பாகிஸ்தான் கிரிக்கெட் அணியின் முன்னாள் வேகப்பந்து வீச்சாளரான முகமது அமீர், பிரிட்டிஷ் குடியுரிமை பெற்ற பிறகு, 2027 முதல் நடைபெறவுள்ள பாகிஸ்தான் சூப்பர் லீக் (பிஎஸ்எல்) தொடரில் வெளிநாட்டு வீரராக விளையாட ஒப்புக்கொண்டுள்ளார். இருப்பினும், இந்தியன் பிரீமியர் லீக் (ஐபிஎல்) தொடரில் பங்கேற்பது குறித்து அவர் எந்த முடிவும் எடுக்கவில்லை எனத் தெரிவித்துள்ளார்.
தற்போது இங்கிலாந்தில் நடைபெற்று வரும் 'தி ஹண்ட்ரட்' தொடரில் டிரெண்ட் ராக்கெட்ஸ் அணிக்காக உள்ளூர் வீரராக விளையாடி வரும் அமீர், தனது புதிய குடியுரிமையால் டி20 கிரிக்கெட்டில் தனது நிலை மாறியுள்ளதாகக் கூறியுள்ளார். பிஎஸ்எல் 2027 தொடரில் வெளிநாட்டு வீரராக விளையாடுவீர்களா என்ற கேள்விக்கு, 'ஆம், நான் ஒரு வெளிநாட்டு வீரராக விளையாடுவேன்' என்று அவர் பதிலளித்துள்ளார். ஐபிஎல் வாய்ப்புகள் குறித்து கேட்டபோது, 'அதுபற்றி எனக்கு எதுவும் தெரியாது' என்று சுருக்கமாகக் கூறினார்.
34 வயதான முகமது அமீர், தனது மனைவி நர்ஜிஸ் கான் மூலம் பிரிட்டிஷ் குடியுரிமையைப் பெற்றுள்ளார். இதன் மூலம் இங்கிலாந்தில் உள்ளூர் வீரராக விளையாடும் தகுதியை அவர் பெற்றுள்ளார். எனினும், ஐபிஎல் தொடரில் விளையாடுவது அவருக்கு அவ்வளவு எளிதான காரியம் அல்ல. வெறும் பிரிட்டிஷ் குடியுரிமை மட்டும் ஐபிஎல் போட்டிகளில் விளையாடுவதை உறுதி செய்துவிடாது.
ஐபிஎல் தொடரில் பாகிஸ்தான் வீரர்களுக்கு அதிகாரப்பூர்வ தடை இல்லை என்றாலும், மறைமுகத் தடைகள் நீடிக்கின்றன. இதனால், பிரிட்டிஷ் குடியுரிமை மூலம் வேறு நாட்டு வீரராகப் பதிவு செய்தாலும், தேவையற்ற விமர்சனங்களைத் தவிர்க்க ஐபிஎல் அணிகள் அவரை ஏலத்தில் எடுக்கத் தயங்கலாம். மேலும், தற்போதைய போட்டி நிறைந்த சூழலில், சர்வதேச கிரிக்கெட்டிலிருந்து ஓய்வு பெற்ற ஒரு வேகப்பந்து வீச்சாளரை ஏலத்தில் எடுக்க அணிகள் ஆர்வம் காட்டுவது கடினம்.
முகமது அமீர் சமீபத்தில் நாட்டிங்ஹாம்ஷையர் அணிக்காக டி20 பிளாஸ்ட் தொடரிலும், தற்போது டிரெண்ட் ராக்கெட்ஸ் அணிக்காக 'தி ஹண்ட்ரட்' தொடரிலும் விளையாடி வருகிறார். இந்த இரண்டு தொடர்களிலும் அவர் உள்ளூர் வீரராகவே களம் இறங்கியுள்ளார். இதன் மூலம் இங்கிலாந்து உள்நாட்டுப் போட்டிகளில் வெளிநாட்டு வீரருக்கான இடத்தைப் பிடிக்க வேண்டிய அவசியம் அவருக்கு இல்லை.
2024 டி20 உலகக் கோப்பைக்குப் பிறகு சர்வதேச கிரிக்கெட்டிலிருந்து ஓய்வு பெற்ற முகமது அமீர், பாகிஸ்தான் அணிக்காக 36 டெஸ்ட், 61 ஒருநாள் மற்றும் 62 டி20 போட்டிகளில் விளையாடியுள்ளார். சர்வதேச போட்டிகளில் இருந்து விலகிய போதிலும், உலகளாவிய டி20 லீக் தொடர்களில் இந்த இடதுகை வேகப்பந்து வீச்சாளருக்கு இன்னும் நல்ல வரவேற்பு உள்ளது குறிப்பிடத்தக்கது.
