சென்னை சூப்பர் கிங்ஸ் அணியின் தலைமைப் பயிற்சியாளர் ஸ்டீபன் பிளெமிங் விலகியதைத் தொடர்ந்து, புதிய பயிற்சியாளராக முன்னாள் இந்திய வீரர் ஹேமங் பதானி நியமிக்கப்பட அதிக வாய்ப்புகள் உள்ளதாகத் தகவல்கள் தெரிவிக்கின்றன. இந்த செய்தி சிஎஸ்கே ரசிகர்களிடையே பெரும் அதிருப்தியையும், கொந்தளிப்பையும் ஏற்படுத்தியுள்ளது.
கடந்த 18 ஆண்டுகளாக சென்னை சூப்பர் கிங்ஸ் அணியுடன் நீடித்த ஸ்டீபன் பிளெமிங்கின் உறவு முடிவுக்கு வந்துள்ள நிலையில், 2027 ஐபிஎல் சீசனுக்கு முன்னதாக ஒரு புதிய பயிற்சியாளர் குழுவை அமைப்பதில் சிஎஸ்கே நிர்வாகம் தீவிரமாக ஈடுபட்டுள்ளது. தற்போது அமெரிக்காவின் டல்லாஸ் நகரில் சிஎஸ்கே அணியின் உயர்மட்ட அதிகாரிகள், கடந்த சில சீசன்களின் அணியின் செயல்பாடுகளை விரிவாக ஆய்வு செய்து வருகின்றனர். இந்த ஆய்வின் அடிப்படையில், ஹேமங் பதானியின் பெயர் புதிய தலைமைப் பயிற்சியாளர் பதவிக்கு பரிசீலனையில் இருப்பதாகக் கூறப்படுகிறது.
தமிழகத்தைச் சேர்ந்த ஹேமங் பதானி, கடந்த 2025 மற்றும் 2026 ஆம் ஆண்டு ஐபிஎல் சீசன்களில் டெல்லி கேப்பிடல்ஸ் அணியின் தலைமைப் பயிற்சியாளராகப் பணியாற்றினார். அவரது பயிற்சியின் கீழ் டெல்லி கேப்பிடல்ஸ் அணி முறையே 5 மற்றும் 6வது இடங்களைப் பிடித்து, பிளே-ஆஃப் சுற்றுக்குத் தகுதி பெறாமல் ஏமாற்றத்தை அளித்தது. இருப்பினும், டிஎன்பிஎல் தொடரில் சேப்பாக் சூப்பர் கில்லீஸ் அணிக்கு பயிற்சியாளராக இருந்து 4 முறை கோப்பையை வென்று கொடுத்த பெருமைக்குரியவர். மேலும், ஐஎல் டி20, எஸ்ஏ டி20, லங்கா பிரீமியர் லீக் போன்ற பிற டி20 லீக் தொடர்களிலும் பயிற்சியாளராகச் செயல்பட்டு வெற்றிகளைப் பெற்றுள்ளார்.
ஆனால், ஐபிஎல் தொடரில் டெல்லி கேபிடல்ஸ் அணியில் அவரது செயல்பாடுகள் திருப்திகரமாக இல்லை என்று கூறி, சிஎஸ்கே ரசிகர்கள் இந்த நியமன முடிவுக்குக் கடும் எதிர்ப்பு தெரிவித்து வருகின்றனர். டெல்லி அணியின் பயிற்சியாளராக இருந்தபோது, அவர் மோசமான வீரர் தேர்வுகளையும், தோல்வியடைந்த வியூகங்களையும் வகுத்ததாக ரசிகர்கள் குற்றம் சாட்டுகின்றனர்.
17 ஆண்டுகளாக சென்னை சூப்பர் கிங்ஸ் அணிக்கு நிலையான மற்றும் சிறப்பான ஆட்டத்தை அளித்து வந்த ஸ்டீபன் பிளெமிங்கிற்குப் பதிலாக, ஐபிஎல் தொடரில் பெரிய அளவில் வெற்றிகளைக் குவிக்காத ஹேமங் பதானியை நியமிப்பது, சிஎஸ்கே அணியின் எதிர்காலத்திற்கு நல்லதல்ல என்றும், அணியின் வீழ்ச்சிக்கு இது வழிவகுக்கும் என்றும் ரசிகர்கள் சமூக வலைதளங்களில் தங்கள் கருத்துக்களைப் பதிவிட்டு, தங்களது அதிருப்தியை வெளிப்படுத்தி வருகின்றனர்.
இந்த திடீர் தலைமைப் பயிற்சியாளர் மாற்றம் குறித்த பின்னணி குறித்த கேள்விகளும் எழுந்துள்ளன. ஸ்டீபன் பிளெமிங் நீக்கப்பட்டதற்கான காரணங்கள் குறித்தும் ரசிகர்கள் மத்தியில் விவாதங்கள் நடைபெற்று வருகின்றன. சென்னை சூப்பர் கிங்ஸ் நிர்வாகம் இந்த விஷயத்தில் ரசிகர்களின் கருத்துக்களுக்கு எவ்வாறு பதிலளிக்கும் என்பதைப் பொறுத்திருந்துதான் பார்க்க வேண்டும்.
