தாராபுரம் சட்டமன்றத் தொகுதியில் நடைபெறும் இடைத்தேர்தல் பிரச்சாரத்தின் போது, திமுக துணைப் பொதுச்செயலாளர் கனிமொழி எம்.பி. ஆளும் தமாகா கட்சியையும், அதன் தலைவரும் முதல்வருமான விஜய் அவர்களையும் கடுமையாக விமர்சித்தார்.
"தாராபுரம் இடைத்தேர்தல் நடைபெறுவதற்குக் காரணமே தமாகாவின் குதிரைப்பேரம் தான். முதலமைச்சர் விஜய், அதிமுகவை 'தீர்ந்துபோன சக்தி' என்று மேடைக்கு மேடை பேசிவிட்டு, தற்போது அதே அதிமுகவில் இருந்தவர்களையே தனது கட்சியில் சேர்த்து வேட்பாளர்களாக நிறுத்தியுள்ளார். இதுதான் வேட்பாளர்களைத் திருடும் தமாகாவின் லட்சணம்," என்று கனிமொழி குற்றம் சாட்டினார்.
மேலும், அதிமுகவில் வெற்றி பெற்று, மக்களுக்கு நன்றி சொல்லக்கூட நேரமின்றி ராஜினாமா செய்த சத்தியபாமா, தற்போது மீண்டும் தமாகா சார்பில் போட்டியிடுவதைச் சுட்டிக்காட்டி, "அன்று தீர்ந்துபோன சக்தி இன்று மட்டும் எப்படி 'தூய சக்தி'யாக மாறினார்? தமாகா என்பது திருட்டு சக்தி, ஊழல் சக்தி!" என அவர் கடுமையாக விமர்சித்தார்.
முதல்வர் விஜய் தனது பேச்சு ஸ்கிரிப்டை மாற்ற வேண்டும் அல்லது ஸ்கிரிப்ட் எழுதுபவரையாவது மாற்ற வேண்டும் என்றும் கனிமொழி அறிவுறுத்தினார். "காலையில் எழுந்ததில் இருந்து திமுக.. திமுக.. திமுக… எனத் தினமும் 32 முறை திமுகவைப் பற்றிப் பேசி வாக்குக் கேட்கிறார். அவர் ஆட்சிக்கு வந்த 4 மாதங்களில் 580 குற்றங்கள் நடந்துள்ளன. இதில் 200 கொலைகள், 300 பாலியல் குற்றங்கள், 8 காவல் மரணங்கள், 10 ஆணவக் கொலைகள் எனப் பல சம்பவங்கள் நடந்துள்ளன. இதுதான் நீங்கள் கொண்டு வந்த மாற்றமா?" என்று கேள்வி எழுப்பினார்.
"மக்கள் மனதில் திமுக இருப்பதால், அதையே விஜய் வாக்குக் கேட்கிறார். தாராபுரம் தேர்தலிலும் அவர் வந்து திமுக, திமுக, திமுக என்றுதான் சொல்வார். எனவே, மக்களுக்காகப் போராடும் திமுகவிற்கு வாக்களியுங்கள்!" என கனிமொழி கேட்டுக்கொண்டார்.
'தூய சக்தி' என்று சொல்லிக்கொள்ளும் தமாகா அமைச்சர்கள் மீது பல்வேறு ஊழல் புகார்கள் இருப்பதாகவும் கனிமொழி சுட்டிக்காட்டினார். "அமைச்சர் ஆனந்த் மீது சொந்தக் கட்சி நிர்வாகியே ஊழல் புகார் கொடுத்தும், அவர் மீது நடவடிக்கை எடுக்காமல் கட்சியில் இருந்து நீக்கியுள்ளார்கள். இதுதான் 'தூய சக்தி'யின் லட்சணமா? சாயப்பட்டறை உரிமையாளர்களிடம் இருந்து ரூ.10 கோடிக்கு மேல் லஞ்சம் வாங்கிய புகார் குறித்தும், செல்போனில் குழந்தைக்கு மாத்திரை கொடுத்ததாகப் பொய் சொன்ன அமைச்சர் குறித்தும் இதுவரை எந்த நடவடிக்கையும் எடுக்கப்படவில்லை," என்றார்.
முதல்வர் விஜய் மீது ஆட்சிக்கு வருவதற்கு முன்பே ஐடி ரெய்டு வழக்கு இருப்பதாகவும், எனவே தமாகா 'தூய சக்தி' என்று சொல்லிக்கொள்ள அருகதை இல்லை என்றும் கனிமொழி கூறினார். அதிமுக வேட்பாளருக்கு வாக்களித்தால், அவர் எப்போது கட்சி தாவுவார் என்று தெரியாது என்றும், ஆனால் திமுகவில் இருந்து யாரையும் விலைக்கு வாங்க முடியாது என்றும் அவர் நம்பிக்கை தெரிவித்தார்.
இடைத்தேர்தல் நடக்கும் பகுதிகளில் மட்டும் மின்வெட்டு குறைந்திருப்பதாகவும், மற்ற பகுதிகளில் மின்வெட்டு தீவிரமாக இருப்பதாகவும், இதைக் கேட்டால் பீஸ் வாங்கிவிட்டுப் போகிறார்கள் என்றும் கனிமொழி விமர்சித்தார்.
