மகாராஷ்டிர மாநிலம் சத்தாரா மாவட்டத்தில், சட்டவிரோதமாக மணல் கடத்திச் சென்ற லாரியைத் தடுக்க முயன்ற காவலரை, சுமார் ஒரு கிலோமீட்டர் தூரம் லாரியிலேயே இழுத்துச் சென்ற அதிர்ச்சிகரமான சம்பவம் நிகழ்ந்துள்ளது.
சத்தாரா மாவட்டத்திற்குட்பட்ட மஸ்வத் பகுதியில், காவலர் மகாவீர் கோகரே ஞாயிற்றுக்கிழமை மாலை தனது இருசக்கர வாகனத்தில் ரோந்துப் பணியில் ஈடுபட்டிருந்தார். அப்போது, பதிவு எண் இன்றி சந்தேகத்திற்கிடமான முறையில் வந்த டம்ப்பர் லாரியை அவர் கவனித்தார். உடனடியாக லாரியை நிறுத்த சைகை காட்டினார்.
லாரியைச் சோதனையிட்டபோது, அதில் சட்டவிரோதமாக வெட்டி எடுக்கப்பட்ட மணல் ஏற்றிச் செல்லப்பட்டது தெரியவந்தது. மணல் கடத்தலுக்கான அனுமதிப் பத்திரத்தை காவலர் கேட்டபோது, லாரி ஓட்டுநர் வாக்குவாதத்தில் ஈடுபட்டுள்ளார். திடீரென வாகனத்தை ஸ்டார்ட் செய்து தப்பியோட முயன்றபோது, காவலர் கோகரே லாரியின் கதவைப் பிடித்துத் தடுக்க முயன்றார்.
ஆனால், ஓட்டுநர் லாரியை நிறுத்தாமல், காவலர் பிடித்திருந்த நிலையிலேயே சுமார் ஒரு கிலோமீட்டர் தூரம் வரை இழுத்துச் சென்றுள்ளான். இந்த கொடூர சம்பவத்தில் காவலர் மகாவீர் கோகரே படுகாயமடைந்தார்.
அப்பகுதி மக்கள் மற்றும் சக காவலர்களின் உதவியுடன் அவர் உடனடியாக அருகில் உள்ள மருத்துவமனையில் அனுமதிக்கப்பட்டார். சுயநினைவு திரும்பியதும் காவலர் அளித்த வாக்குமூலத்தின் அடிப்படையில், மஸ்வத் காவல்துறையினர் வழக்குப் பதிவு செய்தனர்.
இதையடுத்து, அப்பகுதியில் தீவிர தேடுதல் வேட்டை நடத்திய காவல்துறையினர், இந்தச் சம்பவத்தில் தொடர்புடைய முக்கிய குற்றவாளிகள் இருவரைக் கைது செய்துள்ளனர். மேலும், இந்தச் சம்பவத்தின் பின்னணியில் உள்ள மணல் மாஃபியா கும்பல் மற்றும் லாரியின் உரிமையாளர் குறித்தும் காவல்துறையினர் தீவிர விசாரணை மேற்கொண்டு வருகின்றனர்.
சட்டவிரோத மணல் கடத்தலைத் தடுக்க முயன்ற காவலரின் உயிரைப் பணயம் வைக்கும் துணிச்சலான செயல் பாராட்டுக்குரியது என்றாலும், ஓட்டுநரின் கொடூரமான செயல் பெரும் அதிர்ச்சியை ஏற்படுத்தியுள்ளது.
