இந்தியா மற்றும் இலங்கை அணிகளுக்கு இடையிலான 2வது டெஸ்ட் போட்டியின் இரண்டாவது இன்னிங்ஸில், இலங்கை வீரர் சோனல் தினுஷா அரைசதம் அடித்து அசத்தியுள்ளார். இதன் மூலம், ஜிம்பாப்வேயின் முன்னாள் கேப்டன் ஆண்டி பிளவரின் 26 ஆண்டுகால சாதனையை அவர் சமன் செய்துள்ளார்.
காலே சர்வதேச மைதானத்தில் நடைபெற்ற முதல் டெஸ்டில் 100 மற்றும் 84 ரன்கள் எடுத்த தினுஷா, தொடர்ந்து இரண்டாவது டெஸ்டில் 103 ரன்கள் குவித்தார். தற்போது இரண்டாவது இன்னிங்ஸிலும் அரைசதம் கடந்து, டெஸ்ட் தொடரின் நான்கு இன்னிங்ஸ்களிலும் 50-க்கும் மேல் ரன்கள் குவித்த உலகின் இரண்டாவது பேட்டர் என்ற அரிய சாதனையை அவர் படைத்துள்ளார்.
முன்னதாக, 2000ஆம் ஆண்டில் இந்தியா-ஜிம்பாப்வே இடையிலான டெஸ்ட் தொடரில், ஜிம்பாப்வேயின் ஆண்டி பிளவர் டெல்லி டெஸ்டில் 183* மற்றும் 70 ரன்களையும், நாக்பூர் டெஸ்டில் 55 மற்றும் 232* ரன்களையும் குவித்து இந்தச் சாதனையை எட்டினார்.
தற்போது சோனல் தினுஷா, காலேயில் நடைபெற்ற முதல் டெஸ்டில் 100 மற்றும் 84 ரன்களும், கொழும்பு SSC மைதானத்தில் நடைபெற்ற இரண்டாவது டெஸ்டில் 103 மற்றும் 88* ரன்களும் எடுத்து பிளவரின் சாதனையை சமன் செய்துள்ளார்.
மேலும், இரு போட்டிகள் கொண்ட டெஸ்ட் தொடரின் நான்கு இன்னிங்ஸ்களிலும் 50-க்கும் மேல் ரன்களைக் குவித்த மூன்றாவது இலங்கை பேட்டர் என்ற பெருமையையும் சோனல் தினுஷா பெற்றுள்ளார். இதற்கு முன்பு குமார் சங்கக்காரா மற்றும் திமுத் கருணாரத்ன ஆகியோர் மட்டுமே இந்தச் சாதனையைப் படைத்திருந்தனர்.
இந்தியாவிற்கு எதிரான தனது முதல் நான்கு டெஸ்ட் இன்னிங்ஸ்களிலும் 50-க்கும் மேல் ரன்கள் எடுத்த முதல் ஆசிய பேட்டர் என்ற தனித்துவமான பெருமையையும் தினுஷாவின் இந்த அரைசதம் பெற்றுத் தந்துள்ளது. இதற்கு முன்பு, இரண்டு இங்கிலாந்து மற்றும் இரண்டு வெஸ்ட் இண்டீஸ் பேட்டர்கள் மட்டுமே இந்தியாவிற்கு எதிராகத் தங்கள் முதல் நான்கு டெஸ்ட் இன்னிங்ஸ்களிலும் 50-க்கும் மேல் ரன்களைக் குவித்திருந்தனர்.
இந்தியாவிற்கு எதிரான தனது முதல் மூன்று டெஸ்ட் இன்னிங்ஸ்களிலும் 80 அல்லது அதற்கு மேற்பட்ட ரன்களை எடுத்த டெஸ்ட் வரலாற்றின் மூன்றாவது பேட்டராகவும் சோனல் தினுசா திகழ்கிறார். இதற்கு முன்பு எவர்டன் வீக்ஸ் மற்றும் ஜாகீர் அப்பாஸ் ஆகியோர் மட்டுமே இந்தச் சாதனைப் பட்டியலில் இடம் பிடித்திருந்தனர் என்பது குறிப்பிடத்தக்கது.
