கொழும்பில் நடைபெற்ற இந்தியா – இலங்கை இடையிலான 2-வது டெஸ்ட் போட்டியின் போது, இந்திய தொடக்க வீரர் யஷஸ்வி ஜெய்ஸ்வால் மற்றும் இலங்கை வேகப்பந்து வீச்சாளர் அசிதா பெர்னாண்டோ இடையே களத்தில் கடும் மோதல் வெடித்தது. இந்த சம்பவத்தின் பின்னணியில் உண்மையில் என்ன நடந்தது என்பதை இந்திய விக்கெட் கீப்பர் பேட்டர் துருவ் ஜுரல் தற்போது விளக்கி இருக்கிறார்.
இந்தப் போட்டியின் 17-வது ஓவரில் அசிதா பெர்னாண்டோ வீசிய பந்தில் யஷஸ்வி ஜெய்ஸ்வால் ஆட்டமிழந்தார். ஜெய்ஸ்வால் அமைதியாக பெவிலியன் நோக்கி நடந்து சென்றுகொண்டிருந்தபோது, அசிதா பெர்னாண்டோ தொடர்ந்து ஆபாச வார்த்தைகளால் அவரைத் திட்டியதாகக் கூறப்படுகிறது. இதனால் உச்சக்கட்ட ஆத்திரமடைந்த ஜெய்ஸ்வால், திடீரென திரும்பி வந்து பெர்னாண்டோவின் முகத்திற்கு மிக அருகில் சென்று ஆக்ரோஷமாக எச்சரித்தார்.
இருவருக்கும் இடையே கைகலப்பு ஏற்படும் சூழல் உருவானதால், இலங்கை வீரர்கள் உடனடியாகத் தலையிட்டு ஜெய்ஸ்வாலை சமாதானப்படுத்தி அனுப்பி வைத்தனர். இந்தச் சம்பவத்தில் ஜெய்ஸ்வால் மற்றும் அசிதா தலையால் முட்டிக் கொண்டதாகக் கூறப்படுகிறது. இதனால் இருவருக்கும் ஐசிசி அபராதம் விதித்தது. அப்போது யார் மீது தவறு என்பதில் ரசிகர்கள் மத்தியில் விவாதம் எழுந்த நிலையில், அதற்குப் பதில் அளித்துள்ளார் துருவ் ஜுரல்.
முன்னாள் வீரர் ஆகாஷ் சோப்ராவிடம் இதுகுறித்து பேசிய துருவ் ஜுரல், 'யஷஸ்வி ஜெய்ஸ்வால் தானாக முன்வந்து யாரிடமும் சண்டையிடும் பழக்கம் கொண்டவர் அல்ல. ஆனால், அசிதா பெர்னாண்டோ எல்லை மீறி தகாத வார்த்தைகளைப் பயன்படுத்தினார். அதனால்தான் ஜெய்ஸ்வால் ஆவேசமாகத் திரும்பி வந்து, 'என் விக்கெட்டை எடுத்ததற்கு நீ ஆக்ரோஷம் காட்டலாம்; ஆனால் என்னை தகாத வார்த்தையில் திட்ட உனக்கு எந்த உரிமையும் இல்லை' என்று காட்டமாக கூறினார். ஜெய்ஸ்வால் எப்போதும் பேட்டிங்கில் மட்டுமே கவனம் செலுத்துவார். ஆனால், தேவையின்றி சீண்டினால் 100 சதவீதம் திருப்பி அடிப்பார்' என்று தெரிவித்தார்.
களத்தில் எல்லை மீறி நடந்துகொண்டதற்காக, ஐசிசி விதி எண் 2.12-ன் கீழ் யஷஸ்வி ஜெய்ஸ்வால் மற்றும் அசிதா பெர்னாண்டோ ஆகிய இருவருக்கும் போட்டி கட்டணத்தில் இருந்து 25 சதவீதம் அபராதம் விதிக்கப்பட்டது. மேலும், இருவருக்கும் தலா 1 தகுதிக்குறைப்பு புள்ளியும் வழங்கப்பட்டது. இந்தச் சம்பவம் கிரிக்கெட் ரசிகர்கள் மத்தியில் பெரும் விவாதத்தை ஏற்படுத்தியது.
யஷஸ்வி ஜெய்ஸ்வால் தனது பேட்டிங் திறமைக்காக அறியப்பட்டவர். ஆனால், களத்தில் அவர் கோபத்தை வெளிப்படுத்தியது பலரையும் ஆச்சரியப்படுத்தியது. அசிதா பெர்னாண்டோவின் தூண்டுதலால் மட்டுமே ஜெய்ஸ்வால் அப்படி நடந்துகொண்டதாக துருவ் ஜுரல் கூறியிருப்பது, இந்த சம்பவத்தின் பின்னணியை மேலும் தெளிவுபடுத்தியுள்ளது.
இந்த மோதல் சம்பவத்திற்குப் பிறகு, இரு வீரர்களும் தங்கள் நடத்தையைக் கட்டுப்படுத்திக் கொள்ள வேண்டும் எனப் பலரும் கருத்து தெரிவித்துள்ளனர். விளையாட்டு வீரர்களின் கண்ணியத்தைக் காக்கும் வகையில் இதுபோன்ற சம்பவங்கள் மீண்டும் நிகழாமல் இருக்க வேண்டும் என்பதே அனைவரின் எதிர்பார்ப்பாகவும் உள்ளது.
