மகாராஷ்டிராவின் பால்கர் மாவட்டத்தில் உள்ள நலசோபாராவில் 'இம்பீரியல் ஹைட்ஸ்' என்ற 14 மாடி குடியிருப்பு கட்டிடத்தில் நேற்று நள்ளிரவில் ஏற்பட்ட பயங்கர தீ விபத்தில் ஃபல்குனி ஷா (50) மற்றும் அஸ்வினி பார்க்கர் (50) ஆகிய இரு பெண்கள் பரிதாபமாக உயிரிழந்தனர். அதிக புகையை சுவாசித்ததால் ஏற்பட்ட மூச்சுத்திணறலே இவர்களின் மரணத்திற்கு முதற்கட்ட தகவலின்படி காரணமாக கூறப்படுகிறது.
செவ்வாய்க்கிழமை இரவு சுமார் 11.30 மணியளவில், நலாசோபரா-வசை லிங்க் ரோட்டில் அமைந்துள்ள 'இம்பீரியல் ஹைட்ஸ்' பல அடுக்குமாடி குடியிருப்பின் மேல் தளங்களில் தீ மளமளவென பரவியது. இதனால் கட்டிடத்தில் வசித்தவர்கள் அலறியடித்துக்கொண்டு வெளியேற முயன்றனர். இந்த துயர சம்பவத்தில், இரு பெண்கள் அதிக புகையை சுவாசித்ததால் மூச்சுத்திணறல் ஏற்பட்டு உயிரிழந்தனர். மேலும், 6 பேர் காயமடைந்து மருத்துவமனையில் அனுமதிக்கப்பட்டுள்ளனர்.
தகவல் அறிந்ததும், வசை-விரார் மாநகராட்சி தீயணைப்புத் துறையினர், காவல்துறை மற்றும் நிர்வாக அதிகாரிகள் உடனடியாக சம்பவ இடத்திற்கு விரைந்தனர். டர்ன்டேபிள் ஏணி இயந்திரங்கள் மற்றும் சிறப்பு உபகரணங்களின் உதவியுடன், கட்டிடத்தின் மேல் தளங்களில் சிக்கியிருந்த சுமார் 25 முதல் 30 பேர் வரை தீயணைப்பு வீரர்களால் பத்திரமாக மீட்கப்பட்டனர்.
உயிரிழந்த இரு பெண்களும் ஃபல்குனி ஷா (50) மற்றும் அஸ்வினி பார்கர் (50) என அடையாளம் காணப்பட்டுள்ளனர். அவர்களுக்கு தீக்காயங்கள் ஏற்பட்டதை விட, அடர்ந்த புகையை சுவாசித்ததால் ஏற்பட்ட மூச்சுத்திணறலே மரணத்திற்கு முக்கிய காரணம் என முதற்கட்ட விசாரணையில் தெரியவந்துள்ளது. இந்த விபத்து பெரும் சோகத்தை ஏற்படுத்தியுள்ளது.
பாதிக்கப்பட்ட குடும்பத்தினர் தங்குவதற்கு ஏதுவாக, அருகிலுள்ள திருமண மண்டபங்கள் மற்றும் ஹோட்டல்களில் தற்காலிக ஏற்பாடுகள் செய்யப்பட்டுள்ளதாக வசை-விரார் மாநகராட்சி ஆணையர் பிரித்விராஜ் பி.பி தெரிவித்துள்ளார். இது குறித்து அவர் மேலும் கூறுகையில், கட்டிடத்தின் தீ பாதுகாப்பு அனுமதிகள், தீயணைப்பு சாதனங்களின் நிலை, மற்றும் மின்சாரப் பலகையில் ஏற்பட்ட ஷார்ட் சர்க்யூட் காரணமாக தீ விபத்து ஏற்பட்டதா என்பது குறித்து விரிவான விசாரணை நடத்தப்படும் என்றும், இதில் ஏதேனும் அலட்சியம் கண்டறியப்பட்டால் கடும் நடவடிக்கை எடுக்கப்படும் என்றும் எச்சரித்துள்ளார்.
கட்டிடம் முழுவதும் தீ பரவியிருந்தாலும், குறிப்பாக 13 மற்றும் 14-வது தளங்களில் தீயின் தாக்கம் மிகக் கடுமையாக இருந்ததாக தலைமை தீயணைப்பு அதிகாரி ரோஹன் மோரே தெரிவித்தார். மேலும், 3, 9 மற்றும் 12-வது தஞ்சமடையும் தளங்களிலும் (Refuge Floor) தீப்பற்றிக் கொண்டது குறிப்பிடத்தக்கது.
இந்த துயர சம்பவத்தை நேரில் பார்வையிட்ட வசை-விரார் மேயர் அஜீவ் பாட்டீல், எம்.எல்.ஏ சினேகா துபே பண்டிட் மற்றும் காவல்துறை உயர் அதிகாரிகள், மீட்புப் பணிகளைத் தீவிரமாக கண்காணித்தனர். இந்த தீ விபத்துக்கான காரணம் குறித்து விரிவான விசாரணை நடைபெற்று வருகிறது.
