டெல்லியில் உள்ள பிரபல 5 நட்சத்திர ஹோட்டல் ஒன்றில் ஏர் இந்தியா விமானி ஒருவர் மர்மமான முறையில் உயிரிழந்த நிலையில் சடலமாக மீட்கப்பட்டுள்ளார். இந்த சம்பவம் பெரும் அதிர்ச்சியை ஏற்படுத்தியுள்ளது.
விமானி, டெல்லியின் வசந்த் குஞ்ச் பகுதியில் உள்ள ஒரு முன்னணி 5 நட்சத்திர ஹோட்டலில் தங்கியிருந்தார். பலமுறை அவரது குடும்பத்தினர் செல்போனில் தொடர்பு கொள்ள முயன்றும் அவர் பதிலளிக்காததால், அவர்கள் மத்தியில் சந்தேகம் எழுந்தது. இதனால், அவர்கள் உடனடியாக ஹோட்டல் நிர்வாகத்திற்கு தகவல் தெரிவித்தனர்.
ஹோட்டல் ஊழியர்கள், மாற்று சாவியைப் பயன்படுத்தி விமானியின் அறைக்கதவைத் திறந்து பார்த்தபோது, அவர் சுயநினைவின்றி கிடந்ததைக் கண்டு அதிர்ச்சியடைந்தனர். உடனடியாக இதுகுறித்து டெல்லி வசந்த் குஞ்ச் காவல்துறையினருக்கு தகவல் தெரிவிக்கப்பட்டது.
சம்பவ இடத்திற்கு விரைந்த காவல்துறையினர், விமானியை உடனடியாக சப்தர்ஜங் மருத்துவமனைக்கு அழைத்துச் சென்றனர். அங்கு அவரைப் பரிசோதித்த மருத்துவர்கள், அவர் ஏற்கனவே இறந்துவிட்டதாகத் தெரிவித்தனர்.
முதற்கட்ட விசாரணையின் அடிப்படையில், விமானிக்கு திடீரென ஏற்பட்ட மாரடைப்பு காரணமாகவே உயிரிழப்பு ஏற்பட்டிருக்கலாம் என்று காவல்துறையினர் சந்தேகிக்கின்றனர். இருப்பினும், பிரேத பரிசோதனை அறிக்கை வந்த பின்னரே மரணத்திற்கான முழுமையான காரணம் தெரியவரும் என்று அவர்கள் தெரிவித்துள்ளனர்.
இந்த துயரச் சம்பவம் குறித்து ஏர் இந்தியா நிறுவனம் ஆழ்ந்த இரங்கல் தெரிவித்துள்ளது. உயிரிழந்த விமானியின் குடும்பத்தினருக்குத் தேவையான அனைத்து உதவிகளையும் செய்வதாகவும் அந்நிறுவனம் உறுதியளித்துள்ளது. இந்த மர்ம மரணம் குறித்து காவல்துறையினர் தொடர்ந்து விசாரணை நடத்தி வருகின்றனர்.
