சட்டப்பேரவையில் இன்று (செப்.7) முதல்வர் விஜய், சர்க்காரியா கமிஷன் அறிக்கையை சுட்டிக்காட்டி திமுகவினரின் ஊழல்கள் குறித்து ஆதாரங்களுடன் விரிவாக பேசினார்.
வீராணம் திட்ட டெண்டரில் 2.5% கமிஷன் கேட்டதாக மாறன் மீது சுமத்தப்பட்ட குற்றச்சாட்டை அவர் குறிப்பிட்டு, இது தொடர்பாக ஆதாரங்களையும் முன்வைத்தார். மேலும், அமலாக்கத்துறையின் (ED) ஆவணங்களைக் காட்டி, திமுகவினர் மீது பல்வேறு குற்றச்சாட்டுகளை அடுக்கினார். குறிப்பாக, 'பார்ட்டி பண்ட்' வாங்கப்பட்டதாகவும், மு.க.ஸ்டாலின் மற்றும் உதயநிதி ஸ்டாலின் ஆகியோர் லஞ்சம் பெற்றதாகவும் அவர் குற்றம்சாட்டினார்.
பேச்சின்போது, 'கலைஞர் மீது எனக்கு மிகுந்த மரியாதையும் மதிப்பும் உண்டு. நான் அவர் மீது எந்த குற்றச்சாட்டையும் வைக்கவில்லை. சர்க்காரியா கமிஷன் அறிக்கையில் உள்ள தகவல்களை மட்டுமே குறிப்பிடுகிறேன்' என்று முதல்வர் விஜய் தெரிவித்தார். மேலும், 'லோனுக்கு இஎம்ஐ கட்டுவது போல, தவணை முறையில் பணம் பெற்றுள்ளனர். இந்த 29 லட்சம் ரூபாய் மட்டுமல்ல, முரசொலி கட்டிடம் கட்டுவதற்காகவும் பணம் மற்றும் பொருட்கள் வடிவில் பெற்றுள்ளனர்' என்றும் அவர் கூறினார்.
'தங்களை மிஸ்டர் கிளீன் என்று சொல்லிக்கொள்பவர்கள், அப்போதே இப்படி என்றால், இப்போது எப்படி இருப்பார்கள்? 7.5% முதல் 10 சதவீதம் வரை 'பார்ட்டி பண்ட்' வாங்கப்பட்டதாக ஆவணங்களில் குறிப்பிடப்பட்டுள்ளது. தவறு செய்வதையும் முறையாகவும் ஒழுங்காகவும் செய்திருக்கிறார்கள்' என்று முதல்வர் விஜய் விமர்சித்தார்.
அமலாக்கத்துறையின் இரண்டு கோப்புகள் மட்டுமே இப்படி இருந்தால், மற்ற துறைகளின் கோப்புகளை திறந்தால் எத்தனை பூதங்கள் வெளிவரும் என்று தெரியவில்லை என்றும் அவர் குறிப்பிட்டார். 'ஆதாரம் வேண்டும், ஆதாரம் வேண்டும்' என்று கேட்பவர்களுக்கு, 'போதுமா இந்த ஆதாரம்?' என்று அவர் கேள்வி எழுப்பினார்.
'தப்பு செய்துவிட்டதை மாற்றிக்கொள்பவர்கள் ஒரு பக்கம், அந்த தவறிலிருந்து எப்படி தப்பிக்கலாம் என்று யோசித்து மாட்டிக்கொள்ளாதவர்கள் இன்னொரு பக்கம். நமது தோழர்கள் எல்லாம் இரண்டாவது வகையைச் சேர்ந்தவர்கள்' என்று முதல்வர் விஜய் குறிப்பிட்டார்.
திமுக மேடைகளில் பேசும்போது, 'திமுக இருக்கும் இடத்தில் தவறு நடக்காது, தவறு நடக்கும் இடத்தில் திமுக இருக்காது' என்று பெருமையாக கூறுவதாகவும், ஆனால் அதை தான் மாற்றி கூறுவதாகவும் தெரிவித்தார். 'திமுக இருக்கும் இடத்தில் தவறு நடக்கும், தவறு நடக்கும் இடத்தில் தான் திமுக இருக்கும்' என்றும் அவர் கூறினார்.
'ஊழல்' என்று சொல்லிவிட்டால் போதும், அனைவரும் எழுந்து நின்று ஆதாரம் கேட்பார்கள். ஆனால், இதுவரை நாங்கள் ஊழல் செய்தது இல்லை என்று யாரும் கூற மாட்டார்கள். ஊழல் செய்பவர்கள்தான் ஆதாரத்தைக் கேட்பார்கள், ஊழல் செய்யாதவர்கள் அதைப் பற்றி கவலைப்பட மாட்டார்கள்' என்று முதல்வர் விஜய் ஆவேசமாக பேசினார்.
