சென்னை: தமிழ்நாடு முதலமைச்சர் விஜய், இன்று காலை 11.00 மணியளவில் சென்னையில் இருந்து விமானம் மூலம் மதுரை விமான நிலையத்திற்கு வருகை தந்துள்ளார். அவரது வருகையை முன்னிட்டு, மதுரை விமான நிலையம், அரசு ராஜாஜி மருத்துவமனை, காந்தி அருங்காட்சியகம் மற்றும் மீனாட்சி அம்மன் கோயில் ஆகிய பகுதிகளில் தவெக சார்பில் சிறப்பான வரவேற்பு ஏற்பாடுகள் செய்யப்பட்டுள்ளன.
முதலமைச்சர் விஜய், இன்று நண்பகல் 12.30 மணியளவில் மதுரை ராஜாஜி அரசு மருத்துவமனையில் நடைபெறும் அரசு விழாவில் கலந்துகொள்கிறார். அங்கு, 'தாய்மாமன் தங்க மோதிரம்' என்ற புதிய திட்டத்தை அவர் தொடங்கி வைக்கிறார். மேலும், இத்திட்டத்தின் கீழ் பிறக்கும் குழந்தைகளுக்கு தங்க மோதிரங்களையும் அணிவிக்கவுள்ளார். இந்தத் திட்டத்தின் நோக்கம், தமிழ்நாடு அரசு மருத்துவமனைகளில் பிறக்கும் குழந்தைகளுக்கு ஒரு கிராம் தங்க மோதிரத்தை வழங்குவதாகும்.
கடந்த ஜூன் 22-ஆம் தேதி முதல் அரசு மருத்துவமனைகளில் பிறந்த குழந்தைகள் அனைவரும் இத்திட்டத்தின் மூலம் பயனடையலாம். இந்த மகத்தான திட்டத்திற்காக நடப்பு நிதியாண்டில் ரூபாய் 755.83 கோடி நிதி ஒதுக்கப்பட்டுள்ளது. முதற்கட்டமாக, 1.28 லட்சம் தங்க மோதிரங்கள் கொள்முதல் செய்யப்பட்டு தயார் நிலையில் உள்ளன.
மதுரை மாவட்டம், ஆழ்வார்புரம், ஆட்சியர் அலுவலக சாலையில் அமைந்துள்ள காந்தி நினைவு அருங்காட்சியகம், சுமார் ரூபாய் 10.25 கோடி ரூபாய் செலவில் நவீன தொழில்நுட்பங்களுடன் புதுப்பிக்கப்பட்டுள்ளது. இங்கு, சுதந்திரப் போராட்டத்தின் வரலாறு, மகாத்மா காந்தியின் வாழ்க்கை மற்றும் அவரது தமிழ்நாட்டுப் பயணம் குறித்த தகவல்கள் அனைத்தும் தொடுதிரை தொழில்நுட்பங்கள் மூலம் அறிந்துகொள்ளும் வகையில் புதிய காட்சியமைப்புகள் உருவாக்கப்பட்டுள்ளன.
இந்த நவீன வசதிகளுடன் கூடிய காந்தி நினைவு அருங்காட்சியகத்தை முதலமைச்சர் விஜய் இன்று மதியம் 01.00 மணியளவில் திறந்து வைக்கிறார். இதனைத் தொடர்ந்து, அருங்காட்சியகத்தையும் அவர் பார்வையிடுகிறார். நாளை முதல் இந்த அருங்காட்சியகம் பொதுமக்களின் பார்வைக்காக மீண்டும் திறக்கப்படும்.
17 ஆண்டுகளுக்குப் பிறகு, கடந்த செப்டம்பர் 17-ஆம் தேதி அன்று உலகப் புகழ்பெற்ற மதுரை மீனாட்சி சுந்தரேஸ்வரர் திருக்கோயிலில் மஹா கும்பாபிஷேகம் வெகு விமரிசையாக நடைபெற்றது. இந்த நிகழ்வைத் தொடர்ந்து, மாலை 04.00 மணியளவில் மதுரை மீனாட்சி அம்மன் திருக்கோயிலுக்கு வருகை தரும் முதலமைச்சருக்கு, திருக்கோயில் நிர்வாகத்தின் சார்பில் பூரண கும்ப மரியாதையுடன் வரவேற்பு அளிக்கப்படவுள்ளது.
மேலும், திருக்கோயிலுக்குள் செல்லும் முதலமைச்சர் விஜய், மீனாட்சி அம்மனை தரிசனம் செய்து வழிபாடு செய்கிறார். அதன் பிறகு, திருக்கோயிலின் உட்புறத்தையும் அவர் சுற்றிப் பார்க்கிறார். கோயில் நிர்வாகத்தின் சார்பில் அவருக்கு பிரசாதமும் வழங்கப்படவுள்ளது. முதலமைச்சர் விஜய், முதலமைச்சராகப் பதவியேற்ற பிறகு தமிழ்நாட்டில் முதன்முறையாகச் செல்லும் முதல் திருக்கோயில் இது என்பது குறிப்பிடத்தக்கது. சில மாதங்களுக்கு முன்பு, முதலமைச்சர் விஜய் கர்நாடக மாநிலம், கொல்லூர் மூகாம்பிகை அம்மன் திருக்கோயிலில் சுவாமி தரிசனம் மேற்கொண்டார்.
