சட்டமன்றத்தில் அமைச்சர் ஆதவ் அர்ஜுனா பேசத் தொடங்கினாலே சண்டை வந்துவிடுவதாகவும், அவர் 8-ஆம் தேதி வரை பேசாமல் அமைதியாக இருக்க வேண்டும் என்றும் தேமுதிக பொதுச்செயலாளர் பிரேமலதா விஜயகாந்த் அறிவுறுத்தியுள்ளார்.
சென்னை சட்டமன்ற வளாகத்தில் செய்தியாளர்களைச் சந்தித்த பிரேமலதா விஜயகாந்த், அமைச்சர் ஆதவ் அர்ஜுனாவிடம் இது குறித்து நேரடியாகவே கூறியதாக தெரிவித்தார். அவர் பேசத் தொடங்கினாலே சண்டைகள் ஆரம்பிப்பதாகவும், இதனால் சட்டமன்றத்தின் நேரம் வீணடிக்கப்படுவதாகவும் அவர் வருத்தம் தெரிவித்தார்.
சட்டமன்றத்தை சொந்தப் பிரச்சினைகளுக்காக பயன்படுத்தக் கூடாது என்றும், அனைத்து சட்டமன்ற உறுப்பினர்களுக்கும் அவரவர் தொகுதிப் பிரச்சினைகள் மற்றும் மக்கள் பிரச்சினைகள் குறித்து பேச வாய்ப்பளிக்க வேண்டும் என்றும் பிரேமலதா கோரிக்கை விடுத்தார். அமைச்சர் ஆதவ் அர்ஜுனா அமைதியாகச் சென்றுகொண்டிருக்கும் சபையில் எழுந்தவுடன் சண்டை வந்துவிடுவதாகவும், இதனால் சுமார் 4 மணி நேரம் வீணடிக்கப்படுவதாகவும் அவர் கூறினார்.
தனிப்பட்ட நோக்கங்களையும், பிரச்சினைகளையும் பொதுக்கூட்டங்களிலோ அல்லது செய்தியாளர் சந்திப்பிலோ பேசலாம் என்றும், சட்டமன்றத்தில் அதுபோன்ற பேச்சுகளைத் தவிர்க்க வேண்டும் என்றும் அவர் வலியுறுத்தினார். இது குறித்து சபாநாயகரிடமும் தான் வலியுறுத்தியுள்ளதாக பிரேமலதா குறிப்பிட்டார்.
மக்களுக்காகப் பேசுவதற்கே சட்டமன்றம் உள்ளது என்றும், ஆனால் அங்கு எப்போதும் சண்டையே நடப்பதாகவும் அவர் வேதனை தெரிவித்தார். 'இது சட்டமன்றம் கிடையாது, சண்டமன்றம்' என்று அவர் கடுமையாக விமர்சித்தார்.
அமைச்சர் ஆதவ் அர்ஜுனா பேசாத வரை சட்டமன்றம் அமைதியாகச் செல்வதாகவும், அவர் பேசத் தொடங்கினாலே சண்டையாக மாறுவதாகவும் பிரேமலதா சுட்டிக்காட்டினார். மாணவர்கள் தேர்வுக்காகக்கூட இப்படித் தயாராக மாட்டார்கள் என்றும், ஆனால் சிலர் இரவு பகலாகத் தயாராகி வந்து சட்டமன்றத்தில் சண்டையிடுவதாகவும் அவர் குறிப்பிட்டார். இதனால் யாருக்கும் எந்தப் பயனும் இல்லை என்றும், தானும் பொறுமையாக இருந்து பார்த்துவிட்டதாகவும் அவர் தெரிவித்தார்.
