தமிழக வெற்றிக் கழகத்தின் (தவெக) வளர்ச்சி, அதிமுக மற்றும் திமுகவின் வாக்கு வங்கியில் தாக்கத்தை ஏற்படுத்தியுள்ள நிலையில், முன்னாள் அமைச்சர் ஜெயக்குமார் தவெகவில் இணையவிருப்பதாக தகவல்கள் வெளியாகியுள்ளன. இது அதிமுகவுக்கு பெரும் பின்னடைவாக அமைந்துள்ளதுடன், எதிர்க்கட்சித் தலைவர் அந்தஸ்தை கூட பெற முடியாத சூழல் உருவாகியுள்ளது.
தேர்தலுக்குப் பிறகு அதிமுகவில் நிலவும் குழப்பங்கள் மற்றும் அதிகாரப் போட்டி, கருத்து வேறுபாடுகள் காரணமாக பல முன்னாள் அமைச்சர்கள் மற்றும் நிர்வாகிகள் தங்களது அரசியல் எதிர்காலம் குறித்து மறுபரிசீலனை செய்து வருவதாக கூறப்படுகிறது. அந்த வகையில், ஜெயக்குமாரின் பெயர் முக்கியமாகப் பேசப்படுகிறது. ஒருகாலத்தில் அதிமுகவின் முக்கிய பேச்சாளராக வலம் வந்த அவர், சமீப காலமாக அரசியல் செயல்பாடுகளில் அதிகம் ஈடுபடாமல் இருந்து வருகிறார்.
ஜெயக்குமார் விரக்தியடைந்திருக்கலாம் என்றும், இதன் காரணமாக அவர் தமிழக வெற்றிக் கழகத்தில் இணையலாமா என்பது குறித்து ஆலோசித்து வருவதாகவும் தகவல்கள் தெரிவிக்கின்றன. இது குறித்து எந்தவிதமான அதிகாரப்பூர்வ அறிவிப்பும் வெளியாகவில்லை என்றாலும், அரசியல் வட்டாரங்களில் இந்த செய்தி பரபரப்பாகப் பேசப்படுகிறது.
ஏற்கனவே சில அதிமுக நிர்வாகிகள் மாற்று அரசியல் பாதைகளை ஆராய்ந்து வரும் நிலையில், ஜெயக்குமார் போன்ற ஒரு முக்கிய பிரமுகரின் நகர்வு அரசியல் களத்தில் பெரும் தாக்கத்தை ஏற்படுத்தும் என எதிர்பார்க்கப்படுகிறது.
