மதுரை மேல அனுப்பானடியைச் சேர்ந்த பூசாரி பரமசிவம் (55) என்பவரின் மரணம் குறித்த பிரேத பரிசோதனை அறிக்கை தற்போது வெளியாகியுள்ளது. இந்த அறிக்கை, அவரது மரணத்திற்கான காரணங்கள் குறித்து பல முக்கிய தகவல்களை வெளிச்சம் போட்டுக் காட்டியுள்ளது.
கடந்த ஜூலை 17 அன்று இரவு, பரமசிவத்தின் குடும்பத்திற்கும், அண்டை வீட்டாரான பாலகிருஷ்ணன் மற்றும் மாலதி தம்பதிக்கும் இடையே வாகனம் நிறுத்துவது தொடர்பாக ஏற்பட்ட தகராறு, இந்த துயர சம்பவத்திற்கு வித்திட்டதாக கூறப்படுகிறது. இந்த சம்பவம் தொடர்பாக ஜூலை 23 அன்று சிந்தாமணி காவல் நிலையத்தில் இரு தரப்பினர் மீதும் வழக்குப்பதிவு செய்யப்பட்டு, காவல்நிலைய பிணையில் விடுவிக்கப்பட்டனர்.
தொடர்ந்து, இந்த விவகாரம் குறித்து காவல் துறையினரிடம் கேள்வி எழுப்பிய பரமசிவத்தை, சிந்தாமணி காவல் நிலைய போலீசார் தாக்கியதாக குடும்பத்தினர் குற்றம் சாட்டுகின்றனர். இதன் விளைவாக, ஜூலை 24 அன்று பரமசிவத்திற்கு கடுமையான தலைவலி மற்றும் வாந்தி ஏற்பட்டதாகவும், அவர் அருகிலுள்ள ஆரம்ப சுகாதார நிலையத்தில் மருந்துகள் வாங்கி உட்கொண்டதாகவும் கூறப்படுகிறது.
மேலும், ஆகஸ்ட் 5 அன்று அவருக்கு மீண்டும் உடல்நலக்குறைவு ஏற்பட்டதையடுத்து, மதுரை அரசு ராஜாஜி மருத்துவமனையில் உள்நோயாளியாக அனுமதிக்கப்பட்டார். அப்போது, அவருக்கு மூளையில் ரத்தக்கசிவு ஏற்பட்டிருப்பதாக மருத்துவர்கள் தெரிவித்ததாக குடும்பத்தினர் கூறியுள்ளனர். இதைத் தொடர்ந்து, ஆகஸ்ட் 11 அன்று தனியார் மருத்துவமனைக்கு மேல் சிகிச்சைக்காக பரமசிவம் கொண்டு செல்லப்பட்டார். துரதிர்ஷ்டவசமாக, ஆகஸ்ட் 15ஆம் தேதி இரவு அவர் உயிரிழந்தார்.
பரமசிவத்தின் மரணத்திற்கு காவல்துறையினர் தான் காரணம் என்று அவரது குடும்பத்தினர் குற்றஞ்சாட்டிய நிலையில், இது தொடர்பாக உயர் நீதிமன்ற மதுரை கிளையில் மனுத்தாக்கல் செய்யப்பட்டது. இந்த மனுவில், சம்பவம் குறித்து உரிய விசாரணை நடத்தவும், பரமசிவத்தை தாக்கிய காவலர்கள் மீது நடவடிக்கை எடுக்கவும் கோரிக்கை விடுக்கப்பட்டிருந்தது.
இதனையடுத்து, மதுரை மாவட்ட நடுவர் மன்ற நீதிபதி முன்னிலையில் கடந்த 18ஆம் தேதி உடற்கூறாய்வு நடைபெற்றது. தற்போது வெளியாகியுள்ள பிரேத பரிசோதனை அறிக்கையின்படி, பரமசிவத்தின் தலையின் வலது நெற்றி மற்றும் பக்கவாட்டுப் பகுதியில் சுமார் 31 செ.மீ. நீளத்திற்கு 'C' வடிவில் அறுவை சிகிச்சை செய்யப்பட்ட காயம் இருந்தது கண்டறியப்பட்டுள்ளது. மேலும், அந்தப் பகுதியில் சுமார் 15 செ.மீ. × 9 செ.மீ. அளவிலான மண்டை ஓட்டுப் பகுதி அகற்றப்பட்டிருந்ததும் அறிக்கையில் குறிப்பிடப்பட்டுள்ளது.
அறிக்கையில், மூளையில் வீக்கம், மூளையைச் சுற்றியுள்ள பகுதிகளில் ரத்தக்கசிவு மற்றும் வலது முன்மூளைப் பகுதியில் ரத்தக்கசிவு காயம் பதிவாகியுள்ளது. மூளைத் திசுக்கள் மென்மையாகி கூழ் போன்ற நிலையில் இருந்ததாகவும் தெரிவிக்கப்பட்டுள்ளது. மேலும், உடலின் பல்வேறு பகுதிகளில் ஊசி செலுத்தப்பட்டதற்கான தடயங்களும் கண்டறியப்பட்டுள்ளன. இருப்பினும், உடல் முழுவதும் பல்வேறு பகுதிகளில் ஆழமாக வெட்டி பரிசோதனை செய்யப்பட்ட போதிலும், வெளிப்புறமாக புதிய காயங்கள் அல்லது ரத்தக்கசிவு தடயங்கள் எதுவும் காணப்படவில்லை என்றும் அறிக்கை கூறுகிறது.
இதயப் பரிசோதனையில், பெருநாடியில் கொழுப்புப் படிவங்களும், இடது கரோனரி தமனியில் சுமார் 80 சதவீத கொழுப்பு அடைப்பும் இருந்தது கண்டறியப்பட்டுள்ளது. இதயத்தின் எடை 382 கிராம் என பதிவு செய்யப்பட்டுள்ளது. பரமசிவத்தின் மரணத்திற்கான காரணத்தை உறுதி செய்வதற்காக, வயிறு, குடல், கல்லீரல், சிறுநீரகம் உள்ளிட்ட உடல் உறுப்புகள் ரசாயனப் பகுப்பாய்விற்கும், மூளை, இதயம், கல்லீரல் மற்றும் சிறுநீரகத் திசுக்கள் ஹிஸ்டோபாதாலஜி பரிசோதனைக்கும் அனுப்பப்பட்டுள்ளன. இந்தப் பரிசோதனைகளின் முடிவுகள் கிடைத்த பின்னரே மரணத்திற்கான இறுதி காரணம் குறித்து மருத்துவரீதியாக கருத்து தெரிவிக்க முடியும் என மருத்துவர்கள் தெரிவித்துள்ளனர்.
