பெல்ஃபாஸ்டில் நடைபெற்ற பரபரப்பான 3வது ஒருநாள் போட்டியில், அயர்லாந்து அணியை 3 விக்கெட் வித்தியாசத்தில் வீழ்த்தி ஆப்கானிஸ்தான் அணி அபார வெற்றி பெற்றுள்ளது. இந்த வெற்றியின் மூலம், வரும் 2027 ஒருநாள் உலகக்கோப்பை கிரிக்கெட் தொடருக்கு ஆப்கானிஸ்தான் நேரடியாக தகுதி பெற்று வரலாற்று சாதனை படைத்துள்ளது.
முதலில் பேட்டிங் செய்த அயர்லாந்து அணி, ஆப்கானிஸ்தானின் துல்லியமான பந்துவீச்சை சமாளிக்க முடியாமல் 206 ரன்களுக்கு அனைத்து விக்கெட்டுகளையும் இழந்தது. ஆப்கானிஸ்தான் தரப்பில் நட்சத்திர வீரர் ரஷித் கான் மற்றும் ஏஎம் கசன்ஃபர் ஆகியோர் தலா 3 விக்கெட்டுகளை சாய்த்து அசத்தினர். அயர்லாந்து அணியில் கவின் ஹோய் 36 ரன்களும், ஜெய் முந்த்ரா 31 ரன்களும் எடுத்தனர்.
207 ரன்கள் எடுத்தால் வெற்றி என்ற இலக்குடன் களமிறங்கிய ஆப்கானிஸ்தான் அணிக்கு, தொடக்க ஆட்டக்காரர் ரஹ்மானுல்லா குர்பாஸ் அரைசதம் அடித்து வலுவான அடித்தளம் அமைத்துக் கொடுத்தார். இருப்பினும், அயர்லாந்து அணியின் சுழற்பந்து வீச்சாளர் கவின் ஹோய் சிறப்பாக பந்துவீசி 4 முக்கிய விக்கெட்டுகளை கைப்பற்றி, ஆப்கானிஸ்தான் அணிக்கு நெருக்கடியை ஏற்படுத்தினார்.
97 ரன்களுக்கு 2 விக்கெட் என்ற நல்ல நிலையில் இருந்த ஆப்கானிஸ்தான் அணி, அடுத்தடுத்து விக்கெட்டுகளை இழந்து 176 ரன்களுக்கு 7 விக்கெட் என்ற இக்கட்டான நிலைக்குத் தள்ளப்பட்டது. இந்த இக்கட்டான சூழலில், களத்தில் நின்ற அனுபவம் வாய்ந்த ஆல்-ரவுண்டர் ரஷித் கான், பொறுப்புடனும் நிதானத்துடனும் விளையாடினார்.
அவர் 43 பந்துகளில் 4 பவுண்டரிகளை விளாசி 37 ரன்கள் எடுத்து, ஆட்டமிழக்காமல் அணியை வெற்றிக்கு அழைத்துச் சென்றார். இறுதியில், ஆப்கானிஸ்தான் அணி 44.5 ஓவர்களில் 7 விக்கெட் இழப்பிற்கு 207 ரன்கள் எடுத்து, 3 விக்கெட் வித்தியாசத்தில் திரில் வெற்றி பெற்றது.
இந்த வெற்றியின் மூலம், 5 போட்டிகள் கொண்ட ஒருநாள் தொடரில் ஆப்கானிஸ்தான் அணி 2-0 என்ற கணக்கில் முன்னிலை வகிக்கிறது. இந்தத் தொடரின் முதல் போட்டி மழையால் கைவிடப்பட்டது என்பது குறிப்பிடத்தக்கது. இதன் மூலம், ஆப்கானிஸ்தான் அணி ஒருநாள் கிரிக்கெட் தரவரிசையில் எட்டாம் இடத்தை உறுதி செய்துள்ளது.
இந்த வரலாற்றுச் சிறப்புமிக்க வெற்றியின் மூலம், ஆப்கானிஸ்தான் அணி தொடர்ந்து நான்காவது முறையாக ஒருநாள் உலகக்கோப்பைக்கு நேரடியாகத் தகுதி பெற்றுள்ளது. இதன் விளைவாக, வெஸ்ட் இண்டீஸ் அணி நேரடியாக உலகக்கோப்பைக்கு தகுதி பெறும் வாய்ப்பை இழந்து, தற்போது தகுதிச் சுற்றில் விளையாட வேண்டிய கட்டாயத்திற்குத் தள்ளப்பட்டுள்ளது.
ரஷீத் கானின் சிறப்பான ஆட்டம் ஆப்கானிஸ்தான் அணிக்கு மட்டுமல்லாமல், உலக கிரிக்கெட் ரசிகர்களுக்கும் பெரும் உற்சாகத்தை அளித்துள்ளது. இந்த வெற்றி, ஆப்கானிஸ்தான் கிரிக்கெட்டின் வளர்ச்சியை மேலும் பறைசாற்றியுள்ளது.
