ஐபிஎல் 2026 சீசனில் ராயல் சேலஞ்சர்ஸ் பெங்களூரு (RCB) அணி சாம்பியன் பட்டத்தை வென்றதில் வேகப்பந்து வீச்சாளர் புவனேஷ்வர் குமாரின் பங்கு மகத்தானது. அந்தத் தொடரில் 28 விக்கெட்டுகளைக் கைப்பற்றி, அதிக விக்கெட் வீழ்த்தியவர்கள் பட்டியலில் இரண்டாம் இடத்தைப் பிடித்தார். பர்பிள் தொப்பியை வென்ற ககிசோ ரபாடாவிடமிருந்து ஒரு விக்கெட் வித்தியாசத்தில் முதலிடத்தைத் தவறவிட்டார்.
36 வயதான புவனேஷ்வரின் வொபல் சீம் பந்துவீச்சு நுட்பம் பலரையும் கவர்ந்துள்ளது. சச்சின் டெண்டுல்கர் கூட, புவனேஷ்வர் தனது பந்தை எவ்வாறு லாவகமாகப் பயன்படுத்தி பேட்ஸ்மேன்களைத் திணறடிக்கிறார் என்பதை விளக்கி, சமூக வலைதளத்தில் ஒரு காணொளியை வெளியிட்டிருந்தார்.
இந்த சிறப்பான ஆட்டம் காரணமாக, அவர் இந்திய அணிக்குத் திரும்புவாரா என்ற விவாதம் எழுந்துள்ளது. இது குறித்துப் பேசிய புவனேஷ்வர் குமார், 'நான் விளையாட வேண்டும் என்று காட்டிக்கொள்ள விரும்புவதில்லை. அது எனது இயல்பு கிடையாது. அணியைத் தேர்வு செய்வது தேர்வுக்குழுவினரின் பொறுப்பு. நான் தகுதியானவன் என்று அவர்களுக்குத் தோன்றினால், கண்டிப்பாக என்னைத் தேர்ந்தெடுப்பார்கள்' என்று தெரிவித்துள்ளார்.
'நான் என்ன செய்ய வேண்டுமோ, அதை ஏற்கனவே சிறப்பாகச் செய்துவிட்டேன். ஒருவேளை நான் இந்திய அணிக்காக விளையாடாமல் இருந்திருந்தால், அந்த வாய்ப்பிற்காகக் காத்திருந்திருப்பேன். இந்திய அணிக்காக விளையாடுவது சாதாரண விஷயமல்ல. அந்த வாய்ப்பைப் பெற்ற பாக்கியசாலிகளுள் நானும் ஒருவன்' எனப் பெருமிதத்துடன் குறிப்பிட்டார். சர்வதேச கிரிக்கெட்டில் தனது அறிமுகப் போட்டியின் முதல் பந்திலேயே பாகிஸ்தான் வீரர் முகமது ஹபீஸின் விக்கெட்டை வீழ்த்தி அனைவரையும் வியக்க வைத்தார். இதுவரை அனைத்து வகையான சர்வதேசப் போட்டிகளிலும் சேர்த்து மொத்தம் 294 விக்கெட்டுகளை வீழ்த்தி, தனது கிரிக்கெட் பயணத்தில் முத்திரையைப் பதித்துள்ளார்.
