கோவையில் முதலமைச்சர் விஜய் நாளை மேற்கொள்ளவிருக்கும் பிரச்சாரப் பயணத்தை முன்னிட்டு, விரிவான போக்குவரத்து மாற்றங்கள் அறிவிக்கப்பட்டுள்ளன. சென்னையில் இருந்து விமானம் மூலம் கோவை வந்தடையும் முதலமைச்சர், அங்கிருந்து சாலை மார்க்கமாக தாராபுரம் செல்ல உள்ளார். இந்த வருகையின் காரணமாக, மாநகர காவல்துறை சார்பில் பல்வேறு போக்குவரத்து கட்டுப்பாடுகள் நாளை முதல் அமல்படுத்தப்பட உள்ளன.
சேலம், ஈரோடு, திருப்பூர் ஆகிய திசைகளில் இருந்து கோவை மாநகருக்குள் நுழையும் பேருந்துகள் மற்றும் கனரக வாகனங்கள், நீலாம்பூரில் இருந்து சின்னியம்பாளையம், ஏர்போர்ட் வழியாக நகருக்குள் வருவதற்கான அனுமதி மறுக்கப்பட்டுள்ளது. மாறாக, இந்த வாகனங்கள் நீலாம்பூரில் இருந்து எல் அண்ட் டி பைபாஸ் சாலை வழியாக சிந்தாமணிபுதூர், ஒண்டிப்புதூர், சிங்காநல்லூர் ஆகிய பகுதிகளை அடைந்து, அங்கிருந்து தங்கள் இலக்குகளுக்கு செல்ல அறிவுறுத்தப்பட்டுள்ளது.
அதேபோல், நீலாம்பூர் பகுதியில் இருந்து கோவை மாநகருக்குள் வரும் இலகுரக வாகனங்களும், எல் அண்ட் டி பைபாஸ் சாலை வழியாக சிந்தாமணிபுதூர், ஒண்டிப்புதூர், சிங்காநல்லூர் வழியாக அனுமதிக்கப்படும். கோவை மாநகரிலிருந்து அவினாசி சாலை வழியாக வெளியேறும் பேருந்துகள் மற்றும் கனரக வாகனங்கள், லட்சுமி மில்ஸ் சந்திப்பில் யு-டர்ன் செய்து, புலியகுளம், இராமநாதபுரம், சிங்காநல்லூர் வழியாக எல் அண்ட் டி பைபாஸ் சாலையை அடைந்து செல்ல வேண்டும்.
மாநகரிலிருந்து அவினாசி சாலை வழியாக வெளியேறும் இலகுரக வாகனங்கள், வி.கே. ரோடு வழியாக வரும் வாகனங்கள், மசக்காளிபாளையம் சாலை வழியாக சிங்காநல்லூர் சென்று தங்கள் இலக்குகளை அடையலாம். அவிநாசி சாலை, ஹோப்ஸ் வழியாக வரும் வாகனங்கள், டைட்டில் பார்க் சந்திப்பில் யு-டர்ன் செய்து, காமராஜர் சாலை, சிங்காநல்லூர் வழியாக செல்ல அறிவுறுத்தப்பட்டுள்ளது.
காளப்பட்டி சந்திப்பிலிருந்து சித்ரா, அவினாசி சாலை நோக்கி வரும் கனரக வாகனங்கள் அனைத்தும், காளப்பட்டி சந்திப்பிலிருந்து தென்னம்பாளையம் வழியாக அவினாசி சாலைக்கு திருப்பி விடப்படும். கோல்ட்வின்ஸ் சாலையில் இருந்து அவினாசி சாலைக்கு வரும் கனரக வாகனங்கள், ஹவுசிங் யூனிட் ரோடு, மாருதி பேக்கரி சந்திப்பில் வலதுபுறம் திரும்பி, விரையம்பாளையம் சாலை வழியாக காளப்பட்டி சந்திப்பிற்கு செல்ல வேண்டும்.
முதலமைச்சரின் வருகையை ஒட்டி, வருகின்ற 30.9.26 அன்று விமான நிலையத்திற்கு பயணிகளை அழைத்து வரவும், இறக்கி விடவும் வரும் வாகனங்கள் மற்றும் கால் டாக்ஸிகள், தங்களது பயண நேரத்திற்கு 30 நிமிடங்களுக்கு முன்னதாகவே விமான நிலையத்திற்கு வந்து சேருமாறு அறிவுறுத்தப்பட்டுள்ளது. மேலும், நாளை கால் டாக்ஸிகள் மற்றும் பிற வாகனங்களுக்கு விமான நிலையத்திற்குள் வாகனங்களை நிறுத்துவதற்கு அனுமதி இல்லை என்றும் தெரிவிக்கப்பட்டுள்ளது.
நாளை காலை 7 மணி முதல் இரவு 9 மணி வரை, கனரக வாகனங்கள் கோவை மாநகரத்திற்குள் வருவதற்கான தடை முழுமையாக அமலில் இருக்கும். இந்த போக்குவரத்து மாற்றங்கள் அனைத்தும் முதலமைச்சர் விஜயின் பிரச்சாரப் பயணத்தை சுமூகமாக நடத்துவதற்காக மேற்கொள்ளப்பட்டுள்ளன.
