பெரம்பலூர் மாவட்டம், துறைமங்கலம் அருகே இன்று அதிகாலை நிகழ்ந்த கோர விபத்தில், கார் மற்றும் ஆம்னி பஸ் மோதி 4 பேர் பரிதாபமாக உயிரிழந்தனர். மேலும் 3 பேர் படுகாயமடைந்து மருத்துவமனையில் சிகிச்சை பெற்று வருகின்றனர்.
இந்த துயரச் சம்பவம் இன்று (செப் 24) அதிகாலை சுமார் 2.30 மணியளவில் பெரம்பலூர் மாவட்டம், துறைமங்கலம் பெட்ரோல் பங்க் அருகே தேசிய நெடுஞ்சாலையில் நிகழ்ந்துள்ளது. சென்னைக்கு காரில் திரும்பிக் கொண்டிருந்த ஏழு பேர் பயணித்த கார், முன்னால் சென்ற ஏ.வி.கே. ஆம்னி பஸ்ஸின் பின்புறத்தில் அதிவேகமாக மோதி விபத்துக்குள்ளானது.
ராமநாதபுரம் மாவட்டம், பிள்ளையார்குளம் கிராமத்தைச் சேர்ந்த பிரபாகரன் (30), முதுகுளத்தூர் அம்மாசி மகன் கார்த்திக் (38), கண்ணாயிரம் மகன் காளீஸ்வரன் (25) ஆகிய மூன்று பேர் சம்பவ இடத்திலேயே உடல் நசுங்கி உயிரிழந்தனர். விபத்தில் படுகாயமடைந்த கண்ணதாசன் (22), கார்த்தியின் மனைவி சூர்யா (35), தேவிபட்டினம் சபரிகன் மகன் ஜான் கென்னடி (35), ரவி மனைவி சரண்யா (23) ஆகியோர் மீட்கப்பட்டு, பெரம்பலூர் மற்றும் திருச்சி அரசு மருத்துவமனைகளில் உயிருக்கு ஆபத்தான நிலையில் அனுமதிக்கப்பட்டனர்.
மருத்துவமனையில் சிகிச்சை பெற்று வந்தவர்களில் சூர்யா சிகிச்சை பலனின்றி உயிரிழந்தார். இதனால், இந்த விபத்தில் உயிரிழந்தவர்களின் எண்ணிக்கை 4 ஆக அதிகரித்துள்ளது. மற்ற மூவரும் தீவிர சிகிச்சையில் உள்ளனர்.
இந்த கோர விபத்து குறித்து பெரம்பலூர் போலீசார் வழக்கு பதிவு செய்து விசாரணை மேற்கொண்டுள்ளனர். விபத்தை ஏற்படுத்திய ஆம்னி பஸ்ஸின் ஓட்டுநர், தூத்துக்குடி மாவட்டம், நாசரேட் பகுதியைச் சேர்ந்த ராஜசீலன் (45) என்பவரை போலீசார் கைது செய்து, அவரிடம் தீவிர விசாரணை நடத்தி வருகின்றனர்.
இந்த விபத்து காரணமாக திருச்சி – சென்னை தேசிய நெடுஞ்சாலையில் சுமார் ஒரு மணி நேரத்திற்கும் மேலாக போக்குவரத்து பாதிக்கப்பட்டது. வாகனங்கள் நீண்ட தூரம் வரிசையில் நின்றன.
விபத்துக்குள்ளான ஆம்னி பஸ்ஸில் தூத்துக்குடியிலிருந்து சென்னைக்குச் சென்ற 34 பயணிகளும், மாற்றுப் பேருந்து மூலம் பத்திரமாக சென்னைக்கு அனுப்பி வைக்கப்பட்டனர். இந்தச் சம்பவம் அப்பகுதியில் பெரும் சோகத்தை ஏற்படுத்தியுள்ளது.
