தமிழக அரசியலில் பெரும் பரபரப்பை ஏற்படுத்தியுள்ள கரூர் கூட்ட நெரிசல் விவகாரம் தொடர்பாக மத்திய புலனாய்வு அமைப்பான சிபிஐ மீண்டும் விசாரணையைத் தொடங்கியுள்ளது. 2025 ஆம் ஆண்டு செப்டம்பர் மாதம் தமிழக வெற்றிக் கழகம் (TVK) தலைவர் விஜய் பங்கேற்ற தேர்தல் பிரச்சாரக் கூட்டத்தின் போது ஏற்பட்ட கூட்ட நெரிசலில் சிக்கி 41 பேர் பரிதாபமாக உயிரிழந்தனர். இந்த துயரச் சம்பவமான 'கரூர் துயரம்' வழக்கு சிபிஐ விசாரணைக்கு மாற்றப்பட்டிருந்தது.
தற்போது சிபிஐ அதிகாரிகள் இந்த வழக்கின் கோப்புகளை மீண்டும் கையில் எடுத்து, முதற்கட்ட விசாரணைகளை கரூர் தாந்தோன்றிமலை அருகே அமைக்கப்பட்டுள்ள தற்காலிக சிபிஐ அலுவலகத்தில் விறுவிறுப்பாக நடத்தி வருகின்றனர். இந்த விசாரணையின் அடுத்தகட்டமாக, சம்பவம் நடந்த அன்று பாதுகாப்புப் பணியில் ஈடுபட்டிருந்த காவல் துறையினரை சிபிஐ குறிவைத்துள்ளது.
இதன் அடிப்படையில், அன்றைய தினம் பணியில் இருந்த காவல் ஆய்வாளர் சையது அலி உட்பட 10 காவலர்களுக்கு விசாரணைக்கு ஆஜராக சிபிஐ சம்மன் அனுப்பியுள்ளது. இந்த சம்மனைத் தொடர்ந்து, காவல் ஆய்வாளர் சையது அலி மற்றும் அவருடன் பணியாற்றிய சில காவலர்கள் கரூர் தாந்தோன்றிமலை தற்காலிக சிபிஐ அலுவலகத்தில் விசாரணைக்காக நேரில் ஆஜராகியுள்ளனர்.
இந்த விசாரணை மேலும் தீவிரமடையும் பட்சத்தில், அடுத்தடுத்த கட்டங்களில் மேலும் பல முக்கியப் புள்ளிகளுக்கு சிபிஐ சம்மன் அனுப்பப்படலாம் என எதிர்பார்க்கப்படுகிறது. இதனால் அரசியல் மற்றும் காவல் துறை வட்டாரத்தில் பெரும் பரபரப்பு நிலவி வருகிறது.
