டெல்லியில் இருந்து சென்னை நோக்கிச் சென்ற இண்டிகோ விமானம் நடுவானில் திடீரென தீ விபத்துக்குள்ளான சம்பவம் பெரும் பரபரப்பை ஏற்படுத்தியுள்ளது. சுமார் 36,000 அடி உயரத்தில் பறந்து கொண்டிருந்தபோது, விமானத்தின் லக்கேஜ் கேபினில் இருந்து புகை வந்ததால் பயணிகள் அச்சமடைந்தனர். உடனடியாக விமானிக்கு தகவல் தெரிவிக்கப்பட்டு, ஹைதராபாத் விமான நிலையத்தில் விமானம் அவசரமாகத் தரையிறக்கப்பட்டது. இந்தச் சம்பவத்தில் அதிர்ஷ்டவசமாக யாருக்கும் காயம் ஏற்படவில்லை.
நேற்று (அக்.11) டெல்லியில் உள்ள இந்திரா காந்தி விமான நிலையத்தில் இருந்து இண்டிகோ ஏர்லைன்ஸ் நிறுவனத்திற்குச் சொந்தமான விமானம் மதியம் 1.10 மணிக்கு சென்னைக்குப் புறப்படவிருந்தது. எனினும், 20 நிமிடங்கள் தாமதமாக மதியம் 01.30 மணிக்கு விமானம் புறப்பட்டது. இந்த விமானத்தில் 174 பயணிகள் மற்றும் 6 விமான ஊழியர்கள் என மொத்தம் 180 பேர் பயணம் செய்தனர்.
விமானம் நடுவானில் சுமார் 36,000 அடி உயரத்தில் பறந்து கொண்டிருந்தபோது, பயணிகள் அமரும் இடத்திற்கு மேலே உள்ள லக்கேஜ் கேபினில் இருந்து புகை வருவதைக் கண்டு பயணிகள் அதிர்ச்சியடைந்தனர். உடனடியாக விமானப் பணிப்பெண்கள் இதுகுறித்து விமானிக்குத் தகவல் தெரிவித்தனர். அப்போது விமானம் ஹைதராபாத் அருகே வந்து கொண்டிருந்தது.
விமானி உடனடியாக ஹைதராபாத் விமான நிலையத்தின் அவசர கட்டுப்பாட்டு அறையைத் தொடர்புகொண்டு நிலைமையை விளக்கினார். அனுமதி கிடைத்ததை அடுத்து, பிற்பகல் 3 மணியளவில் விமானத்தை விமானி அவசர அவசரமாக ஹைதராபாத் விமான நிலையத்தில் தரையிறக்கினார். அதற்குள் லக்கேஜ் கேபினில் தீ பரவத் தொடங்கியதால், பயணிகள் மற்றும் விமானப் பணிப்பெண்கள் தீயணைப்பான்களைப் பயன்படுத்தி தீயை அணைக்கப் போராடினர்.
விமானம் தரையிறங்கியதும், பயணிகள் அனைவரும் உடனடியாக விமானத்திலிருந்து பத்திரமாக வெளியேற்றப்பட்டனர். பின்னர், ஹைதராபாத் விமான நிலைய தீயணைப்புத் துறையினர் விமானத்திற்குள் விரைந்து தீயை முழுமையாக அணைத்தனர். இந்த அசம்பாவிதம் காரணமாக, சென்னைக்குச் செல்லவிருந்த பயணிகள் மாற்று இண்டிகோ விமானம் மூலம் மாலை 6 மணியளவில் சென்னை விமான நிலையத்திற்கு அழைத்து வரப்பட்டனர்.
இந்த தீ விபத்துக்கான காரணம் குறித்து இண்டிகோ விமான நிறுவனத்தின் அதிகாரிகள் மற்றும் மத்திய சிவில் விமானப் போக்குவரத்துத்துறை அதிகாரிகள் தீவிர விசாரணை நடத்தி வருகின்றனர். முதற்கட்ட விசாரணையில், விமானத்தில் பயணித்த ஒருவர் தனது செல்போனுக்கு சார்ஜ் ஏற்றப் பயன்படுத்தும் பவர் பேங்கை லக்கேஜில் வைத்து கேபினில் வைத்திருந்ததாகவும், அதிலிருந்து ஏற்பட்ட மின்கசிவு காரணமாக தீ விபத்து ஏற்பட்டிருக்கலாம் எனவும் கூறப்படுகிறது. இந்த சம்பவம் விமானப் பயணிகளிடையே பெரும் அச்சத்தை ஏற்படுத்தியது.
