மார்வெல் சினிமா பிரபஞ்சத்தின் அடுத்த அதிரடி படைப்பான 'அவெஞ்சர்ஸ்: டூம்ஸ்டே' படத்தின் டிரெய்லர் தற்போது வெளியாகி இணையத்தை கலக்கி வருகிறது. 'அவெஞ்சர்ஸ்: இன்பினிட்டி வார்' மற்றும் 'அவெஞ்சர்ஸ்: எண்ட்கேம்' போன்ற மாபெரும் வெற்றிப் படங்களை இயக்கிய ரூசோ பிரதர்ஸ் இந்த படத்தையும் இயக்கியுள்ளனர்.
இந்தப் படத்தின் மிகப்பெரிய சிறப்பம்சமாக, 'எண்ட்கேம்' படத்தில் உயிரிழந்ததாக காட்டப்பட்ட அயர்ன் மேன் கதாபாத்திரத்தில் நடித்த ராபர்ட் டவுனி ஜூனியர், மீண்டும் மார்வெல் உலகிற்குள் நுழைந்திருப்பது அமைந்துள்ளது. ஆனால், இம்முறை அவர் ஹீரோவாக அல்லாமல், மல்டிவெர்ஸ் உலகையே அழிக்கத் துடிக்கும் மிகக் கொடூரமான வில்லனான 'டாக்டர் டூம்' பாத்திரத்தில் களம் இறங்கியுள்ளார். இது ரசிகர்களிடையே பெரும் எதிர்பார்ப்பை ஏற்படுத்தியுள்ளது.
'அவெஞ்சர்ஸ்: டூம்ஸ்டே' திரைப்படம் வரும் டிசம்பர் 17-ஆம் தேதி உலகம் முழுவதும் உள்ள திரையரங்குகளில் வெளியாகும் என அதிகாரப்பூர்வமாக அறிவிக்கப்பட்டுள்ளது. இந்த அறிவிப்புடன் வெளியான டிரெய்லர், பிரமாண்டமான ஆக்ஷன் காட்சிகள், நவீன கிராபிக்ஸ் மற்றும் பரபரப்பான காட்சிகளால் நிரம்பியுள்ளது. இதனால், சமூக வலைத்தளங்களில் டிரெய்லர் வேகமாக வைரலாகி, படத்தின் மீதான எதிர்பார்ப்பை மேலும் அதிகரித்துள்ளது.
இருப்பினும், ரசிகர்கள் பெரிதும் எதிர்பார்த்த ஹல்க், டாக்டர் ஸ்ட்ரேஞ்ச், ஸ்பைடர் மேன் உள்ளிட்ட முக்கிய சூப்பர் ஹீரோ கதாபாத்திரங்கள் டிரெய்லரில் இடம்பெறாதது சில ரசிகர்களுக்கு ஏமாற்றத்தை அளித்துள்ளது. அதே நேரத்தில், டிரெய்லரில் தோர் மற்றும் கேப்டன் அமெரிக்கா மீண்டும் இணையும் காட்சிகள் ரசிகர்களை வெகுவாக ஈர்த்துள்ளன.
மேலும், 'எக்ஸ்-மென்' கதாபாத்திரங்களான ப்ரொஃபெசர் எக்ஸ், மேக்னடோ, சைக்ளோப்ஸ் மற்றும் கேம்பிட் ஆகியோரும் அவெஞ்சர்ஸ் அணியுடன் இணைந்துள்ளனர். இவர்களுடன் அண்மையில் அறிமுகமான 'ஃபென்டாஸ்டிக் ஃபோர்' மற்றும் 'தண்டர்போல்ட்ஸ்' குழுவினரும் இணைந்து மல்டிவெர்ஸைக் காக்கப் போராடும் காட்சிகள் இடம்பெற்றுள்ளன. இது படத்தின் பிரம்மாண்டத்தை மேலும் எடுத்துக்காட்டுகிறது.
ராபர்ட் டவுனி ஜூனியரின் வில்லன் அவதாரம், பல்வேறு சூப்பர் ஹீரோ குழுக்களின் இணைப்பு, மற்றும் ரூசோ பிரதர்ஸின் இயக்கத்தில் உருவாகும் இந்த 'அவெஞ்சர்ஸ்: டூம்ஸ்டே' திரைப்படம், மார்வெல் ரசிகர்களுக்கு ஒரு மறக்க முடியாத அனுபவத்தை வழங்கும் என எதிர்பார்க்கப்படுகிறது. படத்தின் வெளியீட்டிற்காக ரசிகர்கள் ஆவலுடன் காத்திருக்கின்றனர்.
