இந்திய கிரிக்கெட் அணியின் முன்னணி வேகப்பந்து வீச்சாளரான ஜஸ்பிரித் பும்ராவுக்கு தொடர்ச்சியாக காயங்கள் ஏற்படுவது, அவரது பணிச்சுமை மேலாண்மை குறித்து பெரும் விவாதத்தை எழுப்பியுள்ளது. கடந்த 2023 ஒருநாள் போட்டி உலகக்கோப்பை இறுதிப்போட்டிக்கு பிறகு, சுமார் 970 நாட்களில் பும்ரா வெறும் 3 ஒருநாள் போட்டிகளில் மட்டுமே விளையாடியுள்ளார். இது, அடுத்த உலகக்கோப்பையில் அவர் எப்படி செயல்படுவார் என்ற கேள்வியை எழுப்பியுள்ளது.
கடந்த நவம்பர் 19, 2023 அன்று நடைபெற்ற ஒருநாள் போட்டி உலகக்கோப்பை இறுதிப்போட்டிக்கு பிறகு, பும்ரா தனது கடைசி ஒருநாள் போட்டியை ஜூலை 16 அன்று இங்கிலாந்துக்கு எதிராக விளையாடினார். இந்த 970 நாட்கள் இடைவெளியில் இந்திய அணி மொத்தம் 29 ஒருநாள் போட்டிகளில் விளையாடியுள்ள நிலையில், பும்ரா அவற்றில் மூன்றில் மட்டுமே பங்கேற்றுள்ளார். மீதமுள்ள 26 போட்டிகளில் அவர் விளையாடவில்லை என்பது குறிப்பிடத்தக்கது.
இத்தகைய சூழலில், பும்ராவை மட்டுமே நம்பி இந்திய அணி 2027 ஒருநாள் போட்டி உலகக்கோப்பையை எப்படி வெல்லப்போகிறது என்ற நியாயமான கேள்வி தற்போது எழுந்துள்ளது. ஒருநாள் போட்டிகள் மட்டுமின்றி, டெஸ்ட் மற்றும் டி20 போட்டிகளிலும் பும்ராவின் பங்களிப்பு மிகவும் குறைவாகவே உள்ளது.
2023-க்குப் பிறகு இந்தியா விளையாடிய 27 டெஸ்ட் போட்டிகளில், பும்ரா 22 போட்டிகளில் பங்கேற்றுள்ளார். ஆனால், 5 டெஸ்ட் போட்டிகளில் அவர் விளையாடவில்லை. அதேபோல், டி20 கிரிக்கெட்டில் இந்தியா விளையாடிய 78 போட்டிகளில், வெறும் 33 போட்டிகளில் மட்டுமே பும்ரா விளையாடியுள்ளார். மீதமுள்ள 45 போட்டிகளில் பணிச்சுமை மேலாண்மை அல்லது காயம் காரணமாக அவர் விளையாடவில்லை.
சமீபத்தில் இங்கிலாந்து தொடரில் ஏற்பட்ட முழங்கால் காயம் காரணமாக, தற்போதைய இலங்கை டெஸ்ட் தொடரிலிருந்தும் பும்ரா கடைசி நேரத்தில் விலகியுள்ளார். அவருக்குப் பதிலாக ஜம்மு காஷ்மீரைச் சேர்ந்த ஆகிப் நபி இந்திய அணியில் சேர்க்கப்பட்டுள்ளார். பிசிசிஐ பும்ராவின் உடற்தகுதியைக் காக்க பல முன்னெச்சரிக்கை நடவடிக்கைகளை எடுத்தாலும், அவர் அடிக்கடி காயமடைவது தொடர்கதையாகி வருகிறது.
இதனால், பிசிசிஐ-யின் இந்த பணிச்சுமை மேலாண்மை முறை என்பது வெறும் கண் துடைப்புதானா என்ற கேள்வி ரசிகர்கள் மத்தியில் வலுவாக எழுந்துள்ளது. பும்ராவின் தொடர் காயங்கள் இந்திய அணிக்கு பெரும் தலைவலியாக மாறியுள்ளது. அவரது உடல்நிலையை சரியாக நிர்வகிப்பது பிசிசிஐ-க்கு ஒரு பெரிய சவாலாக உள்ளது.
இந்த நிலை தொடர்ந்தால், வரவிருக்கும் முக்கிய தொடர்களிலும், உலகக்கோப்பைகளிலும் இந்திய அணியின் வெற்றி வாய்ப்பு பாதிக்கப்படலாம் என கிரிக்கெட் வல்லுநர்கள் கவலை தெரிவித்துள்ளனர். பும்ராவின் மாற்று வீரர்களை கண்டறிந்து தயார்படுத்துவது அவசியம் என்றும் அவர்கள் வலியுறுத்தியுள்ளனர்.
