தமிழ்நாடு அரசின் அயல்நாட்டு வேலைவாய்ப்பு நிறுவனம் (OMC) மூலம் ஓமன் நாட்டில் உள்ள அரசு நிறுவனங்களில் பணிபுரியும் அரிய வாய்ப்பு அறிவிக்கப்பட்டுள்ளது. உற்பத்தி மற்றும் பராமரிப்புப் பிரிவுகளில் காலியாக உள்ள பணியிடங்களுக்கு தகுதியான ஆண் பணியாளர்கள் விண்ணப்பிக்கலாம். இவர்களுக்கு மாதச் சம்பளமாக ரூ.54,000 வரை வழங்கப்படும் என தெரிவிக்கப்பட்டுள்ளது.
இந்த வேலைவாய்ப்பு முகாம், ஓமன் நாட்டில் இயங்கும் நிறுவனங்களில் பணிபுரிய விரும்பும் தொழில்நுட்பத் திறன் கொண்ட ஆண் பணியாளர்களைத் தேர்வு செய்வதற்காக நடத்தப்படுகிறது. உற்பத்தி, தரக்கட்டுப்பாடு மற்றும் பராமரிப்பு ஆகிய முக்கியத் துறைகளில் இந்த வேலைவாய்ப்புகள் வழங்கப்படுகின்றன.
பணிப்பிரிவுகளில், உற்பத்திப் பிரிவில் உருக்குதல், வார்ப்படம் அமைத்தல், செயல்முறை இயக்கம் மற்றும் சி.என்.சி ஆபரேட்டர் போன்ற பணிகளும், ஃபினிஷிங் மற்றும் இன்ஸ்பெக்ஷன் பிரிவில் தரக்கட்டுப்பாடு மற்றும் இறுதி ஆய்வுப் பணிகளும் அடங்கும். மேலும், இயந்திரவியல் மற்றும் மின்சாரப் பராமரிப்புப் பிரிவுகளிலும் காலியிடங்கள் உள்ளன.
கல்வித் தகுதியைப் பொறுத்தவரை, ஐ.டி.ஐ அல்லது டிப்ளமோ தேர்ச்சி பெற்றிருக்க வேண்டும். மேலும், வார்ப்படப் பகுதி அல்லது உற்பத்தித் துறையில் குறைந்தது 2 ஆண்டுகள் பணி அனுபவம் பெற்றிருப்பது அவசியமாகும். விண்ணப்பதாரர்கள் 22 முதல் 35 வயதிற்கு உட்பட்ட ஆண்களாக இருக்க வேண்டும்.
தேர்ந்தெடுக்கப்படும் பணியாளர்களுக்கு மாத வருமானமாக குறைந்தபட்சம் ரூ.44,000 முதல் அதிகபட்சமாக ரூ.54,000 வரை சம்பளமாக வழங்கப்படும். இது தவிர, உணவு, விசா, தங்குமிடம் மற்றும் விமானப் பயணச்சீட்டு போன்ற அனைத்து அடிப்படை வசதிகளும் வேலை அளிப்பவரால் இலவசமாக வழங்கப்படும் என்பது குறிப்பிடத்தக்கது.
இந்த வாய்ப்பைப் பயன்படுத்திக் கொள்ள விரும்பும் விண்ணப்பதாரர்கள், தங்களின் சுயவிவரப் படிவம் (Resume), கல்வி மற்றும் பணி அனுபவச் சான்றிதழ்கள், பாஸ்போர்ட் நகல் மற்றும் சமீபத்திய புகைப்படங்களை ovemclnm@gmail.com என்ற மின்னஞ்சல் முகவரிக்கு வருகிற அக்டோபர் 11, 2026 ஆம் தேதிக்குள் அனுப்பி வைக்க வேண்டும்.
மேலும் விவரங்களுக்கு, www.omcmanpower.tn.gov.in என்ற இணையதளத்தைப் பார்வையிடலாம் அல்லது 044-22502267 என்ற தொலைபேசி எண்ணில் தொடர்பு கொள்ளலாம். வாட்ஸ்அப் மூலம் தொடர்பு கொள்ள 9566239685 என்ற எண்ணையும் பயன்படுத்தலாம். விசா கிடைத்த பின்னரே சேவைக்கட்டணமாக ரூ.35,400 செலுத்த வேண்டும் என்றும் தெரிவிக்கப்பட்டுள்ளது.
