நேற்று தரம்சாலாவில் நடைபெற்ற பஞ்சாப் கிங்ஸ் மற்றும் டெல்லி கேப்பிட்டல்ஸ் அணிகளுக்கு இடையேயான ஐபிஎல் போட்டியில், கடந்த பத்து ஆண்டுகளில் காணப்படாத ஓர் அரிதான நிகழ்வு அரங்கேறியது. டெல்லி அணியின் பந்துவீச்சுத் திட்டம் அனைவரின் கவனத்தையும் ஈர்த்தது.
டாஸ் வென்ற டெல்லி கேப்டன் அக்சர் படேல், முதலில் பந்துவீசத் தீர்மானித்தார். ஆனால், போட்டியின் மிகப்பெரிய வியப்பாக, டெல்லி அணி ஒரு சுழற்பந்து வீச்சாளரையும் பயன்படுத்தாமல் 20 ஓவர்களையும் வீசி முடித்தது. டி20 கிரிக்கெட்டில் சுழற்பந்து வீச்சின் முக்கியத்துவம் கருதிப் பார்க்கும்போது, டெல்லியின் இந்த முடிவு பெரும் ஆச்சரியத்தை ஏற்படுத்தியது.
மிட்செல் ஸ்டார்க், முகேஷ் குமார், ஆகிப் நபி, மாதவ் திவாரி மற்றும் லுங்கி இன்கிடி ஆகிய ஐந்து வேகப்பந்து வீச்சாளர்கள் தலா நான்கு ஓவர்களை வீசி அசத்தினர்.
ஐபிஎல் வரலாற்றில் இதற்கு முன்பு 2016ஆம் ஆண்டில் சன்ரைசர்ஸ் ஐதராபாத் அணி, ராயல் சேலஞ்சர்ஸ் பெங்களூரு அணிக்கு எதிரான போட்டியில் ஒரு சுழற்பந்து வீச்சாளரையும் பயன்படுத்தாமல் பந்துவீசியது. தற்போது, சரியாக பத்து ஆண்டுகளுக்குப் பிறகு, அதே அரிதான நிகழ்வை டெல்லி அணி மீண்டும் நிகழ்த்திக் காட்டியுள்ளது.
