பிரபல விஜய் தொலைக்காட்சி நகைச்சுவை நடிகர் நாஞ்சில் விஜயன் மீது பண மோசடி குற்றச்சாட்டு எழுந்துள்ளது. டிக்டாக் பிரபலம் சூர்யா தேவி, நாஞ்சில் விஜயன் தன்னை ஏமாற்றிவிட்டதாக காவல் ஆணையர் அலுவலகத்தில் புகார் அளித்துள்ளார். இந்நிலையில், இதற்கு பதிலளிக்கும் விதமாக நாஞ்சில் விஜயன் வீடியோ ஒன்றை வெளியிட்டு, 'என் அம்மா மீது சத்தியமாக நான் பணம் வாங்கவில்லை' என்று விளக்கம் அளித்துள்ளார்.
சூர்யா தேவி அளித்த புகாரில், கடந்த 2019 நவம்பரில் தனது தங்கையின் திருமண செலவுக்காக 2 லட்சத்து 10 ஆயிரம் ரூபாயை நாஞ்சில் விஜயன் கடனாக வாங்கியதாகவும், மூன்று மாதங்களுக்குள் திருப்பித் தருவதாக கூறியதாகவும் தெரிவித்துள்ளார். ஆனால், பணத்தை திருப்பித் தராமல் காலம் தாழ்த்தி வந்ததாகவும், கொரோனா காலத்திற்கு பிறகும் பலமுறை கேட்டும் பணத்தை வழங்கவில்லை என்றும் கூறியுள்ளார். கடந்த 2025 ஆகஸ்ட் மாதம் பணத்தை கேட்டபோது, 2026 மே 22 அன்று மதுரையில் நடக்கும் ஒரு நிகழ்ச்சியில் சந்திப்பதாக கூறி, நேரில் சென்ற தன்னை அவமதித்து, தாக்கியதாகவும், இது தொடர்பாக வீடியோ ஆதாரங்கள் இருப்பதாகவும் சூர்யா தேவி தனது புகாரில் குறிப்பிட்டுள்ளார்.
இதற்கிடையில், விஜே வைஷு என்பவர் நாஞ்சில் விஜயன் தன்னை காதலித்து ஏமாற்றிவிட்டதாக புகார் அளித்திருந்தார். அந்த புகாரில், நாஞ்சில் விஜயன் தன்னை காதலித்து ஏமாற்றியதாகவும், தன்னை கஞ்சா வியாபாரி என கூறியதாகவும் வைஷு குற்றம் சாட்டியுள்ளார். மேலும், நாஞ்சில் விஜயன் சூர்யா தேவியிடமும் பணம் வாங்கி ஏமாற்றியிருக்கலாம் என்றும், முதல்வர் மற்றும் கமிஷனர் அதிகாரிகள் தலையிட்டு பணத்தை மீட்டுத்தர வேண்டும் என்றும் வைஷு கோரிக்கை விடுத்துள்ளார். 16 வருட பழக்கம் மற்றும் 7 வருட குடும்ப வாழ்க்கை அனுபவத்தில் நாஞ்சில் விஜயன் மீடியா முன்பு நல்லவர் போல் நடிப்பதாகவும், ஆனால் ஒரு திருநங்கையாக சினிமாவில் கஷ்டப்பட்டு வளர்ந்து வரும் தன்னை கஞ்சா வியாபாரி என கூறியதுடன், மிரட்டுவதாகவும் வைஷு தனது ஆதங்கத்தை வெளிப்படுத்தியுள்ளார்.
இந்நிலையில், சூர்யா தேவி மற்றும் விஜே வைஷு ஆகியோரின் புகார்களுக்கு பதிலளிக்கும் விதமாக நாஞ்சில் விஜயன் ஒரு வீடியோவை வெளியிட்டுள்ளார். அதில், 'என் குழந்தை மீது, என் அம்மா மீது சத்தியமாக சொல்கிறேன், நான் பணம் வாங்கவில்லை' என்று கண்ணீர் மல்க விளக்கம் அளித்துள்ளார். இந்த விவகாரம் தற்போது பரபரப்பை ஏற்படுத்தியுள்ளது.
