மத்திய பிரதேசத்தின் குவாலியர் பகுதியில், ஒரு காதலியின் அன்பளிப்பு செயல் பெரும் பரபரப்பை ஏற்படுத்தியுள்ளது. தனது காதலனுக்கு ஆச்சரியம் அளிக்கும் நோக்கில், அவர் தனது காதலனின் காரை லிப்ஸ்டிக் கொண்டு அலங்கரித்துள்ளார். சுமார் 3 மணி நேரத்திற்கும் மேலாக செலவிட்டு, காரின் வெளிப்புறத்தில் சுமார் 3,400 லிப்ஸ்டிக் முத்தத் தடங்களை பதித்து அசத்தியுள்ளார்.
இந்த அசாதாரண செயல்பாடு அடங்கிய வீடியோ இணையத்தில் வெளியாகி, லட்சக்கணக்கானோரால் பார்க்கப்பட்டு வைரலானது. காரின் கதவுகள், பானட், பூட், தூண்கள் என காரின் கண்ணுக்குத் தெரிந்த அனைத்து பாகங்களிலும் இந்த முத்த வடிவத் தடங்கள் பதிவாகியிருந்தன. இந்த அன்பளிப்பிற்காக சுமார் 900 ரூபாய் மதிப்பிலான லிப்ஸ்டிக்கை அந்தப் பெண் பயன்படுத்தியுள்ளார்.
வைரலான இந்த காணொலியின் விளைவாக, காதலன் ஆதித்யா மீது போலீசார் நடவடிக்கை எடுத்தனர். மோட்டார் வாகன விதிகளின் கீழ், அவருக்கு ரூ.5,500 அபராதம் விதிக்கப்பட்டது. மேலும், தனது காதலியின் அன்பளிப்பான இந்த லிப்ஸ்டிக் தடங்களை, ஆதித்யாவைக் கொண்டே அழிக்குமாறு போலீசார் அறிவுறுத்தி, அவருக்கு ஒரு பாடத்தையும் கற்பித்தனர்.
விசாரணையில், ஆதித்யா தாதிபூர் பகுதியைச் சேர்ந்தவர் என்பதும், இணையத்தில் வைரலாகும் நோக்கில் இந்த செயலைச் செய்ததும் தெரியவந்துள்ளது. அவரது காதலியின் இந்த அன்பான செயல், எதிர்பாராத விதமாக அபராதத்திலும், பொதுவெளியில் விமர்சனத்திலும் முடிந்துள்ளது. இந்த 'Kissing Car' சம்பவம் அப்பகுதியில் பெரும் விவாதப் பொருளாக மாறியுள்ளது.
