இந்திய கிரிக்கெட் அணியின் மூத்த வீரரும், டெஸ்ட் அணியின் முன்னாள் துணை கேப்டனுமான அஜின்க்யா ரஹானே, அனைத்து வகையான கிரிக்கெட் போட்டிகளில் இருந்தும் தனது ஓய்வை சமீபத்தில் அறிவித்தார். இந்த திடீர் அறிவிப்பைத் தொடர்ந்து, அவருக்கு வாழ்த்து தெரிவிக்க அழைத்த முக்கிய வீரர்கள் குறித்து ரஹானே மனம் திறந்து பேசியுள்ளார். ஓய்வு பெற்ற பிறகு தனக்கு வந்த முதல் தொலைபேசி அழைப்பு சச்சின் டெண்டுல்கரிடமிருந்து வந்ததாக அவர் நெகிழ்ச்சியுடன் பகிர்ந்து கொண்டார்.
ரஹானே தனது பேட்டியில், 'நான் ஓய்வு குறித்த வீடியோவை வெளியிட்ட உடனேயே எனக்கு முதலில் அழைத்தது சச்சின் டெண்டுல்கர் தான். நான் இன்னும் சில ஆண்டுகள் விளையாடுவேன் என்று அவர் நினைத்ததாகக் கூறினார். ஆனால், எந்தவித வருத்தமும் இன்றி, தேவையில்லாமல் எனது ஆட்டத்தை மேலும் தொடர விரும்பவில்லை என்று அவரிடம் தெரிவித்தேன்' என அவர் கூறினார்.
சச்சினைத் தொடர்ந்து, முன்னாள் இந்திய வீரர் இர்பான் பதானும் ரஹானேவுக்கு தொலைபேசியில் அழைத்து வாழ்த்து தெரிவித்துள்ளார். மேலும், தற்போதைய இந்திய அணியின் நட்சத்திர வீரர்களான விராட் கோலி, ரோஹித் சர்மா, மற்றும் ஜஸ்பிரித் பும்ரா ஆகியோர் ரஹானேவுக்கு குறுஞ்செய்தி (மெசேஜ்) மூலம் தங்களது வாழ்த்துக்களைப் பகிர்ந்துள்ளனர்.
ரஹானேவுடன் நீண்ட காலம் இந்திய அணிக்காக ஒன்றாக விளையாடிய சக டெஸ்ட் வீரர் புஜாராவும் அவருக்கு வாழ்த்து தெரிவித்துள்ளார். இந்த முக்கிய வீரர்கள் அனைவருக்கும், 'விளையாட்டிற்கு எனது முழு பங்களிப்பையும் அளித்துவிட்டேன், முழு திருப்தியுடன் ஓய்வு பெறுகிறேன்' என்று ரஹானே ஒரே மாதிரியான பதிலை அனுப்பியுள்ளார்.
ஓய்வு அறிவிப்பு குறித்து மேலும் பேசிய ரஹானே, 'ஓய்வு வீடியோவை பதிவு செய்த பிறகு நான் மிகவும் அழுதேன். எனது குடும்பத்தினருடன் இதைப் பற்றி விவாதிக்கும் போது நான் மிகவும் உணர்ச்சிவசப்பட்டேன். இத்தனை வருடங்களாக நான் நேசித்த ஒரு விஷயத்தை இனி செய்ய மாட்டேன் என்ற எண்ணம் என்னை மிகவும் பாதித்தது' என்று தனது மன உணர்வுகளை வெளிப்படுத்தினார்.
இந்திய அணியின் டெஸ்ட் பயணத்தைப் பற்றி பேசிய ரஹானே, 'நானும் புஜாராவும் உள்நாட்டு போட்டிகளில் அதிகம் விளையாடியுள்ளோம். விராட் கோலியுடன் இந்திய அணிக்காக அதிக நேரம் செலவிட்டுள்ளேன். 2015 ஆம் ஆண்டில் 6 அல்லது 7 வது இடத்தில் இருந்த இந்திய டெஸ்ட் அணியை, நாங்கள் கடுமையாக உழைத்து முதலிடத்திற்குக் கொண்டு வந்தோம்' என்று பெருமையுடன் கூறினார். இந்த வெற்றி இந்திய கிரிக்கெட் வரலாற்றில் ஒரு முக்கிய மைல்கல்லாக அமைந்தது.
