இமாச்சலப் பிரதேச மாநிலம் சம்பா மாவட்டத்தில், பழங்குடியினர் வசிக்கும் பாங்கி பள்ளத்தாக்கில் கில்லர்-உதய்பூர் சாலையில் டாடா சுமோ வாகனம் ஒன்று பயணித்துக் கொண்டிருந்தது. காடு நல்லா என்ற இடத்தில் வாகனம் சென்றுகொண்டிருந்தபோது, யாரும் எதிர்பாராத விதமாக மலையின் ஒரு பெரிய பகுதி சரிந்து, அந்த டாடா சுமோவின் மீது விழுந்தது. இந்த கோர விபத்தில், டாடா சுமோ வாகனத்தில் இருந்த 13 பயணிகளும் உடல் நசுங்கி பரிதாபமாக உயிரிழந்தனர்.
சம்பவம் குறித்த தகவல் அறிந்ததும், மீட்புக் குழுவினர் உடனடியாக சம்பவ இடத்திற்கு விரைந்து அனுப்பப்பட்டனர். மீட்புப் பணிகள் தற்போது தீவிரமாக நடைபெற்று வருகின்றன. உருக்குலைந்து போன வாகனத்தில் இருந்து உடல்களை மீட்கும் பணி தொடர்ந்து நடைபெற்று வருவதாக அதிகாரிகள் தெரிவித்தனர்.
இமாச்சலப் பிரதேசத்தில் கடந்த சில நாட்களாகவே பருவமழை தீவிரமடைந்து, கனமழை பெய்து வருகிறது. இதன் காரணமாகவே இந்த துயரச் சம்பவம் நிகழ்ந்திருக்கலாம் என அஞ்சப்படுகிறது. இந்திய வானிலை ஆய்வுத் துறையின் (IMD) தகவலின்படி, ஜூலை 26 ஆம் தேதி வரை மாநிலம் முழுவதும் மழை இயல்பானதாக இருக்கும் என எதிர்பார்க்கப்படுகிறது.
இருப்பினும், வானிலை ஆய்வு மையம் ஒரு எச்சரிக்கையையும் விடுத்துள்ளது. அதன்படி, ஜூலை 23 ஆம் தேதி முதல் 26 ஆம் தேதி வரை மாநிலத்தின் பல்வேறு மாவட்டங்களில் கனமழை பெய்யக்கூடும் என்பதால் மஞ்சள் எச்சரிக்கை விடுக்கப்பட்டுள்ளது.
மேலும், ஜூலை 27 ஆம் தேதி முதல் பருவமழை மேலும் தீவிரமடையக்கூடும் என்றும், ஜூலை 27 முதல் 29 ஆம் தேதி வரை மாநிலம் முழுவதும் கன முதல் மிகக் கனமான மழை பெய்ய வாய்ப்புள்ளது என்றும் வானிலை ஆய்வு மையம் கணித்துள்ளது. இந்தத் தொடர் மழைப்பொழிவு காரணமாக, மலைப்பகுதிகளில் நிலச்சரிவு போன்ற அபாயங்கள் அதிகரிக்கக்கூடும் என அஞ்சப்படுகிறது.
