ஐபிஎல் 2026 தொடரில் ராயல் சேலஞ்சர்ஸ் பெங்களூரு அணியின் கேப்டன் ரஜத் படிதார், டி20 கிரிக்கெட் வரலாற்றில் ஒரு புதிய உலக சாதனையை படைத்துள்ளார். குஜராத் டைட்டன்ஸ் அணிக்கு எதிரான குவாலிபையர் 1 போட்டியில், ஒரு டி20 தொடரில் அதிக சிக்ஸர்களை அடித்த கேப்டன் என்ற பெருமையை அவர் தனதாக்கிக் கொண்டார்.
தரம்சாலாவில் நடைபெற்ற இந்தப் போட்டியில், குஜராத் அணியின் பந்துவீச்சை துவம்சம் செய்த படிதார், வெறும் 33 பந்துகளில் 93 ரன்களை விளாசினார். இதில் 5 பவுண்டரிகளும், 9 சிக்ஸர்களும் அடங்கும். இந்த 9 சிக்ஸர்களுடன், நடப்பு ஐபிஎல் 2026 தொடரில் அவர் அடித்த மொத்த சிக்ஸர்களின் எண்ணிக்கை 41 ஆக உயர்ந்துள்ளது. இதன் மூலம், 2023-24 சையது முஷ்டாக் அலி தொடரில் அசாம் கேப்டனாக 40 சிக்ஸர்களை அடித்த ரியான் பராக்கின் உலக சாதனையை அவர் முறியடித்துள்ளார்.
ஐபிஎல் வரலாற்றில், ஒரு சீசனில் ஒரு கேப்டன் அடித்த அதிகபட்ச சிக்ஸர்கள் என்ற சாதனையில், கடந்த 2025-ம் ஆண்டு பஞ்சாப் கிங்ஸ் கேப்டனாக ஸ்ரேயாஸ் ஐயர் 39 சிக்ஸர்களை அடித்திருந்தார். அவருக்கு அடுத்தபடியாக 2016-ல் பெங்களூரு கேப்டனாக விராட் கோலி 38 சிக்ஸர்களை அடித்திருந்தார். தற்போது படிதார் இவர்கள் அனைவரையும் விஞ்சி சர்வதேச அளவில் முதலிடம் பிடித்துள்ளார்.
இந்தப் போட்டியில் ரஜத் படிதார் சதம் அடித்திருந்தால், ஐபிஎல் பிளே-ஆப் சுற்றில் 2 சதங்கள் அடித்த உலகின் முதல் வீரர் என்ற பெருமையையும் பெற்றிருப்பார். ஏற்கனவே 2022-ம் ஆண்டு லக்னோ சூப்பர் ஜெயண்ட்ஸ் அணிக்கு எதிரான எலிமினேட்டர் போட்டியில் அவர் சதம் அடித்திருந்தார். வெறும் 7 ரன்கள் வித்தியாசத்தில் அந்த வரலாற்றுச் சாதனையை அவர் இன்று தவறவிட்டார். ரஜத் படிதாரின் இந்த அதிரடி ஆட்டத்தால் பெங்களூரு அணி 254 ரன்கள் குவித்து, குஜராத் அணிக்கு எட்ட முடியாத இலக்கை நிர்ணயித்தது.
