சென்னை மாநகராட்சி மாமன்றக் கூட்டத்தில், தமிழக வெற்றி கழக (தவெக) அரசின் 4 மாத கால ஆட்சியை மேயர் பிரியா கடுமையாக விமர்சித்துள்ளார். மாநிலத்தின் தற்போதைய அரசியல் மற்றும் நிர்வாகச் சூழல் குறித்து காரசாரமான குற்றச்சாட்டுகளை அவர் முன்வைத்தார்.
தவெக ஆட்சி பொறுப்பேற்றதில் இருந்து மாநிலம் முழுவதும் சட்டம் ஒழுங்கு சீர்குலைந்துள்ளதாக மேயர் பிரியா குற்றம்சாட்டினார். தொடரும் மின்வெட்டு, மின் கட்டண உயர்வு, மற்றும் ஆவின் பால் தட்டுப்பாடு ஆகியவற்றால் பொதுமக்கள் அன்றாடம் கடுமையான சிரமங்களை எதிர்கொண்டு வருவதைச் சுட்டிக்காட்டினார். மக்கள் நலன் சார்ந்த அடிப்படைப் பிரச்சினைகளில் அரசு கவனம் செலுத்தாமல் அலட்சியம் காட்டுவதாகவும் அவர் மாமன்றக் கூட்டத்தில் தெரிவித்தார்.
சென்னை மேயர் பிரியா தனது உரையில், தவெக ஆட்சிக்கு வந்த இந்த 4 மாதங்களில் மாநிலம் முழுவதும் ஏகப்பட்ட பிரச்சினைகள் தலைதூக்கியுள்ளதாகக் கூறினார். குற்றச் சம்பவங்கள், கொலைகள், பாலியல் வன்கொடுமைகள், சட்டம் ஒழுங்கு சீர்கேடுகள், ஏழை எளிய மக்கள் பாதிப்பு, விலைவாசி உயர்வு, ஆவின் பால் தட்டுப்பாடு எனப் பல பிரச்சனைகள் ஏற்படுவதாக அவர் குறிப்பிட்டார்.
குறிப்பாக, மின்வெட்டுப் பிரச்சினைகள் வீடுகளையும், கடைகளையும் பாதிப்பதாகவும், சிறு, குறு தொழில்கள் முடங்கியுள்ளதாகவும் அவர் தெரிவித்தார். மாணவர்கள் விளக்கு வெளிச்சத்தில் படிக்க வேண்டிய அவல நிலை காணப்படுவதாகவும், இது குறித்து அமைச்சர்களிடம் கேட்டால், 'காற்று அடிக்கவில்லை, மழை பெய்யவில்லை' என்பது போன்ற பதில்கள் வருவதாகவும் அவர் குற்றம்சாட்டினார். இதுபோன்ற காரணங்களால் தமிழகம் வளர்ச்சியில் பின்னுக்குத் தள்ளப்பட்டுள்ளதாக மேயர் பிரியா வருத்தம் தெரிவித்தார்.
சென்னை மாநகர வளர்ச்சிக்கு முக்கியத்துவம் வாய்ந்த பரந்தூர் விமான நிலையத் திட்டத்தைக் கைவிட்டுள்ளதை மேயர் பிரியா விமர்சித்தார். 'இருப்பதை விட்டுவிட்டு பறப்பதற்கு ஆசைப்பட்டால், இருப்பதும் போய்விடும்' என்ற பழமொழியைச் சுட்டிக்காட்டி, சென்னை விமான நிலையத்தை தனியாருக்கு தாரை வார்க்க மத்திய அரசுக்கு தமிழக அரசு கடிதம் எழுதியுள்ளதையும் அவர் கண்டனம் தெரிவித்தார். இதுபோன்ற எண்ணற்ற நடவடிக்கைகளை தவெக அரசு தமிழகத்திற்கு எதிராக மேற்கொண்டு வருவதாகவும், இது மிகவும் கண்டிக்கத்தக்கது என்றும் அவர் கூறினார்.
தற்போதைய தவெக அரசின் செயல்பாடுகள் குறித்து தனியார் தொலைக்காட்சியில் நிகழ்ச்சி தொகுத்து வழங்கும் நடிகர் ஒருவரின் கருத்தை மேயர் பிரியா மேற்கோள் காட்டினார். அவர் குறிப்பிட்டதாவது, 'தலைவர் என்றால் என்னவென்றே தெரியாமல் தலைமையின் பொறுப்பை உணராமல் வாக்குறுதியை அள்ளி கொடுத்து விட்டு, பிரச்சினைகள் வரும் போது எதிரணியின் மீது பழியை போடுவது தலைமை பண்பிற்கான தகுதி கிடையாது. அது ஏமாற்று வேலை' என்று தெரிவித்தார். இதுதான் இன்றைய உண்மை நிலையும் கூட என்றும் அவர் கூறினார்.
இதற்கு மாறாக, திராவிட முன்னேற்றக் கழகம் எந்த காலத்திலும், எந்த சூழ்நிலையிலும், எந்த இடத்தில் இருந்தாலும் கொள்கையில் உறுதியாக நிற்கும் என்றும், தொடர்ந்து போராடி தமிழகத்தை இந்தியாவின் முதன்மை மாநிலமாக மாற்றியுள்ளனர் என்றும் மேயர் பிரியா குறிப்பிட்டார். திமுகவின் தேவை தமிழகத்திற்கு எப்போதும் தேவை என்றும் அவர் வலியுறுத்தினார். அதாவது, பிக் பாஸ் நிகழ்ச்சியில் நடிகர் விஜய் சேதுபதி பேசியதை சென்னை மாநகராட்சி மாமன்ற கூட்டத்தில் சுட்டிக் காட்டியுள்ளார்.
ஆட்சி கட்டிலில் இல்லாத போது சிறப்பான எதிர்க்கட்சியாக திமுக செயல்படும் என்பது பொதுவான கருத்து. ஆனால் தற்போதைய அரசியல் சூழல் என்பது கொள்கை ரீதியான விமர்சனங்கள், மக்கள் பிரச்சினைகள், உரிமைகள் சார்ந்த மோதல்கள் என்ற நிலையை தாண்டி தனிமனித தாக்குதல்களாக மாறிவிட்டன. இந்த விஷயத்தில் அனைத்து தரப்பினரும் சற்று கவனமாக செயல்பட வேண்டியது அவசியம் என அரசியல் விமர்சகர்கள் கருத்து தெரிவித்துள்ளனர்.
