அண்ணன் சீர் திட்டம்: விண்ணப்பிப்பது எப்படி? யார் தகுதியானவர்?

தமிழக அரசின் அண்ணன் சீர் திட்டம்: விண்ணப்பிக்கும் முறை மற்றும் தகுதிகள் குறித்த அறிவிப்பு.

தமிழக அரசின் புதிய 'அண்ணன் சீர் திட்டம்' குறித்த வழிகாட்டு நெறிமுறைகள் தற்போது வெளியிடப்பட்டுள்ளன. இந்த முக்கியத் திட்டத்தின் கீழ் பயன்பெற சில தகுதிகள் நிர்ணயிக்கப்பட்டுள்ளன. மேலும், இத்திட்டத்தில் யார் யார் பயன்பெற முடியாது என்பது குறித்தும் தமிழக அரசு விரிவான தகவல்களை வெளியிட்டுள்ளது.

திருமணத் தேதிக்கு 60 நாட்களுக்கு முன்பிருந்தும், திருமண நாள் வரையிலும் இத்திட்டத்திற்கு விண்ணப்பிக்கலாம். குறிப்பாக, 2026 ஆம் ஆண்டு அக்டோபர் 10 ஆம் தேதி முதல் 2027 ஆம் ஆண்டு வரையிலான திருமணங்களுக்கு, 2027 ஆம் ஆண்டு ஜனவரி 15 ஆம் தேதி வரை விண்ணப்பிக்க கால அவகாசம் வழங்கப்பட்டுள்ளது. விண்ணப்பதாரர்கள் அரசு இ-சேவை மையங்கள் மூலமாகவோ அல்லது www.tnesevai.tn.gov.in என்ற இணையதளம் வாயிலாகவோ விண்ணப்பிக்கலாம்.

இத்திட்டத்தின் கீழ் பயன்பெற, திருமணத்திற்குரிய மணமக்கள் சட்டப்பூர்வ வயதை முழுமையாக நிறைவு செய்திருக்க வேண்டும். மணப்பெண்ணின் குடும்பத்தின் ஆண்டு வருமானம் ரூ.2.50 லட்சத்திற்கு மிகாமல் இருக்க வேண்டும். மேலும், குடும்ப அட்டையில் மணப்பெண்ணின் பெயர் இடம்பெற்றிருக்க வேண்டியது அவசியமாகும். திருமண நிதியுதவிக்கான பிற அரசுத் திட்டங்களின் பயன்களைப் பெறாதவர்கள் மட்டுமே இத்திட்டத்திற்கு விண்ணப்பிக்க தகுதியுடையவர்கள் ஆவர்.

விண்ணப்பதாரரின் ஆதார் எண் மற்றும் குடும்ப அட்டை எண் சரிபார்க்கப்படும். தகுதியுடைய விண்ணப்பதாரர்கள் தங்களது திருமணப் பத்திரிகையை பதிவேற்றம் செய்ய வேண்டும். ஒவ்வொரு தகுதியான விண்ணப்பத்திற்கும் ஒரு தனித்துவ அடையாள எண் வழங்கப்படும். விண்ணப்பத்தின் தற்போதைய நிலை குறித்து குறுஞ்செய்தி, வாட்ஸ்அப் மற்றும் மின்னஞ்சல் மூலமாக பயனாளிகளுக்குத் தெரிவிக்கப்படும்.

திருமணம் நடைபெற்ற 15 நாட்களுக்குள் தமிழகத்தில் திருமணத்தைப் பதிவு செய்திருக்க வேண்டும். தகுதியற்ற காரணங்களுக்காக விண்ணப்பங்கள் நிராகரிக்கப்பட்டால், அதற்கான காரணங்கள் தெளிவாகத் தெரிவிக்கப்படும். மேலும், விண்ணப்பதாரர்கள் மேல்முறையீடு செய்வதற்கும் வாய்ப்பு வழங்கப்படும் என அரசுத் தரப்பில் தெரிவிக்கப்பட்டுள்ளது.

அண்ணன் சீர் திட்டத்திற்கு யார் விண்ணப்பிக்க முடியாது என்ற கேள்விக்கும் அரசு பதிலளித்துள்ளது. ரூ.2.5 லட்சத்திற்கு மேல் வருமானம் உள்ள குடும்பங்கள், வருமான வரி அல்லது தொழில் வரி செலுத்தும் குடும்பங்கள் இத்திட்டத்தில் பயன்பெற முடியாது. சொந்தமாக நான்கு சக்கர வாகனங்கள் வைத்திருப்பவர்கள், 10 ஏக்கருக்கு மேல் நன்செய் நிலம் அல்லது 25 ஏக்கருக்கு மேல் புன்செய் நிலம் வைத்திருப்பவர்களும் தகுதியற்றவர்கள் ஆவர்.

வீட்டு உபயோகத்திற்கு ஆண்டுக்கு 3,600 யூனிட்டுகளுக்கு மேல் மின்சாரம் பயன்படுத்தும் குடும்பங்கள், தேர்ந்தெடுக்கப்பட்ட மக்கள் பிரதிநிதிகள் (ஊராட்சி மன்ற உறுப்பினர்கள் தவிர்த்து), அரசுத் துறைகள் மற்றும் நிறுவனங்களில் பணிபுரிபவர்கள் அல்லது ஓய்வூதியதாரர்கள், ஆண்டுக்கு ரூ.50 லட்சத்திற்கும் மேல் விற்பனை செய்து சரக்கு மற்றும் சேவை வரி செலுத்துபவர்களின் குடும்ப உறுப்பினர்கள் ஆகியோரும் இத்திட்டத்திற்கு விண்ணப்பிக்க தகுதியற்றவர்கள் எனத் தெரிவிக்கப்பட்டுள்ளது.

மேலும், பிற துறைகள் அல்லது வாரியங்கள் மூலம் செயல்படுத்தப்படும் வேறு ஏதேனும் திருமண நிதியுதவி திட்டத்தின் கீழ் ஏற்கனவே பயன்களைப் பெற்றவர்கள் இத்திட்டத்தில் பயன்பெற இயலாது. அண்ணா சீர் திட்டம் 5.10.2026 முதல் நடைபெறும் திருமணங்களுக்குப் பொருந்தும். எனவே, 5.10.2026 முதல் 15.01.2027 வரை நடைபெறும் திருமணங்களுக்கு இத்திட்டத்தின் கீழ் பயன்பெற, 15.01.2027 வரை விண்ணப்பங்களைச் சமர்ப்பிக்கலாம். குடும்ப அட்டையில் மணப்பெண்ணின் பெயர் இடம்பெறாதவர்கள் அல்லது திருமணத்திற்கு சட்டப்பூர்வ வயதை நிறைவு செய்யாதவர்கள் விண்ணப்பிக்க முடியாது.

விண்ணப்பதாரர்கள் திருமணச் சான்றிதழ், ஆதார் கார்டு, பான் கார்டு, குடும்ப அட்டை, முகவரிச் சான்று உள்ளிட்டவற்றைச் சமர்ப்பித்து விண்ணப்பிக்க வேண்டும். ஒருவேளை விண்ணப்பம் நிராகரிக்கப்பட்டால், அதற்கான காரணம் உடனடியாகத் தெரிவிக்கப்படும். தவறாக நிராகரிக்கப்பட்டதாகக் கருதினால், இணையதளத்திலேயே மேல்முறையீடு செய்யும் வசதியும் வழங்கப்பட்டுள்ளது. மேல்முறையீட்டு விண்ணப்பங்கள் கள விசாரணைக்கு உட்படுத்தப்பட்டு, தகுதியிருப்பின் பலன்கள் வழங்க நடவடிக்கை எடுக்கப்படும் என அரசுச் செயலாளர் ம. பல்லவி பல்தேவ் வெளியிட்டுள்ள அரசாணையில் தெரிவிக்கப்பட்டுள்ளது.

Author

Fernandez

Senior Reporter

Fernandaz – MDTV 24x7 News நிறுவனத்தின் Senior Reporter மற்றும் General News Writer ஆக பணியாற்றி வருகிறார். அரசியல், சமூக நிகழ்வுகள், மக்கள் பிரச்சினைகள் மற்றும் முக்கிய நடப்பு செய்திகளை துல்லியமாகவும் விரைவாகவும் மக்களிடம் கொண்டு சேர்ப்பதில் அனுபவம் பெற்றவர். நம்பகமான தகவல்களை தரமான செய்திகளாக வழங்கும் நோக்கத்துடன் செய்தித்துறையில் தொடர்ந்து செயல்பட்டு வருகிறார்.

Share This Article
Senior Reporter Fernandaz – MDTV 24x7 News நிறுவனத்தின் Senior Reporter மற்றும் General News Writer ஆக பணியாற்றி வருகிறார். அரசியல், சமூக நிகழ்வுகள், மக்கள் பிரச்சினைகள் மற்றும் முக்கிய நடப்பு செய்திகளை துல்லியமாகவும் விரைவாகவும் மக்களிடம் கொண்டு சேர்ப்பதில் அனுபவம் பெற்றவர். நம்பகமான தகவல்களை தரமான செய்திகளாக வழங்கும் நோக்கத்துடன் செய்தித்துறையில் தொடர்ந்து செயல்பட்டு வருகிறார்.
கருத்துகள் இல்லை

மறுமொழி இடவும்

உங்கள் மின்னஞ்சல் வெளியிடப்பட மாட்டாது தேவையான புலங்கள் * குறிக்கப்பட்டன

Exit mobile version