சமூக வலைதளங்களில் பெரும் ரசிகர் பட்டாளத்தைக் கொண்ட பிரபல இன்புளுயன்ஸர் நிதி திவாரி, தனது 30 வயதில் தற்கொலை செய்துகொண்டுள்ளார். பேஸ்புக்கில் சுமார் 9 லட்சம் ஃபாலோயர்களையும், இன்ஸ்டாகிராமில் ஏறக்குறைய 7 லட்சம் ஃபாலோயர்களையும் கொண்டு, மொத்தம் 16 லட்சம் பேரை ஈர்த்தவர் நிதி திவாரி. அவரது பதிவுகள் ஆயிரக்கணக்கானோரின் கவனத்தை ஈர்ப்பதுடன், அவரது வீடியோக்கள் மில்லியன் கணக்கான பார்வைகளைப் பெறுவது வழக்கமாக இருந்தது.
2024 ஆம் ஆண்டில் 'மிஸ் ப்ரிட்டி இந்தியா' பட்டத்தை வென்ற நிதி திவாரி, அதன் பிறகு மாடலிங் மற்றும் நடிப்புத் துறையில் தீவிரமாக ஈடுபட்டு வந்தார். சனிக்கிழமையன்று, மத்திய பிரதேசத்தில் உள்ள அவரது வீட்டில் நிதியின் உடல் தூக்கில் தொங்கிய நிலையில் கண்டெடுக்கப்பட்டது. குடும்பத்தினர் அவரை உடனடியாக மருத்துவமனைக்குக் கொண்டு சென்றனர், ஆனால் அங்கு அவர் இறந்துவிட்டதாக மருத்துவர்கள் உறுதிப்படுத்தினர்.
நிதி திவாரி மாடலிங், நடிப்பு மற்றும் திரைப்படத் துறையில் மிகுந்த ஆர்வம் கொண்டிருந்ததாக அவரது குடும்பத்தினர் தெரிவித்தனர். சனிக்கிழமை மாலை அவர் தொலைபேசியில் யாரிடமோ பேசியதாகவும், அதன் பின்னரே இந்த துயர சம்பவம் நடந்ததாகவும் அவர்கள் கூறியுள்ளனர்.
இருப்பினும், இந்த மரணம் குறித்து காவல்துறை தீவிர விசாரணை மேற்கொண்டு வருகிறது. நிதியின் மரணத்திற்கு முந்தைய தொலைபேசி அழைப்புகள் அனைத்தும் ஆராயப்பட்டு வருவதாக காவல்துறை தரப்பில் தெரிவிக்கப்பட்டுள்ளது.
விசாரணை முடியும் வரை, தற்கொலைக்கான காரணம் குறித்து எந்தவொரு முடிவிற்கும் வர வேண்டாம் என அதிகாரிகள் பொதுமக்களையும், ஊடகங்களையும் கேட்டுக்கொண்டுள்ளனர். இந்த சம்பவம் சமூக வலைதள உலகில் பெரும் அதிர்ச்சியை ஏற்படுத்தியுள்ளது.
