சென்னையில் போக்குவரத்து நெரிசலைக் குறைக்கும் முக்கிய திட்டமான பூந்தமல்லி – வடபழனி மெட்ரோ ரயில் சேவை, வரும் அக்டோபர் 11 ஆம் தேதி முதல் பொதுமக்களின் பயன்பாட்டிற்காக திறக்கப்பட உள்ளதாக தகவல்கள் தெரிவிக்கின்றன. பிரதமர் நரேந்திர மோடி இந்த புதிய வழித்தடத்தை தொடங்கி வைக்க உள்ளதாக எதிர்பார்க்கப்படுகிறது.
சென்னையின் இரண்டாம் கட்ட மெட்ரோ ரயில் திட்டத்தின் கீழ், மொத்தம் 118.1 கிலோமீட்டர் தொலைவிற்கு பணிகள் நடைபெற்று வருகின்றன. இதன் ஒரு பகுதியாக, வடபழனி முதல் பூந்தமல்லி வரையிலான 14.6 கிலோமீட்டர் தூரத்திற்கான மெட்ரோ ரயில் பணிகள் வெற்றிகரமாக நிறைவடைந்துள்ளன. இந்த வழித்தடத்திற்கு ரயில்வே பாதுகாப்பு ஆணையத்திடமிருந்தும் அனுமதி பெறப்பட்டுள்ளது.
இந்த புதிய மெட்ரோ ரயில் சேவையை பொதுமக்கள் பயன்பாட்டிற்காக தொடங்குவதற்கான தேதியை இறுதி செய்யுமாறு மெட்ரோ நிர்வாகம் மத்திய அரசுக்கு கோரிக்கை விடுத்திருந்தது. இருப்பினும், சட்டமன்றத் தேர்தல் மற்றும் புதிய அரசு பதவியேற்பு போன்ற காரணங்களால், இந்த வழித்தடத்தின் தொடக்க தேதி பலமுறை ஒத்திவைக்கப்பட்டது.
தற்போது வெளியாகியுள்ள தகவல்களின்படி, அக்டோபர் 11 ஆம் தேதி பிரதமர் நரேந்திர மோடி இந்த மெட்ரோ ரயில் சேவையை தொடங்கி வைக்க உள்ளார். ஆரம்பத்தில், இந்த வழித்தடத்தில் மொத்தம் 11 ரயில் நிலையங்கள் பயன்பாட்டிற்கு வரும் என்றும், பின்னர் கூடுதலாக 6 ரயில் நிலையங்கள் படிப்படியாக செயல்பாட்டிற்கு கொண்டுவரப்படும் என்றும் மெட்ரோ ரயில் வட்டாரங்கள் தெரிவித்துள்ளன.
இந்த மெட்ரோ ரயில்கள் பூந்தமல்லி பைபாஸ், பூந்தமல்லி, முல்லைத்தோட்டம், கரையான்சாவடி, குமணன்சாவடி, காட்டுப்பாக்கம், ஐயப்பன்தாங்கல், தெள்ளியாரகரம், போரூர் பைபாஸ், போரூர் சந்திப்பு மற்றும் வடபழனி ஆகிய 11 நிலையங்களில் நின்று செல்லும். இருப்பினும், ஆலப்பாக்கம், காரம்பாக்கம், வளசரவாக்கம், ஆழ்வார்திருநகர், சாலிகிராமம் கிடங்கு மற்றும் சாலிகிராமம் ஆகிய 6 நிலையங்களில் பணிகள் இன்னும் முழுமையாக நிறைவடையாததால், இந்த ரயில் நிலையங்களில் மெட்ரோ ரயில்கள் நிற்காது.
இந்த வடபழனி – பூந்தமல்லி மெட்ரோ வழித்தடம் செயல்பாட்டிற்கு வருவதன் மூலம், மக்களின் பயண நேரம் வெகுவாக குறையும் என எதிர்பார்க்கப்படுகிறது. தற்போது, வடபழனியில் இருந்து பூந்தமல்லிக்கு இருசக்கர வாகனம், கார் அல்லது பேருந்து மூலம் செல்ல சுமார் ஒரு மணிநேரம் முதல் ஒன்றரை மணிநேரம் வரை ஆகிறது. ஆனால், புதிய மெட்ரோ ரயில் சேவை மூலம் இந்த பயண நேரம் வெறும் 25 நிமிடங்களாக குறையும் என்பது குறிப்பிடத்தக்கது.
இந்த வழித்தடம் பொதுமக்களின் அன்றாட பயணத்தை எளிதாக்குவதோடு, சாலைகளில் ஏற்படும் போக்குவரத்து நெரிசலையும் கணிசமாகக் குறைக்கும் என எதிர்பார்க்கப்படுகிறது. இது சென்னையின் மெட்ரோ ரயில் கட்டமைப்பை மேலும் வலுப்படுத்தும் ஒரு முக்கிய மைல்கல்லாக அமையும்.
