சொந்த வீடு வாங்க வேண்டும் என்ற கனவில் இருப்பவர்களுக்கு ஒரு நற்செய்தி! தமிழ்நாட்டில் உள்ள நகரக் கூட்டுறவு வங்கிகள் மற்றும் நகரக் கூட்டுறவு கடன் சங்கங்கள் மூலம் இனி ரூ.1 கோடி வரை வீட்டுக் கடன் பெற முடியும். பொதுமக்களின் நிதித் தேவைகளைப் பூர்த்தி செய்யும் நோக்கிலும், அவர்களின் சொந்த வீடு கட்டும் கனவை நனவாக்கும் வகையிலும், வீட்டுக் கடன்களுக்கான உச்சவரம்பு மற்றும் திருப்பிச் செலுத்தும் காலம் குறித்த புதிய வழிகாட்டுதல்களை கூட்டுறவுத் துறை வெளியிட்டுள்ளது.
இதுவரை சில நகரக் கூட்டுறவு வங்கிகளில் தனிநபர் வீட்டுக் கடன்களுக்கான உச்சவரம்பு, இந்திய ரிசர்வ் வங்கியின் வழிகாட்டுதல்களை விடக் குறைவாக இருந்ததும், வங்கிக்கு வங்கி இந்த வரம்புகளில் வேறுபாடுகள் இருந்ததும் கண்டறியப்பட்டது. இந்தப் பிரச்சனைகளுக்குத் தீர்வு காணும் வகையில், பொதுமக்களும் உறுப்பினர்களும் முழுப் பயனடையும் வகையில், இந்திய ரிசர்வ் வங்கியின் நடைமுறையில் உள்ள உச்சவரம்புகளின்படி கடன்களை முழுமையாக வழங்கிட அனைத்து நகரக் கூட்டுறவு வங்கிகளுக்கும் கூட்டுறவுத் துறை மீண்டும் அறிவுறுத்தியுள்ளது.
மேலும், நகரக் கூட்டுறவு கடன் சங்கங்களில் (UCCS) அதிகரித்து வரும் நிதித் தேவைகளைக் கருத்தில் கொண்டு, கடன் உச்சவரம்புகள் சமீபத்தில் உயர்த்தப்பட்டுள்ளன. அதன்படி, ரூ.100 கோடிக்கும் குறைவான வைப்புத்தொகை நிலுவை கொண்ட (Tier 1) சங்கங்களில் தனிநபருக்கான அதிகபட்சக் கடன் உச்சவரம்பு ரூ.60 லட்சமாக நிர்ணயிக்கப்பட்டுள்ளது. இது பலருக்கு வீட்டுக் கடன் பெறுவதை எளிதாக்கும்.
ரூ.100 கோடிக்கு மேல் வைப்புத்தொகை நிலுவை கொண்ட (Tier 2) சங்கங்களில் தனிநபருக்கான அதிகபட்சக் கடன் உச்சவரம்பு ரூ.1 கோடியாக உயர்த்தப்பட்டுள்ளது. இந்த உயர்வு, பெரிய வீடுகள் அல்லது அதிக மதிப்புள்ள சொத்துக்களை வாங்க விரும்புவோருக்கு பெரும் உதவியாக இருக்கும்.
பொதுமக்களின் மாதாந்திரத் தவணைச் சுமையைக் குறைக்கும் முக்கிய நடவடிக்கையாக, நகரக் கூட்டுறவு வங்கிகள் (UCB) மற்றும் நகரக் கூட்டுறவு கடன் சங்கங்கள் (UCCS) ஆகிய இரண்டிலும் வீட்டுக் கடன்கள் மற்றும் வீட்டு அடமானக் கடன்களுக்கான அதிகபட்ச திருப்பிச் செலுத்தும் காலம் 20 ஆண்டுகள் வரை நீட்டிக்கப்பட்டுள்ளது. இது கடன் வாங்கியவர்களுக்கு நிம்மதியளிக்கும்.
இந்த புதிய வழிகாட்டுதல்களின்படி, நகரக் கூட்டுறவு வங்கிகள் மற்றும் கடன் சங்கங்கள் தங்களது கடன் கொள்கைகள் மற்றும் துணைவிதிகளை உடனடியாக ஆய்வு செய்து, தேவையான திருத்தங்களை மேற்கொண்டு மண்டலத் துணைப் பதிவாளரின் ஒப்புதலைப் பெற வேண்டும் என அறிவுறுத்தப்பட்டுள்ளது. மேலும், கடன் பெற விண்ணப்பிக்கும் உறுப்பினர்களின் கடன் தகுதி மற்றும் திருப்பிச் செலுத்தும் திறன் ஆகியவை உரிய முறையில் பரிசீலிக்கப்படும்.
தகுதியுடைய உறுப்பினர்கள் தங்களது அடையாளச் சான்று, முகவரிச் சான்று, வருமானச் சான்று மற்றும் நிலம் அல்லது வீடு தொடர்பான ஆவணங்களுடன் தங்கள் பகுதியிலுள்ள நகரக் கூட்டுறவு வங்கிகள் அல்லது கடன் சங்கங்களை அணுகி, இந்தச் சலுகையைப் பெற்று பயனடையுமாறு கூட்டுறவுத் துறை அமைச்சர் காந்திராஜ் கேட்டுக்கொண்டுள்ளார். சொந்த வீடு வாங்கும் கனவை நனவாக்க இது ஒரு பொன்னான வாய்ப்பாகும்.
