ஆண்ட்ராய்டு மொபைல் போன்களில் ஆபாச செயலிகள் வடிவில் ஊடுருவி, வங்கிப் பணத்தைத் திருடும் புதிய வகை சைபர் மோசடி குறித்து பொதுமக்கள் மிகுந்த எச்சரிக்கையுடன் இருக்குமாறு மத்திய உள்துறை அமைச்சகம் அறிவுறுத்தியுள்ளது.
'Night Play', 'Reloop', 'Kyss', 'Vimo', 'Rivo', “Nexo”, “Vixa” போன்ற பெயர்களில் இயங்கும் போலி செயலிகள் குறித்து மத்திய உள்துறை அமைச்சகம் (MHA) ஒரு முக்கிய எச்சரிக்கையை விடுத்துள்ளது. இந்த மோசடி கும்பல், பேஸ்புக் மற்றும் இன்ஸ்டாகிராம் போன்ற சமூக வலைத்தளங்களில் விளம்பரங்கள் மூலம் மக்களை ஈர்க்கிறது. அதன் பிறகு, அவர்களை ஒரு ஃபிஷிங் இணையதளத்திற்கு அழைத்துச் சென்று, அங்கிருந்து கூகிள் பிளே ஸ்டோர் மூலம் APK கோப்பை பதிவிறக்கம் செய்ய வைக்கின்றனர்.
இந்த போலி செயலிகள், மொபைலின் Accessibility Permission-ஐப் பெற்றுக்கொள்கின்றன. இதன் மூலம், திரையில் தோன்றும் தகவல்களைப் படிப்பது, பட்டன்களை அழுத்துவது, OTP அல்லது PIN எண்களை உள்ளிடுவது, மற்றும் பணப் பரிமாற்றம் செய்வது போன்ற அனைத்து நடவடிக்கைகளையும் மோசடி செய்பவர்களால் கண்காணிக்கவும் கட்டுப்படுத்தவும் முடியும்.
மேலும், சில செயலிகள் VPN-ஐ நிறுவி, இணையப் போக்குவரத்தை மோசடி செய்பவர்களின் சர்வர்கள் வழியாக திருப்பி விடுகின்றன. இதுமட்டுமின்றி, செயலியை அன்இன்ஸ்டால் செய்வதையும் இந்த செயலிகள் தடுக்கின்றன. இதனால், பாதிக்கப்பட்டவர்கள் உடனடியாக செயலியை நீக்க முடியாமல் தவிக்கின்றனர்.
எனவே, பொதுமக்கள் அனைவரும் மிகவும் கவனமாக இருக்க வேண்டும். அங்கீகரிக்கப்பட்ட கூகிள் பிளே ஸ்டோர் மற்றும் பிற நம்பகமான ஆப் ஸ்டோர்களில் இருந்து மட்டுமே செயலிகளைப் பதிவிறக்கம் செய்யுமாறு மத்திய உள்துறை அமைச்சகம் வலியுறுத்தியுள்ளது.
அறிமுகமில்லாத செயலிகளுக்கு Accessibility Permission-ஐ ஒருபோதும் வழங்க வேண்டாம் என்றும், சந்தேகத்திற்கிடமான செயலிகளை உடனடியாக நீக்கிவிட வேண்டும் என்றும் MHA பொதுமக்களுக்கு அறிவுறுத்தியுள்ளது. இந்த புதிய வகை சைபர் மோசடியிலிருந்து தங்களைப் பாதுகாத்துக் கொள்ள விழிப்புணர்வுடன் செயல்படுவது அவசியம்.
