தமிழகத்தில் ஆட்சிக்கு வந்த பிறகு இதுவரை ஆறு காவல் மரணங்கள் நிகழ்ந்திருப்பதாக பாமக தலைவர் அன்புமணி ராமதாஸ் குற்றம் சாட்டியுள்ளார். மதுரையில் விசாரணைக்கு அழைத்துச் செல்லப்பட்ட கோவில் பூசாரி, காவல்துறையினரின் தாக்குதலால் உயிரிழந்த சம்பவம் பெரும் அதிர்ச்சியை ஏற்படுத்தியுள்ளது.
மதுரை மேல அனுப்பானடியைச் சேர்ந்த கோவில் பூசாரி பரமசிவம், சிந்தாமணி காவல் நிலையத்திற்கு விசாரணைக்காக அழைத்துச் செல்லப்பட்டார். அங்கு காவல்துறையினர் அவரை கொடூரமாகத் தாக்கியதாகவும், அதனால் அவர் படுகாயமடைந்து மருத்துவமனையில் அனுமதிக்கப்பட்டும் சிகிச்சை பலனின்றி உயிரிழந்ததாகவும் செய்திகள் வெளியாகியுள்ளன. உயிரிழந்த பரமசிவம் குடும்பத்தினருக்கு தனது ஆழ்ந்த இரங்கலையும் அனுதாபங்களையும் அன்புமணி ராமதாஸ் தெரிவித்துள்ளார்.
பரமசிவம் எந்த தவறும் செய்யவில்லை என்றும், அண்டை வீட்டாருடன் வாகனம் நிறுத்துவது தொடர்பாக ஏற்பட்ட சிறு மோதல் குறித்த விசாரணைக்காக கடந்த மாதம் 19ஆம் தேதி காவல் நிலையத்திற்கு அழைத்துச் செல்லப்பட்டபோது, அங்கு காவல்துறையினர் அவரை கடுமையாகத் தாக்கியதாகக் கூறப்படுகிறது. அதன் பின்னர் வாந்தி, மயக்கம், தலைவலி போன்ற பாதிப்புகளால் அவதிப்பட்ட பரமசிவம், தனியார் மருத்துவமனையில் சிகிச்சை பெற்றும் உயிரிழந்தார்.
இறப்பதற்கு முன் பதிவு செய்யப்பட்ட காணொலியில், காவல்துறையினர் தன்னை கொடூரமாகத் தாக்கியதே தனது உடல்நிலை பாதிக்கப்பட்டு உயிரிழக்கக் காரணம் என்று பரமசிவம் குற்றம் சாட்டியுள்ளார். இது மனித உரிமை மீறல்கள் குறித்த கவலையை மேலும் அதிகரித்துள்ளது.
விசாரணைக்காக அழைத்துச் செல்லப்படுவோரை காவல்துறையினர் கொடூரமாகத் தாக்குவதும், அதில் பாதிக்கப்பட்டவர்கள் உயிரிழப்பதும் அண்மைக்காலமாக அதிகரித்து வருவதாக அன்புமணி ராமதாஸ் சுட்டிக்காட்டியுள்ளார். இதற்கு முன்னதாக நாகர்கோவில் கிளைச்சிறையில் சபரிவர்மன் என்ற மாற்றுத்திறனாளியும், தூத்துக்குடி அமுதா நகரைச் சேர்ந்த அருணாச்சலம் என்ற இளைஞரும் முறையே சிறைத்துறையினர் மற்றும் காவல்துறையினர் தாக்கியதில் உயிரிழந்த சம்பவங்கள் பதற்றத்தை ஏற்படுத்திய நிலையில், தற்போது மதுரை பூசாரி பரமசிவத்தின் மரணம் இந்த கவலையை மேலும் தீவிரப்படுத்தியுள்ளது.
கடந்த தேர்தலின் போது, ஆட்சிக்கு வந்தால் காவல் மரணங்கள் முற்றிலுமாகத் தடுத்து நிறுத்தப்படும் என்று தவெக வாக்குறுதி அளித்திருந்தது. ஆனால், ஆட்சிக்கு வந்த பிறகு இதுவரை ஆறு காவல் மரணங்கள் நிகழ்ந்திருப்பதாக குற்றச்சாட்டுகள் எழுந்துள்ளன. இனிவரும் காலங்களில் இதுபோன்ற காவல் மரணங்கள் நடப்பதை முற்றிலுமாகத் தடுக்க வேண்டும் என்றும் அவர் வலியுறுத்தியுள்ளார்.
மேலும், காவல்துறையினர் தாக்கியதில் உயிரிழந்த பரமசிவம் குடும்பத்தினருக்கு ரூபாய் 50 லட்சம் இழப்பீடு வழங்க வேண்டும் என்றும், இந்த சம்பவத்திற்குக் காரணமான காவலர்கள் மீது சட்டப்படி நடவடிக்கை எடுக்க வேண்டும் என்றும் அன்புமணி ராமதாஸ் தனது எக்ஸ் தள பதிவில் தெரிவித்துள்ளார்.
