தங்க நகைகளை வாங்கும் மக்களுக்கு அடுத்த அதிர்ச்சி காத்திருக்கிறது. தங்க நகைகளுக்கான ஹால்மார்க் கட்டணத்தை இந்திய தர நிர்ணய அமைப்பு (BIS) 67% உயர்த்தியுள்ளது. இதனால், தங்க நகைகள் வாங்குவோருக்கு கூடுதல் சுமை ஏற்படும் என எதிர்பார்க்கப்படுகிறது.
பண்டிகைக் காலத்தை முன்னிட்டு இந்த திடீர் கட்டண உயர்வு அறிவிக்கப்பட்டுள்ளது. அதன்படி, தங்க நகைகளுக்கான ஹால்மார்க்கிங் கட்டணம் முன்னர் ரூ.45 ஆக இருந்த நிலையில், தற்போது ரூ.75 ஆக உயர்த்தப்பட்டுள்ளது. இது சுமார் 30 ரூபாய் அதிகரிப்பாகும். இந்த புதிய கட்டண மாற்றம் உடனடியாக அமலுக்கு வந்துள்ளது. இதனால், ஹால்மார்க் செய்யப்பட்ட தங்க நகைகளை வாங்கும் வாடிக்கையாளர்கள் இனி கூடுதல் கட்டணம் செலுத்த வேண்டியிருக்கும்.
தங்கம், வெள்ளி போன்ற விலைமதிப்பற்ற உலோகங்களில் செய்யப்படும் நகைகள் மற்றும் நாணயங்கள், இந்திய தர நிர்ணய அமைப்பின் (BIS) ஆய்வகங்களில் ஆய்வு செய்யப்படுகின்றன. இந்த ஆய்வில், அந்தப் பொருளில் உள்ள தங்கம் அல்லது வெள்ளியின் தரம், அதன் கேரட் அளவு, மற்றும் ஆபரணத்தின் வகை போன்ற விவரங்கள் பரிசோதிக்கப்பட்டு, தர ஆய்வு உறுதிசெய்யப்பட்ட பின்னரே ஹால்மார்க் முத்திரை இடப்படுகிறது. இந்த முத்திரை இடப்பட்ட பின்னரே அவை கடைகளுக்கு வந்து வாடிக்கையாளர்களுக்கு விற்பனை செய்யப்படுகின்றன.
இந்நிலையில், ஹால்மார்க் கட்டணங்களில் இந்திய தர நிர்ணய அமைப்பு முக்கிய மாற்றங்களைச் செய்துள்ளது. குறிப்பாக, தங்க ஹால்மார்க் கட்டணம் கணிசமாக உயர்த்தப்பட்டுள்ளது. திருத்தப்பட்ட ஒழுங்குமுறை விதிகளின்படி, தங்கத்திற்கான ஹால்மார்க் கட்டணம் 67% உயர்த்தப்பட்டுள்ளது. முன்னதாக ஒரு தங்கப் பொருளுக்கு ஹால்மார்க் செய்ய 45 ரூபாய் கட்டணமாக வசூலிக்கப்பட்டு வந்தது. தற்போது இந்த கட்டணம் 30 ரூபாய் உயர்த்தப்பட்டு, 75 ரூபாயாக நிர்ணயிக்கப்பட்டுள்ளது.
புதிய விதிமுறைகளின்படி, ஹால்மார்க் மையங்களுக்கு அனுப்பப்படும் தங்க பொருட்களுக்கு குறைந்தபட்ச சரக்கு கட்டணமாக 200 ரூபாய் நிர்ணயிக்கப்பட்டுள்ளது. இது சிறிய அளவிலான நகைகளை ஹால்மார்க் செய்யும்போது அதன் தாக்கத்தை சற்று அதிகமாக உணர வைக்கும். ஹால்மார்க் கட்டணம் உயர்வால், நகை விற்பனை செய்யும் நிறுவனங்கள் இந்த கூடுதல் செலவை வாடிக்கையாளர்கள் மீதே சுமத்த வாய்ப்புள்ளது.
மறுபுறம், வெள்ளிப் பொருட்களைப் பொறுத்தவரை எந்தவித கட்டண உயர்வும் செய்யப்படவில்லை என்பது குறிப்பிடத்தக்கது. வெள்ளிப் பொருட்களுக்கான ஹால்மார்க் கட்டணம் பழையபடி ஒரு பொருளுக்கு 35 ரூபாய் என்ற நிலையிலேயே தொடரும் என BIS அறிவித்துள்ளது. இதனால், வெள்ளி நகை வாங்குவோருக்கு இந்த கட்டண உயர்வு பாதிப்பை ஏற்படுத்தாது.
இந்த திடீர் ஹால்மார்க் கட்டண உயர்வு, தங்க நகை வாடிக்கையாளர்கள் மத்தியில் ஒருவித அதிர்ச்சியை ஏற்படுத்தியுள்ளது. பண்டிகைக் காலங்களில் தங்க நகை வாங்கும் பழக்கம் அதிகமாக இருக்கும் நிலையில், இந்த விலை உயர்வு நுகர்வோரை எவ்வாறு பாதிக்கும் என்பதைப் பொறுத்திருந்துதான் பார்க்க வேண்டும்.
