பருவமழைக்கு முன்பே டெங்கு பாதிப்பு அதிகரித்துள்ளதாகக் கூறப்படும் நிலையில், மழை இல்லாத காலங்களிலும் டெங்கு காய்ச்சல் பரவுவதற்கான காரணங்கள் மற்றும் தடுப்பு முறைகள் குறித்து மருத்துவர்கள் விளக்கமளித்துள்ளனர்.
வழக்கமாக மழைக்காலங்களில் தேங்கும் தூய்மையான தண்ணீரில் 'ஏடிஸ்' வகை கொசுக்கள் உற்பத்தியாகி டெங்கு பரவலை ஏற்படுத்துகின்றன. ஆனால், தற்போதைய பருவநிலை மாற்றங்கள் காரணமாக, வழக்கமான மழைக்காலங்களுக்கு முன்னதாகவே டெங்கு பாதிப்புகள் அதிகரிக்கத் தொடங்கியுள்ளன.
மழை இல்லாத காலங்களிலும் டெங்கு பரவ முக்கிய காரணம், வீடுகளில் சேமித்து வைக்கப்படும் தண்ணீர்தான். குடங்கள், வாளிகள், தண்ணீர் தொட்டிகள், பிளாஸ்டிக் பாத்திரங்கள் போன்றவற்றில் தேங்கும் சிறிதளவு தண்ணீர் கூட ஏடிஸ் கொசுக்கள் முட்டையிடுவதற்குப் போதுமானதாக உள்ளது. இதுமட்டுமின்றி, பூந்தொட்டிகளின் அடிப்பகுதி, பழைய டயர்கள், தேங்காய் ஓடுகள் போன்ற தேவையற்ற பொருட்களில் தேங்கும் நீரும் கொசு உற்பத்தியை அதிகரிக்கின்றன.
ஏடிஸ் கொசுக்களின் முட்டைகள், தண்ணீர் வற்றிப் போன பிறகும் பல மாதங்கள் வரை உயிருடன் இருக்கும் தன்மை கொண்டவை. மீண்டும் தண்ணீர் தேங்கும்போது, இந்த முட்டைகள் பொரிந்து புழுக்களாகவும், பின்னர் கொசுக்களாகவும் மாறி டெங்கு பரவலைத் தீவிரப்படுத்துகின்றன. எனவே, மழை இல்லாத காலங்களிலும் தண்ணீர் சேமித்து வைக்கும் தொட்டிகள், குடங்கள், வாளிகள் போன்றவற்றை எப்போதும் மூடி வைப்பது அவசியம்.
தண்ணீர் பயன்படுத்திய பிறகு, பாத்திரங்களை நன்றாகத் தேய்த்துக் கழுவி உலர வைக்க வேண்டும். இது கொசுக்கள் முட்டையிடுவதைத் தடுக்கும். மேலும், வீட்டைச் சுற்றியுள்ள பகுதிகளில் தண்ணீர் தேங்காமல் பார்த்துக்கொள்வதும், தேவையற்ற பொருட்களை அப்புறப்படுத்துவதும் கொசு உற்பத்தியைக் கட்டுப்படுத்த உதவும்.
டெங்கு காய்ச்சலின் அறிகுறிகளாக அதிக காய்ச்சல், கடுமையான தலைவலி, உடல் வலி, தசை மற்றும் மூட்டு வலி, கண்களுக்குப் பின்னால் வலி, வாந்தி போன்றவை ஏற்படலாம். இவை தவிர, கடுமையான வயிற்றுவலி, தொடர் வாந்தி, மூச்சுத்திணறல், மூக்கு அல்லது ஈறுகளில் ரத்தம் கசிதல், வாந்தி அல்லது மலத்தில் ரத்தம் வெளியேறுதல், அதீத சோர்வு போன்ற அறிகுறிகள் தென்பட்டால் உடனடியாக மருத்துவமனைக்குச் செல்ல வேண்டும்.
காய்ச்சல் குறைந்த பிறகும் டெங்கு பாதிப்பு தீவிரமடைய வாய்ப்புள்ளதால், காய்ச்சல் குணமடைந்துவிட்டது என்று அலட்சியப்படுத்தாமல், மருத்துவர்களின் தொடர் கண்காணிப்பில் இருப்பது மிகவும் அவசியம் என சுகாதார நிபுணர்கள் மற்றும் மருத்துவர்கள் வலியுறுத்தியுள்ளனர். உரிய நேரத்தில் சிகிச்சை பெறுவதன் மூலம் டெங்கு பாதிப்பிலிருந்து முழுமையாக மீள முடியும்.
