தொழில் தொடங்குவதற்கு உகந்த மாநிலங்கள் குறித்த தரவரிசைப் பட்டியலில், குஜராத் முதலிடத்தைப் பிடித்துள்ளது. உள்கட்டமைப்பு, திறமையான மனிதவளம், நிதி ஆரோக்கியம், சுற்றுச்சூழல் மீள்தன்மை மற்றும் ஒழுங்கு போன்ற முக்கிய காரணிகளின் அடிப்படையில் இந்த பட்டியல் தயாரிக்கப்பட்டுள்ளது. முதலீடுகளை நீண்ட காலம் ஈர்க்கும் மாநிலங்களை கண்டறியும் நோக்கில் இந்த ஆய்வு மேற்கொள்ளப்பட்டது.
குஜராத் மாநிலம் 56.6 புள்ளிகளுடன் முதலிடத்தைப் பிடித்துள்ளது. அம்மாநிலத்தின் சிறந்த துறைமுக உள்கட்டமைப்பு, தடையற்ற மின் விநியோகம், வலுவான தொழில்துறை அமைப்பு மற்றும் சாதகமான வணிகச் சூழல் ஆகியவை இதற்கு முக்கிய காரணங்களாகக் கூறப்படுகின்றன.
மஹாராஷ்டிரா 53.7 புள்ளிகளுடன் இரண்டாவது இடத்தில் உள்ளது. வலுவான நிதிச் சந்தை, தனியார் துறையின் பங்களிப்பு, புதுமைகளை ஊக்குவிக்கும் உள்கட்டமைப்புகள் ஆகியவை மஹாராஷ்டிராவின் வளர்ச்சிக்கு வலு சேர்க்கின்றன.
தமிழகம் 53.3 புள்ளிகளுடன் மூன்றாவது இடத்தைப் பிடித்துள்ளது. உற்பத்தித் துறையில் சிறந்து விளங்குவது, ஏற்றுமதியில் குறிப்பிடத்தக்க பங்களிப்பு, சிறந்த துறைமுகக் கட்டமைப்பு மற்றும் முதலீடுகளை விரைவாகச் செயல்படுத்தும் திறன் ஆகியவை தமிழகத்தின் பலங்களாகக் குறிப்பிடப்பட்டுள்ளன.
இந்த தரவரிசைப் பட்டியலில் ஒடிசா 5வது இடத்திலும், மத்தியப் பிரதேசம் 7வது இடத்திலும் உள்ளன. உத்தரப் பிரதேசம் 19வது இடத்திலும், ஜார்க்கண்ட் மற்றும் பீகார் மாநிலங்கள் முறையே 25 மற்றும் 26வது இடங்களிலும் உள்ளன.
மலை சார்ந்த மற்றும் வடகிழக்கு மாநிலங்களைப் பொறுத்தவரை, உத்தரகாண்ட் முதலிடத்தில் உள்ளது. அசாம் மற்றும் ஹிமாச்சல பிரதேசம் அடுத்தடுத்த இடங்களைப் பிடித்துள்ளன. யூனியன் பிரதேசங்களில் கோவா முன்னணியில் உள்ளது. டெல்லி மற்றும் சண்டிகர் அடுத்தடுத்த இடங்களில் உள்ளன.
இந்த தரவரிசை, மாநிலங்களின் பொருளாதார வளர்ச்சி மற்றும் தொழில் முதலீடுகளை ஈர்க்கும் திறனை மதிப்பிடுவதில் முக்கியப் பங்கு வகிக்கிறது. இது மற்ற மாநிலங்களுக்கும் ஒரு உத்வேகத்தை அளிக்கும் என எதிர்பார்க்கப்படுகிறது.
