செங்கல்பட்டு மாவட்டம் மதுராந்தகத்தில் பிரச்சாரம் மேற்கொண்ட அதிமுக பொதுச்செயலாளர் எடப்பாடி பழனிசாமி, முதல்வர் மற்றும் தவெக ஆட்சியை கடுமையாக விமர்சித்துள்ளார். "70 படங்கள் நடித்தும் கூட ஒரு தேசிய விருது வாங்க முடியவில்லை, அங்கேயே உங்களால் பாஸ் பண்ண முடியவில்லை. அப்படியிருக்கும்போது, இங்கு அரசியலில் எப்படி பாஸ் பண்ணப் போகிறீர்கள்?" என அவர் கேள்வி எழுப்பினார்.
கரூர் கூட்ட நெரிசலில் சிக்கி 41 பேர் உயிரிழந்த சம்பவத்தை சுட்டிக்காட்டிய எடப்பாடி பழனிசாமி, "பாதிக்கப்பட்டவர்களுக்கு உதவி செய்யாமல், முதல்வர் ஓடோடி விமானத்தில் ஏறி வீட்டுக்கு சென்றுவிட்டார். தவெக கூட்டத்திற்கு வந்தவர்களையே அவர்களால் காப்பாற்ற முடியவில்லை. எப்படி மக்களை காப்பாற்றுவார்கள்?" என்று விமர்சித்தார்.
மேலும், "நூறு விஜய் வந்தாலும், எடப்பாடி தொகுதியில் ஒன்றும் செய்ய முடியாது. முதலமைச்சர் கூறியது போல அவரது உத்தரவால் வீரமணி கைது செய்யப்படவில்லை. அரசியல் ஆதாயம் தேடுவதற்காக அவர் பொய் கூறியுள்ளார்" என்றும் எடப்பாடி பழனிசாமி குற்றம்சாட்டினார்.
தவெக ஆட்சி பொறுப்பேற்ற பின் குற்றச்சம்பவங்கள் அதிகரித்துள்ளதாகவும், விஜய் தேர்தல் பிரசாரம் செய்த பின்னரும் எடப்பாடி தொகுதியில் தான் வெற்றி பெற்றதாகவும் அவர் கூறினார். சட்டமன்றம் பட்டிமன்றமாக மாறிவிட்டதாகவும், தவெக ஏதோ ஒரு விபத்தில் ஆட்சி அமைத்துவிட்டதாகவும் எடப்பாடி பழனிசாமி தெரிவித்தார்.
தவெகவினர் 'எம்எல்ஏ'க்களை பிள்ளை பிடிப்பது போல் பிடிக்கிறார்கள் என்றும், 'ஜனநாயகன்' படம் ஒரு வாரம்கூட ஓடவில்லை என்றும், அப்படிப்பட்ட தயாரிப்பாளருக்கு டெல்லி சிறப்புப் பிரதிநிதி பதவி வழங்கப்பட்டுள்ளது என்றும், இது நாட்டின் முன்னேற்றத்திற்கு நல்லதல்ல என்றும் அவர் கேள்வி எழுப்பினார்.
