. தகவலறிந்து சம்பவ இடத்திற்கு விரைந்த போலீசார், சடலத்தை மீட்டு உடற்கூறு ஆய்வுக்காக இலுப்பூர் அரசு மருத்துவமனைக்கு அனுப்பி வைத்தனர். இந்த கொடூர கொலை சம்பவம் அப்பகுதியில் பெரும் பதற்றத்தை ஏற்படுத்தியுள்ளது.
இது தொடர்பாக போலீசார் நடத்திய முதற்கட்ட விசாரணையில், சில தகவல்கள் வெளியாகியுள்ளன. கொலை செய்யப்பட்ட நாகராஜுக்கும், பக்கத்து வீட்டில் வசிக்கும் முத்துலட்சுமி என்பவருக்கும் இடையே ஏற்கனவே இடப் பிரச்சனை தொடர்பாக வழக்கு இருந்து வந்துள்ளது. இந்த வழக்கில் நாகராஜ் மீது இலுப்பூர் போலீசார் வழக்கு பதிவு செய்துள்ளதும் தெரியவந்துள்ளது.
எனவே, இந்த கொலைக்கான காரணம் இடப் பிரச்சனையா அல்லது வேறு ஏதேனும் தனிப்பட்ட காரணங்கள் உள்ளனவா என்பது குறித்து போலீசார் பல்வேறு கோணங்களில் தீவிர விசாரணை மேற்கொண்டு வருகின்றனர். குற்றவாளிகளை விரைந்து பிடிக்கவும், கொலைக்கான பின்னணியை முழுமையாக வெளிக்கொணரவும் போலீசார் தீவிர முயற்சி எடுத்து வருகின்றனர். இந்த சம்பவம் அப்பகுதி மக்களிடையே பெரும் அதிர்ச்சியையும் அச்சத்தையும் ஏற்படுத்தியுள்ளது.
