சென்னை எழும்பூர் நீதிமன்றம், திமுகவின் ஜென் z செயற்பாட்டாளர் சரண் ஜெயராமன் மீதான கைது நடவடிக்கையை ரத்து செய்து உத்தரவிட்டுள்ளது. தாம்பரத்தைச் சேர்ந்த சரண் ஜெயராமன், திமுகவின் தீவிர ஆதரவாளராகவும், அக்கட்சியின் ஜென் z செயற்பாட்டாளராகவும் செயல்பட்டு வருகிறார். இவர், தவெக பெண் நிர்வாகிகளை விமர்சித்ததாகக் கூறி, கடந்த நான்கு நாட்களுக்கு முன்பு அவர்கள் சென்னை காவல் ஆணையர் அலுவலகத்தில் புகார் அளித்தனர். இந்த புகாரின் அடிப்படையில், இன்று அதிகாலை 4.30 மணியளவில் கொளத்தூர் காவல்துறையினர் சரண் ஜெயராமனை அவரது வீட்டின் மாடியில் வைத்து கைது செய்தனர். அவரை இன்று மாலை எழும்பூர் நீதிமன்றத்தில் ஆஜர்படுத்தியபோது, நீதிபதி அவரது கைது நடவடிக்கையை ரத்து செய்து உத்தரவிட்டார். சரண் ஜெயராமனின் கைதுக்கு திமுகவினர் மத்தியில் கடும் கண்டனங்கள் எழுந்தன. இந்த உத்தரவைத் தொடர்ந்து, காவல்துறையினர் சரண் ஜெயராமனை விடுவித்தனர். நீதிமன்ற வளாகத்தில் இருந்து வெளியே வந்த பிறகு, ஜூலி மற்றும் திமுக ஜென் z குழுவினர் நடத்திய போராட்டங்கள் மற்றும் அவர்களின் நடவடிக்கைகள் சமூக வலைதளங்களில் வெளியாகி பரபரப்பை ஏற்படுத்தியுள்ளன. இந்த சம்பவம் திமுகவினரிடையே பெரும் விவாதத்தை உருவாக்கியுள்ளது.
