தமிழக பா.ஜ.க. தலைவர் நயினார் நாகேந்திரன், நிதியமைச்சர் மரிய வில்சன் மீது லஞ்ச ஒழிப்பு போலீசார் வழக்குப்பதிவு செய்து விசாரிக்க வேண்டும் என வலியுறுத்தியுள்ளார். திமுக ஆட்சியில் பள்ளிக்கல்வித் துறை அமைச்சராக இருந்தவர் மகேஷ். அவருக்கு லஞ்சம் கொடுத்ததாக, தற்போதைய நிதியமைச்சர் மரிய வில்சன் சட்டசபையிலேயே பகிரங்கமாக ஒப்புக்கொண்டதாக நயினார் நாகேந்திரன் தனது அறிக்கையில் குறிப்பிட்டுள்ளார்.
முன்னாள் கல்வி அமைச்சர் மீதும் சட்டரீதியான நடவடிக்கை எடுக்கப்பட வேண்டும் என்றும் அவர் கோரியுள்ளார். லஞ்சம் கேட்டவர் மீது புகார் அளிக்காமல், சட்டசபையில் கூறி விளம்பரம் தேட வேண்டிய அவசியம் என்ன என்று கேள்வி எழுப்பியுள்ளார். மேலும், லஞ்சம் கொடுத்து குறுக்கு வழியில் அனுமதி வாங்கும் வகையில், மரிய வில்சனின் கல்வி நிறுவனத்தின் சட்டரீதியான குறைபாடுகள் என்ன என்றும் அவர் வினவியுள்ளார்.
தனிப்பட்ட நலனுக்காக லஞ்சம் கொடுத்து காரியத்தை முடிக்கும் குணம் கொண்டவராக மரிய வில்சன் இருக்கிறார் என்றும், அவரை அமைச்சர் பதவியில் அமர்த்தினால் அரசு இயந்திரம் எப்படி நேர்மையாக இயங்கும் என்றும் நயினார் நாகேந்திரன் சந்தேகம் எழுப்பியுள்ளார். அரசு ஊழியருக்கு லஞ்சம் கொடுத்த அமைச்சர் மரிய வில்சன் மீது, ஊழல் தடுப்பு மற்றும் லஞ்சம் கொடுத்தது உள்ளிட்ட பிரிவுகளில் வழக்குப்பதிவு செய்ய வேண்டும் என்றும் அவர் வலியுறுத்தியுள்ளார்.
விசாரணை முடியும் வரை, மரிய வில்சனை அமைச்சர் பதவியில் இருந்து நீக்க வேண்டும் என்றும் நயினார் நாகேந்திரன் தனது அறிக்கையில் கேட்டுக்கொண்டுள்ளார். இந்த விவகாரம் தமிழக அரசியலில் பெரும் விவாதத்தை ஏற்படுத்தியுள்ளது.
