சமூக வலைத்தளத்தில் தனது தங்கையின் கண் அறுவை சிகிச்சைக்காக நிதி உதவி கேட்டுப் பதிவிட்ட 16 வயது சிறுவன், போலியான மருத்துவ ஆவணங்களைக் காட்டி சுமார் ரூ.1.5 லட்சத்தை மோசடி செய்த சம்பவம் பெரும் அதிர்ச்சியை ஏற்படுத்தியுள்ளது. டெல்லியைச் சேர்ந்த ஜெய்சிங் ரத்தோட் என்ற சிறுவன், எக்ஸ் (X) தளத்தில் தனது 12 வயது தங்கைக்கு கண் அழுத்தம் மற்றும் விழித்திரை இரத்தப்போக்கு பாதிப்பு உள்ளதாகவும், அவசர அறுவை சிகிச்சை செய்யாவிட்டால் பார்வை இழப்பு ஏற்படும் என்றும் உருக்கமாகப் பதிவிட்டிருந்தார்.
தனது தங்கையின் சிகிச்சைக்காக ஏற்கனவே ரூ.2.5 லட்சம் செலவழித்ததாகவும், மேலும் ரூ.1.2 லட்சம் தேவைப்படுவதாகவும் குறிப்பிட்டிருந்தான். நல்மனம் படைத்தவர்கள் தங்களால் இயன்ற தொகையை உதவ வேண்டும் என அவன் உருக்கமாகக் கேட்டுக் கொண்டான். இந்த உருக்கமான பதிவைக் கண்டு நெகிழ்ந்த இணையவாசிகள், அடுத்த 24 மணி நேரத்திற்குள் சுமார் ரூ.1,58,282 நிதியைத் திரட்டி அவனுக்கு அனுப்பி வைத்தனர்.
தேவைக்கு அதிகமான நிதி திரண்டுவிட்டதாகக் கூறி, சிறுவன் அந்தப் பதிவை உடனடியாக நீக்கிவிட்டு, பணப் பரிவர்த்தனை விவரங்களையும் அழித்துவிட்டான். ஆனால், சில மணி நேரங்களிலேயே இந்த மோசடி அம்பலமானது. டெல்லியில் உள்ள 'ஷ்ராஃப் கண் மையம்' தனது அதிகாரப்பூர்வ இன்ஸ்டாகிராம் பக்கத்தில் ஒரு அவசர எச்சரிக்கையை வெளியிட்டது.
தங்கள் மருத்துவமனையின் லெட்டர் பேட் மற்றும் முத்திரையைப் பயன்படுத்தி, போலியான நோயாளி விவரங்கள், மருந்துச் சீட்டுகள் மற்றும் மருத்துவக் கட்டண மதிப்பீடுகளைத் தயாரித்து சிலர் பணமோசடியில் ஈடுபடுவதாக மருத்துவமனை நிர்வாகம் தெரிவித்தது. பொதுமக்கள் இதுபோன்ற போலி கோரிக்கைகளை நம்பி ஏமாற வேண்டாம் என்றும் அவர்கள் எச்சரித்தனர்.
மருத்துவமனையின் இந்த அறிவிப்பு வெளியானதும், நிதி அளித்தவர்கள் பெரும் அதிர்ச்சி அடைந்தனர். சிலர் மருத்துவமனையைத் தொடர்புகொண்டு விசாரித்தபோது, சிறுவனின் தங்கை அங்கு சிகிச்சை பெறவில்லை என்பது உறுதியானது. இந்தச் சந்தேகம் வலுத்ததைத் தொடர்ந்து, எக்ஸ் ஸ்பேஸஸ் நேரலையில் வந்து விளக்கமளிக்க முயன்ற சிறுவன், முன்னுக்குப் பின் முரண்பாடான பதில்களைக் கூறி அனைவரையும் மேலும் குழப்பமடையச் செய்தான்.
முதலில் தங்கையின் சிகிச்சைக்காகவே பணம் கேட்டதாகக் கூறியவன், பின்னர் தனது தந்தையின் உடல்நிலை சரியில்லாததால்தான் இவ்வாறு செய்ய நேர்ந்ததாகவும், தான் செய்தது தவறுதான் என்றும் ஒப்புக்கொண்டான். இருப்பினும், தான் தனிப்பட்ட சொகுசுக்காகப் பணத்தைப் பயன்படுத்தவில்லை என்றும், குடும்பத்தின் நிதி நெருக்கடி உண்மை என்றும் அவன் வாதிட்டான்.
இதையடுத்து, நிதி வழங்கிய பலர் தங்களது பணத்தைத் திரும்பத் தருமாறு கோரிக்கை விடுத்துள்ளனர். பணத்தைத் திரும்பச் செலுத்தியதற்கான சில ஸ்கிரீன்ஷாட்கள் இணையத்தில் பகிரப்பட்டு வருகின்றன. இந்தச் சம்பவம், உண்மையிலேயே உதவி தேவைப்படும் நபர்களுக்கு உதவ முன்வரும் நல்லுள்ளங்களின் நம்பிக்கையைச் சிதைப்பதாக சமூக ஆர்வலர்கள் கவலை தெரிவித்துள்ளனர்.
