நடிகர் அஜித் அரசியலுக்கு வர வேண்டும் என்றும், அவர் வந்தால் மட்டுமே தமிழ்நாட்டை காப்பாற்ற முடியும் என்றும் அவரது ரசிகர்கள் புதிய கட்சியை தொடங்கியுள்ளனர். இது அரசியல் வட்டாரத்தில் பெரும் கவனத்தை ஈர்த்துள்ளது.
நடிகர் விஜய் அரசியலில் ஈடுபட்டிருக்கும் நிலையில், அவருக்கு போட்டியாக சினிமாவில் வலம் வந்த அஜித், தற்போது திரைப்படங்களில் கவனம் செலுத்தாமல் கார் ரேசிங்கில் தீவிரமாக ஈடுபட்டு வருகிறார். கடந்த இரண்டு ஆண்டுகளுக்கும் மேலாக பல்வேறு நாடுகளில் நடைபெறும் மோட்டார் ரேஸ் கார் பந்தயங்களில் அவர் பங்கேற்று வருகிறார்.
விஜயைப் போல் அஜித் அரசியல் ஆர்வம் கொண்டவர் அல்ல. தனது சுயநலத்திற்காக ரசிகர்களை பயன்படுத்திக் கொள்ள மாட்டேன் என்றும், அரசியலுக்கு வரமாட்டேன் என்றும் அஜித் பலமுறை தனது அறிக்கைகள் மூலம் தெளிவுபடுத்தியுள்ளார். இருப்பினும், பிரபல ஜோதிடர் ஒருவர் 2031 ஆம் ஆண்டு அஜித் அரசியலுக்கு வருவார் என்றும், அவர் முதலமைச்சராக பதவியேற்பார் என்றும் கணித்துள்ளார். மேலும், அவரது திரைப்படங்கள் தொடர்ந்து வசூலைக் குவிக்கும் என்றும் அந்த ஜோதிடர் கூறியுள்ளார்.
இந்த ஜோதிடரின் கணிப்புகள் ஏற்கனவே பலமுறை உண்மையாகியுள்ளன. கடந்த ஆண்டே 2026 ஆம் ஆண்டு அமெரிக்காவுக்கும் ஈரான் நாட்டுக்கும் இடையே போர் ஏற்படும் என்றும், துபாயிலும் பாதிப்புகள் ஏற்படும் என்றும், தமிழ்நாட்டில் கேஸ் சிலிண்டர் தட்டுப்பாடு ஏற்படும், பெட்ரோல் வாங்க மக்கள் வரிசையில் நிற்பார்கள் என்றும் அவர் கணித்திருந்தார். இவை அனைத்தும் தற்போது நடந்துள்ளதால், அஜித் அரசியலுக்கு வருவார் என்ற அவரது கணிப்பும் நடக்குமா என்ற எதிர்பார்ப்பு ரசிகர்களிடையே எழுந்துள்ளது.
இந்த எதிர்பார்ப்பின் அடிப்படையில், நடிகர் அஜித்தை அரசியலுக்கு அழைக்கும் நோக்கில், அவரது ரசிகர்கள் ஒன்றிணைந்து 'அனைத்து நண்பர்கள் முன்னேற்றக் கழகம்' என்ற பெயரில் புதிய கட்சியைத் தொடங்கியுள்ளனர். இந்த கட்சி, 2031 ஆம் ஆண்டு நடைபெறவுள்ள சட்டமன்றத் தேர்தலை இலக்காகக் கொண்டு செயல்படவுள்ளதாக அறிவித்துள்ளது.
அஜித் அரசியலுக்கு வந்து முதலமைச்சராக வேண்டும் என்றும், அவரது தலைமையில்தான் தமிழ்நாட்டில் ஒரு மாற்றத்தை கொண்டுவர முடியும் என்றும் அக்கட்சியினர் தெரிவித்தனர். மேலும், அஜித்தின் சமூக அக்கறை மற்றும் பொதுமக்கள் மீதான அவரது அணுகுமுறையை முன்னிறுத்தி கட்சிப் பணிகளை மேற்கொள்ளப் போவதாகவும் அவர்கள் குறிப்பிட்டுள்ளனர்.
நடிகர் அஜித் அரசியலுக்கு வருவது குறித்து அவரது தரப்பிலிருந்து இதுவரை எந்தவிதமான அறிவிப்பும் வெளியாகாத நிலையில், அவரது ரசிகர்கள் புதிய கட்சி தொடங்கியிருப்பது அரசியல் களத்தில் சலசலப்பை ஏற்படுத்தியுள்ளது. அஜித் ரசிகர்கள் மத்தியில் இது பெரும் எதிர்பார்ப்பை உருவாக்கியுள்ளது.
