தமிழக பாஜக தலைவர் நயினார் நாகேந்திரன், தமிழ்நாடு மின்சாரத் துறைக்கு 'மின்தடை மற்றும் மெழுகுவர்த்தித் துறை' எனப் பெயர் மாற்றிவிடலாம் என விமர்சித்துள்ளார். மதுரை மீனாட்சி அம்மன் கோவிலில் அடுத்தடுத்து ஏற்பட்ட மின்தடை சம்பவங்கள், தற்போதைய ஆட்சியின் கீழ் மின்சாரத் துறை செயலிழந்துவிட்டதை வெளிச்சம் போட்டுக் காட்டுவதாக அவர் குறிப்பிட்டுள்ளார்.
சமீபத்தில், முன்னாள் முதல்-அமைச்சர் எடப்பாடி பழனிசாமி கோவிலுக்கு வருகை தந்தபோது மின்தடை ஏற்பட்டது. இதைத் தொடர்ந்து, இந்தியக் குடியரசுத் துணைத்தலைவர் சி. பி. ராதாகிருஷ்ணன் செய்தியாளர்களைச் சந்தித்தபோதும் இரண்டு முறை மின்சாரம் துண்டிக்கப்பட்டது. உலகப் புகழ்பெற்ற கோவிலில், முக்கியத் தலைவர்களின் வருகையின் போது கூட தடையில்லா மின்சாரத்தை வழங்க முடியாத 'ஜோசப் விஜய்' தலைமையிலான அரசு, சாதாரண மக்களை எப்படிப் பாதுகாக்கும் என நயினார் நாகேந்திரன் கேள்வி எழுப்பியுள்ளார்.
தற்போதைய மின்சாரத் துறை அமைச்சர் நிர்மல் குமாரின் செயல்பாடுகள், மக்கள் மத்தியில் கேலிக்குள்ளாகும் அளவுக்கு உள்ளதாகவும், தமிழ்நாடு மின்சாரத் துறைக்கு 'மின்தடை மற்றும் மெழுகுவர்த்தித் துறை' எனப் பெயர் மாற்றுவதே பொருத்தமாக இருக்கும் என்றும் அவர் தனது எக்ஸ் தளப் பதிவில் தெரிவித்துள்ளார்.
சமீபத்தில் அவசர கதியில் மேற்கொள்ளப்பட்ட மின்சாரக் கொள்முதல் ஒப்பந்தங்களில் வெளிப்படைத்தன்மை இல்லை என்றும், நிர்வாகத் தோல்விகள் மற்றும் கொள்முதல் குளறுபடிகள் காரணமாகவே தமிழகம் முழுவதும் அறிவிக்கப்படாத மின்தடைகள் ஏற்படுவதாகவும் அவர் குற்றம் சாட்டியுள்ளார்.
மதுரை மீனாட்சி அம்மன் கோவில் போன்ற வரலாற்று முக்கியத்துவம் வாய்ந்த இடங்களில் உடனடியாக அதிநவீன தானியங்கி ஜெனரேட்டர் (Automatic Power Backup) வசதிகளை ஏற்படுத்த வேண்டும் என்றும், இதுபோன்ற சம்பவங்கள் மீண்டும் நிகழாமல் இருப்பதை உறுதி செய்ய வேண்டும் என்றும் நயினார் நாகேந்திரன் வலியுறுத்தியுள்ளார்.
மேலும், ஆன்மிகத் தலங்களின் கண்ணியத்தையும், தலைவர்களின் பாதுகாப்பையும் கேலிக்கூத்தாக்கியுள்ள 'தவெக' அரசும், மின்சாரத் துறை அமைச்சர் நிர்மல்குமாரும் பொதுமக்களிடம் பகிரங்க மன்னிப்புக் கேட்க வேண்டும் என்றும் அவர் கோரிக்கை விடுத்துள்ளார். இந்த சம்பவங்கள், மின்சார விநியோகத்தில் உள்ள தீவிரமான பிரச்சனைகளையும், அரசின் திறமையின்மையையும் சுட்டிக்காட்டுவதாக அமைந்துள்ளது.
