ஹரியானா மாநிலம் குருக்ராமில், சாலையில் சென்றுகொண்டிருந்த பெண் பைக் ஓட்டி மீது கார் மோதி பயங்கர விபத்து ஏற்பட்டது. இந்தச் சம்பவம் அப்பகுதியில் பெரும் பரபரப்பை ஏற்படுத்தியுள்ளது. விபத்தின்போது, அந்தப் பெண் தூக்கி வீசப்பட்ட நிலையில், அவரது மோட்டார் சைக்கிள் சில மீட்டர்கள் தூரம் இழுத்துச் செல்லப்பட்டது. விபத்தை ஏற்படுத்திய கார் ஓட்டுநர், வாகனத்தை நிறுத்தாமல் தப்பிச் சென்றுள்ளார்.
சமூக வலைதளங்களில் 'rebelwheels_sia_' என்ற பக்கத்தை நிர்வகித்து வரும் 'சியா' என்ற பெண் பைக் ஓட்டி, இந்த துயரமான சம்பவம் குறித்த காணொளியையும், ஆதாரங்களையும் தனது பக்கத்தில் பகிர்ந்துள்ளார். கடந்த ஞாயிற்றுக்கிழமையன்று, சியா தனது 'அப்ரில்லா ஆர்.எஸ் 457' ஸ்போர்ட்ஸ் பைக்கில் நண்பர்களுடன் குருக்ராம் கோல்ஃப் கோர்ஸ் சாலையில் பயணித்துள்ளார். அப்போது, ஒரு கார் தங்களை ஆரம்பம் முதலே பின்தொடர்ந்து வந்ததாக அவர் குற்றம் சாட்டியுள்ளார்.
அந்தக் கார், சியாவின் பைக்கிற்கு மிக அருகில் ஆபத்தான முறையில் வந்துள்ளது. காரில் இருந்தவர்கள் அச்சுறுத்தும் வகையில் நடந்துகொண்டதால், பாதுகாப்பான இடைவெளியைப் பின்பற்றுமாறு சியா எச்சரித்துள்ளார். ஆனால், காரில் இருந்தவர்கள் பைக்கை நிறுத்துமாறு கூறியதாகவும், அவர்கள் மது அருந்தியிருந்ததாகத் தோன்றியதாகவும் சியா தெரிவித்துள்ளார்.
காரின் முன் வருவதைத் தடுக்க சியா தொடர்ந்து பைக்கை ஓட்டிச் சென்றுள்ளார். அவருக்குப் பின்னால் வந்த அவரது நண்பரும், காரை சியாவின் அருகே வரவிடாமல் தடுக்க முயன்றுள்ளார். இருப்பினும், அந்தக் கார் தொடர்ந்து அவர்களைப் பின்தொடர்ந்து, திடீரென சியாவின் மோட்டார் சைக்கிளை முந்திச் செல்ல முயன்றபோது மோதியுள்ளது. இதில் சியா கீழே விழுந்த நிலையில், காரின் ஓட்டுநர் வாகனத்தை நிறுத்தாமல் அதிவேகமாகத் தப்பிச் சென்றார்.
இந்த ஒட்டுமொத்த கொடூரமான சம்பவமும், சியாவின் பைக்கில் பொருத்தப்பட்டிருந்த ஆக்ஷன் கேமராவில் துல்லியமாகப் பதிவாகியுள்ளது. இந்த காணொளி தற்போது சமூக வலைதளங்களில் வைரலாகி வருகிறது.
சாலையில் மற்றவர்களின் உயிரைப் பணயம் வைத்து விபத்தை ஏற்படுத்திவிட்டு தப்பிச் செல்லும் ஓட்டுநர்கள் மீது கடுமையான நடவடிக்கை எடுக்க வேண்டும் என்று சியா குருக்ராம் காவல்துறையிடம் கோரிக்கை விடுத்துள்ளார். மேலும், அந்த காரின் பதிவு எண் மற்றும் உரிமையாளர் பெயர் போன்ற தகவல்களையும் அவர் பகிர்ந்துள்ளார்.
சியா தனது சமூக வலைதளப் பதிவில், 'எனக்கு வேறு எதுவும் சொல்வதற்கில்லை, ஆனால் இன்று குருக்ராம் சாலைகளில் நான் பாதுகாப்பற்றதாக உணர்ந்தேன். இது போன்ற மனிதர்களுக்கு மற்றவர்கள் மீது மோதிவிட்டு தப்பி ஓடுவதற்கு எந்தப் பயமும் இல்லை' என்று வேதனையுடன் குறிப்பிட்டுள்ளார். இந்தச் சம்பவம் பொதுமக்களிடையே பெரும் அதிர்ச்சியை ஏற்படுத்தியுள்ளது.
