மலேசியாவில் முனைவர் பட்டம் பயிலும் மாணவர் பாரதிதாசனுக்கு, அண்ணல் அம்பேத்கர் அயலக கல்வி உதவித்தொகைத் திட்டத்தின் கீழ் இதுவரை 48 லட்சத்து 22 ஆயிரத்து 97 ரூபாய் வழங்கப்பட்டுள்ளதாக தமிழக அரசு விளக்கமளித்துள்ளது. இது தொடர்பாக சமூக நலத்துறை ஒரு அதிகாரப்பூர்வ கடிதத்தையும் வெளியிட்டுள்ளது.
ஊடகங்களில் வெளியான செய்திகளுக்கு மறுப்பு தெரிவித்துள்ள அரசு, மாணவர் பாரதிதாசன் மலேசியாவில் உள்ள National University of Malaysia-வில் Tissue Engineering and Regenerative Medicine துறையில் Ph.D., படிப்பில் உயர்கல்வி பயின்று வருவதாகக் குறிப்பிட்டுள்ளது. அவருக்கு மூன்றாண்டு காலத்திற்கு அண்ணல் அம்பேத்கர் அயலக கல்வி உதவித்தொகை வழங்க ஒப்புதல் அளித்து, ஆதிதிராவிடர் நலத்துறை இயக்குநர் கடந்த ஜனவரி 9, 2025 அன்று பரிந்துரை கடிதம் வழங்கியுள்ளார்.
இந்த திட்டத்தின் கீழ், ஒரு மாணவருக்கு கல்வி நிறுவனத்திற்கு செலுத்தப்படும் கட்டணம், வெளிநாட்டு வாழ்க்கைச் செலவு மற்றும் இதர செலவினங்கள் சேர்த்து அதிகபட்சமாக 36 லட்சம் ரூபாய் வரை வழங்கப்படுகிறது. மாணவர் பாரதிதாசன் பயிலும் Ph.D., படிப்புக்கு ஆண்டொன்றுக்கு கல்விக் கட்டணமாக 5 லட்சம் ரூபாய் நிர்ணயம் செய்யப்பட்டுள்ளது.
2025-2026 ஆம் ஆண்டுக்கான முதலாமாண்டு படிப்புக்கு, கல்விக் கட்டணம் போக மீதமுள்ள 31 லட்சம் ரூபாயை வாழ்க்கை மற்றும் ஆராய்ச்சிக்கான செலவினமாக மாணவர் கோரியிருந்தார். அரசால் அந்தத் தொகை ஒதுக்கப்பட்டது. ஆனால், அந்தத் தொகைக்கான உரிய ஆவணங்களை 10 மாதங்கள் கடந்த பின்னரும் மாணவர் சமர்ப்பிக்கவில்லை என்றும், இரண்டாம் ஆண்டுக்கான உதவித்தொகையாக 36 லட்சம் ரூபாயை அவர் கோரி வருவதாகவும் அரசு தெரிவித்துள்ளது.
இருப்பினும், மாணவரின் கல்வி நலனைக் கருத்தில் கொண்டு, அவரது இரண்டாம் ஆண்டு Ph.D., படிப்புக்கு பல்கலைக்கழகத்திற்கு செலுத்த வேண்டிய முழு கல்விக் கட்டணமான 5 லட்சத்து 57 ஆயிரம் ரூபாயையும், வாழ்க்கைச் செலவினமாக 6 லட்சத்து 65 ஆயிரம் ரூபாயையும் சேர்த்து மொத்தம் 12 லட்சம் ரூபாய் (RM 23460 + RM 27600 = RM 51060) விடுவிக்கப்பட்டுள்ளதாக அரசு மேலும் விளக்கியுள்ளது.
இதுவரை மாணவருக்கு வழங்கப்பட்ட மொத்தத் தொகை 48 லட்சத்து 22 ஆயிரத்து 97 ரூபாய் ஆகும். ஆனாலும், அதற்கான சரியான பயனீட்டு விவரங்கள் மற்றும் ஆவணங்களை மாணவர் சமர்ப்பிக்காமல், கூடுதல் தொகை பெற சமூக வலைதளங்கள் மற்றும் ஊடகங்கள் மூலம் தவறான தகவல்களை பரப்பி வருவதாக அரசு குற்றம்சாட்டியுள்ளது.
அண்ணல் அம்பேத்கர் அயலக கல்வி உதவித்தொகைத் திட்டத்தில், ஆதிதிராவிடர் மற்றும் பழங்குடியினர் மாணவர்களுக்கு உயர்கல்வி உதவித்தொகை வழங்குவதில் எந்தவித தாமதமோ, தடங்கலோ இல்லை என்றும், கடந்த ஆண்டுகளை விட இந்த ஆண்டு (2026-2027) 362 மாணவர்களுக்கு உதவித்தொகை வழங்கப்பட்டுள்ளது ஒரு பெரும் சாதனை என்றும் அரசு விளக்கமளித்துள்ளது. மாணவரின் தவறான செய்திகளின் உண்மைத்தன்மையை சரிபார்க்காமல், அரசியல் உள்நோக்கத்துடன் அவதூறு பரப்பப்படுவதாகவும் அரசு தெரிவித்துள்ளது.
