ஐபிஎல் 2026 தொடரில் தனது மின்னல் வேகப் பந்துவீச்சால் அனைவரையும் கவர்ந்த இளம் வீரர் அசோக் சர்மா, இந்திய அணியின் நட்சத்திர வேகப்பந்து வீச்சாளர் முகமது சிராஜின் வழிகாட்டுதல் தனக்கு எவ்வாறு உதவியது என்பதை நெகிழ்ச்சியுடன் பகிர்ந்துள்ளார்.
ஜிம்பாப்வேக்கு எதிரான டி20 தொடரில் இந்திய அணியில் இடம்பெற்றுள்ள அசோக் சர்மா, குஜராத் டைட்டன்ஸ் அணியில் சிராஜுடன் இணைந்து விளையாடிய அனுபவங்கள் தனது பந்துவீச்சு நுட்பங்களில் ஒரு பெரிய மாற்றத்தை ஏற்படுத்தியதாகக் கூறியுள்ளார்.
இந்திய அணிக்காக சர்வதேச கிரிக்கெட்டில் அறிமுகமாகவுள்ள அசோக், சிராஜுடன் பயிற்சி செய்த நாட்களை நினைவுகூர்ந்து, அவரிடமிருந்து ஆலோசனைகளைப் பெறுவதற்கு எந்த வாய்ப்பையும் தவறவிட்டதில்லை என்று தெரிவித்தார்.
'நான் சிராஜ் பாயுடன் நிறைய விஷயங்களைப் பேசுவேன். ஓய்வறையிலோ அல்லது மைதானத்திலோ பயிற்சி செய்யும்போதெல்லாம், பந்துவீச்சு குறித்து அவரிடம் தொடர்ந்து கேள்விகள் கேட்பேன். ஒரு போட்டியில் விளையாடும்போது நீங்கள் என்ன அழுத்தத்தை எதிர்கொள்கிறீர்கள்? ஒரு பந்தை வீசுவதற்கு முன்பு உங்களது திட்டமிடல் என்ன? ஒரு பேட்டரை எப்படி வீழ்த்த வியூகம் அமைப்பது?' போன்ற பல விஷயங்களை அவரிடம் விவாதித்துள்ளேன். சிராஜ் பாய் எனக்கு எல்லாவற்றையும் தெளிவாக விளக்குவார். என்னுடன் நின்று, நான் வீசும் சில பந்துகளை உன்னிப்பாகக் கவனித்து, 'இதைச் செய், இந்த மாற்றத்தை முயன்று பார்' என்று அறிவுரை கூறுவார். அவரிடமிருந்து நான் பல விஷயங்களைக் கற்றுக்கொண்டேன். இப்போதும் ஜெய்ப்பூரில் பயிற்சி செய்யும்போது, சிராஜ் பாய் சொன்ன ஆலோசனைகளை மனதில் வைத்தே சிறப்பாகச் செயல்பட முயல்கிறேன்' என்று அசோக் சர்மா கூறினார்.
2025 ஐபிஎல் ஏலத்தில் குஜராத் டைட்டன்ஸ் அணியால் ரூ.90 லட்சத்திற்கு வாங்கப்பட்ட அசோக் சர்மா, பஞ்சாப் கிங்ஸ் அணிக்கு எதிரான தனது முதல் போட்டியிலேயே மணிக்கு 154.2 கி.மீ வேகத்தில் பந்துவீசி அனைவரையும் வியப்பில் ஆழ்த்தினார். ஐபிஎல் 2026 சீசனில் ஆறு போட்டிகளில் விளையாடி, 2/32 என்ற சிறந்த பந்துவீச்சுடன் 6 விக்கெட்டுகளைக் கைப்பற்றினார். இந்த சிறப்பான ஆட்டமே அவருக்கு இந்திய அணியில் ஒரு இடத்தைப் பெற்றுத் தந்துள்ளது.
சிராஜ் தவிர, அனுபவம் வாய்ந்த வேகப்பந்து வீச்சாளர் இஷாந்த் சர்மாவும் தனது ஆட்டத்தை மேம்படுத்த உதவியதாக அசோக் குறிப்பிட்டார். 'நான் குஜராத் டைட்டன்ஸ் பயிற்சி முகாமில் இணைந்தபோது, இஷாந்த் சர்மா பாய் அங்கு இருந்தார். அப்போது எனது சமீபத்திய ரஞ்சி கோப்பை செயல்பாடு பற்றிக் கேட்டார். நான் 4 போட்டிகளில் 16 விக்கெட்டுகளை வீழ்த்தியதாகக் கூறினேன். அதற்கு அவர், 'உனது பந்துவீச்சு சிறப்பாக உள்ளது. ஆனால் நீ உன்னுடைய பந்தின் லென்த் பகுதியில் இன்னும் கொஞ்சம் கவனம் செலுத்தினால், இந்த 4 போட்டிகளில் எடுத்த 16 விக்கெட்டுகள் எளிதாக 24 விக்கெட்டுகளாக மாறும்' என்றார்.
இந்தியாவிற்காக டெஸ்ட் கிரிக்கெட்டில் 300-க்கும் மேற்பட்ட விக்கெட்டுகளை வீழ்த்திய ஒரு ஜாம்பவான் கொடுத்த இந்த அறிவுரை என் மனதில் ஆழமாகப் பதிந்தது. சரியான பகுதியில் செய்யப்படும் சிறிய மாற்றங்கள் கூட பந்துவீச்சில் பெரும் தாக்கத்தை ஏற்படுத்தும் என்பதை அது எனக்கு உணர்த்தியது' என்று அசோக் சர்மா தெரிவித்தார்.
ஜிம்பாப்வே தொடரில் அசோக் சர்மா தனது பந்துவீச்சுத் திறனை வெளிப்படுத்தி இந்திய அணிக்கு வலு சேர்ப்பார் என எதிர்பார்க்கப்படுகிறது.
