சென்னையில் இன்று காலை தங்கத்தின் விலை வரலாறு காணாத வகையில் உயர்ந்துள்ளது. 22 காரட் ஆபரணத் தங்கம் ஒரு பவுன் ரூ.2,400 அதிகரித்து, ரூ.1,14,000-க்கு விற்பனையாகிறது. இதேபோல், வெள்ளி விலையும் கிலோவுக்கு ரூ.10,000 உயர்ந்துள்ளது.
தங்கத்தின் விலை நிர்ணயம் என்பது சர்வதேச பொருளாதார மற்றும் அரசியல் சூழல்கள், கச்சா எண்ணெய் விலை, அமெரிக்க டாலருக்கு நிகரான இந்திய ரூபாயின் மதிப்பு, தங்கத்தின் மீதான முதலீடுகள், உலக பங்குச் சந்தைகளின் செயல்பாடுகள் போன்ற பல்வேறு காரணிகளைச் சார்ந்துள்ளது.
இந்தியா உலக அளவில் தங்கத்தை இறக்குமதி செய்யும் முன்னணி நாடுகளில் ஒன்றாகத் திகழ்கிறது. அமெரிக்கா மற்றும் ஈரான் இடையேயான தற்போதைய மோதல் போக்கு, உலகப் பொருளாதாரத்தில் தாக்கத்தை ஏற்படுத்தி வருவதோடு, சர்வதேச அளவில் தங்க விற்பனையிலும் மாற்றங்களை உண்டாக்கி வருகிறது.
கடந்த மே மாதம், மத்திய அரசு தங்கத்தின் மீதான இறக்குமதி வரியை 6 சதவீதத்திலிருந்து 15 சதவீதமாக உயர்த்தியது. இந்த வரி உயர்விற்குப் பிறகு தங்கத்தின் விலையில் தொடர்ச்சியான மாற்றங்கள் ஏற்பட்டு வருவது குறிப்பிடத்தக்கது. கடந்த 5-ஆம் தேதி முதல் விலை உயர்ந்து வந்த தங்கம், நேற்று திங்கட்கிழமை அன்று ஒரு பவுனுக்கு ரூ.120 குறைந்து விற்பனையானது.
இந்நிலையில், இன்று காலை சென்னையில் வர்த்தகம் தொடங்கியபோது, 22 காரட் ஆபரணத் தங்கம் ஒரு கிராமுக்கு ரூ.300 உயர்ந்து, ஒரு கிராம் ரூ.14,250 என்ற விலையில் விற்பனையாகிறது. இதனால், ஒரு பவுன் தங்கம் ரூ.2,400 உயர்ந்து, ரூ.1,14,000-க்கு விற்பனையாகிறது.
மேலும், 24 காரட் ஆபரணத் தங்கம் ஒரு கிராமுக்கு ரூ.328 உயர்ந்து, ஒரு கிராம் ரூ.15,546-க்கு விற்பனையாகிறது. 18 காரட் ஆபரணத் தங்கம் ஒரு கிராமுக்கு ரூ.235 உயர்ந்து, ஒரு கிராம் ரூ.12,000 என்ற விலையில் விற்பனையாகிறது.
தங்கத்தைப் போலவே வெள்ளி விலையும் இன்று கணிசமாக உயர்ந்துள்ளது. சென்னையில் ஒரு கிராம் வெள்ளி ரூ.10 உயர்ந்து, ரூ.260-க்கு விற்பனையாகிறது. வெள்ளி கிலோவுக்கு ரூ.10,000 உயர்ந்து, ஒரு கிலோ ரூ.2,60,000-க்கு விற்பனை செய்யப்படுகிறது.
இந்த விலை உயர்வு நுகர்வோர் மத்தியில் அதிர்ச்சியை ஏற்படுத்தியுள்ளது. சர்வதேச சந்தையின் ஏற்ற இறக்கங்கள் மற்றும் இறக்குமதி வரி உயர்வு போன்ற காரணிகள் தங்கத்தின் விலையில் பெரும் தாக்கத்தை ஏற்படுத்துவதாக நகை வியாபாரிகள் தெரிவிக்கின்றனர்.
